الكرش .. كيفية التخلص من الكرش و تخسيس البطن .. تمارين البطن المطلوبة
الكرش هو جزء لا يتجزأ في حياة كتير من الناس خاصة الرجالة، الكرش هو رفيقك أينما كنت.
الكرش صاحب جدع معاك ع الحلوة و المرة بس للأسف غدار فجأة هيخونك و يوقعك وقعة عمرك ما كنت هتتوقعها.
أغلب الرجالة و خاصة في مصر و الوطن العربي من أصحاب الكرش.
لدرجة انه من الاسماء التانية للكرش سمنة الذكور.
مش كده و بس الذكور دول بدأوا يضحكوا على نفسهم بمجموعة من الأكاذيب.
بيحاولوا بالأكاذيب دي يدافعوا عن نفسهم مثلا لما يقول لك ” الراجل ميبقاش راجل من غير كرش “.
أو مثلا ” الراجل من غير كرش ميسواش قرش “.
و طبعا ده كله أي كلام و دفاع في الباطل، مش كده و بس ده دليل قوي على العجز و الفشل و ترسيخ لفكرة
و هتلاقي كمان ع السوشيال ميديا ناس تنزل عناوين كبيرة من نوعية ” فوائد الكرش ” أو مثلا ” عشر حاجات تخليكي تحبي الراجل اللي بكرش “.
و النبي ده إسمه كلام !
من حق الراجل إنه يعتز بالكرش مفيش كلام بس ميشتكيش بعد كده من اللي هيعاني منه.
طبعا بقا الموضوع ده في الستات أبشع و أفظع بكتيييير من الرجالة.
و طبعا محبي الأي كلام يقولوا إسمها كيرفي (curvy)، اللي هو ازاي يعني؟
تبقا لسه مجبتش 40 سنة و مش قادرة تمشي و تروح للدكتور تشتكي و تقول ” مش قادرة من ركبتي يا دكتور “.
ما انتي اللي عملتي في نفسك كده، مين اللي بيفتري في الأكل و قاعد زي البروطه في البيت و مبيتحركش؟ مش انتي؟
مش لازم يعني بواقي الأكل تتفضيها في بطنك أول بأول هي مش بلاعة يعني، بلاش إستخسار.
و لو ماكلتهاش هي تقوم تعلف الغلبان التاني و ياكل من خوفه منها لما بقا بينهج و هو بيلبس الجزمة هو كمان.
نتكلم شوية عن الكرش و ازاي بيحصل و ازاي نتخلص منه؟
الرجل و التفاحة:
الظاهر كده ان في مشكلة ما بين جنس الرجال و التفاح.
التفاحة حاشرة نفسها في حياة أي ذكر بالعافية و الموضوع ده قديم و تاريخي.
من أيام ما أبونا آدم اكل التفاحة من الشجرة في الجنة و بعدها نزل على الارض.
مرورا بتسمية ذلك الشيء البارز في عنق الرجال بتفاحة آدم.
نهاية بالاسم العبقري لهذا النتوء العظيم المتدلي من البطن ألا و هو الكرش الذي أصطلح عليه أيضا ب ” التفاحة “.
ازاي الكرش بيتكون؟
الكرش مبيجيش فجأة، الكرش بييجي بعد معاناة و مجهود من صاحبه لحد ما قدر يربيه.
و فكرة ظهور الكرش بعد الجواز دي ظاهرة تستحق الدراسة.
بيبقوا متجوزين فتلتين قبل الزواج، بيدخلوا من تحت عقب الباب، و هو أسبوع و تلاقي الإنتفاخات ظهرت من كل جنب.
و بعد الحمل و الرضاعة تتحول الأم لفقاعة قادرة على الطيران و الراجل خلاص معدش قادر يشوف اللي تحت رجليه من كرشه.
طبعا ده بيرجع للأنتخة الزايدة عن اللازم، تاكل و تنام و هكذا مرارا و تكرارا.
و بالتأكيد الهرمونات الخاصة بالحمل و الرضاعة بتساعد بشكل كبير على النفخة اللي بتعاني منها الستات.
إذن نقدر نقول ان الكرش بيبتدي من خلال الأكل الكتير و بدون حرق مقابل للدهون،الكرش عبارة عن تراكم للدهون في منطقة البطن.
يعني انت عمال تدي دهون لجسمك من خلال الأكل، خاصة النشويات و الدهون، لان النشويات هي كمان بتتحول لدهون.
و الطبيعي ان الدهون دي بتتحرق من خلال المجهود و تدي للجسم الطاقة اللي محتاجها.
لكن هنا الوضع مختلف، سيادتك عمال تغذي الجسم بالدهون من غير ما تتحرق بالشكل الكافي.
بالتالي الجسم بيبتدي يخزنها في منطقة البطن بالذات على أمل انها تتحرق في يوم من الايام.
و بالتدريج تبتدي تزيد الدهون في مناطق تخزينها اللي منها البطن لحد ما يتكون الكرش.
أسباب تانية:
طبعا كمان موضوع النوم بعد الاكل مباشرة ده مصيبة لوحدة، لانك كده بتكون عبيت جسمك بالدهون بدون ما تحرق منها حاجة مطلقا.
مهما كانت ظروف شغلك متسيبش نفسك كده ابدا، ترجع اخر اليوم هلكان و تاكل و تشد نوم، ده غلط كبير جدا.
عسر الهضم هو الآخر من الأسباب اللي بتساعد على تنامي كرشك بشكل مش بسيط.
كبر السن في الرجال و سن اليأس في السيدات أول ما بيحصلوا بتزداد عضلات البطن وهنا على وهن و بالتالي اي شوية اكل و لو صغيرين قادرين على زيادة البطن.
و الستات كمان مظلومين في حاجة زيادة و هي الولادة القيصرية لانها بتضعف عضلات جدار البطن و ده بيساعد على ظهور الترهلات و البطن.
الوراثة هي الاخرى لها دور في موضوع الكرش و البطن.
ايه هي انواع الدهون؟
الطبيعي ان الجسم اول ما يحس ان الطاقة جواه قليلة او انه محتاج طاقة اعلى يلجأ للدهون لامداده بالطاقة.
و لو لقا نفسه مش محتاجها فطبيعي هيسيبها مخزنة في اماكنها.
و طبعا كلنا عارفين الدهون الموجودة تحت الجلد لكن اللي متعرفوش ان في دهون تانية في اماكن كتير داخل الجسم.
يعني في دهون تانية بتحيط و بتبطن بعض الأعضاء الحيوية في الجسم في أجزاء معينة منها.
الأعضاء دي زي القلب، الرئة و العضلات.
لو زادت الدهون اللي تحت الجلد ده اللي بيعمل الكرش و الترهلات اللي في كل حتة في الجسم.
أما الخطورة فعلا انها تزيد عند مناطق الاعضاء الحيوية و من أخطرها طبعا الأوعية الدموية و القلب.
خطورة الكرش:
الاشخاص اصحاب الكروش عرضة اكتر من غيرهم للتعرض لمجموعة كبيرة من الامراض المزمنة.
منها ارتفاع ضغط الدم، قصور الأوعية الدموية و خاصة أوعية القلب الرئيسية.
و ده بيخلي الشخص عرضة جدا لامراض القلب المزمنة.
مرض السكري و هو واحد من الامراض المنتشرة بشكل كبير بين الناس.
صعوبة التنفس و بالتالي صعوبة النوم ده غير كمية شخير تصيب اللي بينام معاه في نفس المكان بالإكتئاب.
ده غير طبعا الخشونة المبكرة في المفاصل و آلام الظهر و الركبة.
علما بان الكرش يعتبر من السمنة الوسطية و ليس من السمنة المفرطة و دي مضاعفاتها أخطر و أعنف بكتير.
الكرش و الجنس:
بالرغم من ان الكلام في الموضوع ده محرج حبتين بس اكيد هو يستحق لفت الانظار.
لان بدون الكرش الحياة الجنسية هتختلف تماما و هيبقا لها شكل جديد.
لان الكرش هيعتبر عائق لا بأس به في الموضوع ده بالذات.
لو كلا الطرفين من ذوي الكروش بتزداد الأمور تعقيدا، و يصبح الأمر أشبه بمصارعة السومو اليابانية و احتمالات الاصابات فيها مش قليلة.
أما لو كان أحد الطرفين صاحب كرش و التاني بطنه لازقة في ضهره فالطرف الغلبان ده ربنا معاه.
القصة هنا بقت و كأنها حلبة خاصة بمصارعة الثيران، واحد غلبان لكنه مستفذ و واحد قوي لكنه اغلب من الأولاني.
بس الغلبان اوي ده لو اتمكن من المستفذ هيقطم رقبته.
ناهيك بقا عن النهجان و ضيق النفس من اقل مجهود و ده طبعا بيأثر بالسلب على النتيجة النهائية.
كيفية التخلص من الكرش:
لو عايز تعرف انك بكرش و لا لأ، هات مازورة و شدها حول الوسط من أعلى نقطة في عظمة الحوض.
و شدها لاعلى نقطة في العظمة المقابلة مرورا بالسرة.
لو اقل من 88 في السيدات او 102 في الرجال يبقا كده تمام، و لو اكتر من كده، مبروك جالك كرش.
اول حاجة لازم تعرفها و تتعلمها هي الصبر ثم الصبر.
لان الموضوع ابدا مش هييجي بسرعة، لازم تعرف كده، ضناك اللي بقالك سنين بتربيه ع الغالي مش هترميه في الشارع بين يوم و ليلة يعني.
ثانيا تظبيط الاكل، بمعني التقليل من الوجبات الدهنية و المقلية في زيت و سمنة و ما شابه.
كذلك النشويات زي الرز و المكرونة، لان النشويات بتتحول داخل الجسم لدهون هي كمان.
الاعتماد بشكل كبير على الخضار و الفاكهة و السلطة في الوجبات لان معظمها عبارة عن الياف تملا المعدة و تديلك احساس بالشبع.
متاكلش و تنام، متاكلش و تنام، متاكلش و تنام.
الافضل عشا خفيف مش تتعشا بعشرة عيش و معاهم ما لذ و طاب.
و لازم كمان يكون فيه فترة زمنية كبيرة بين العشا و بين النوم.
الرجيم و الاكل:
الرجيم و انظمته كتير جدا و الافضل المتابعة مع متخصص في السمنة و النحافة للوصول للنظام الغذائي الافضل طبقا للحالة الصحية العامة.
لانك هتسمع عن حاجات كتير و مشروبات الناس بتقول انها فعالة جدا زي الشاي الأخضر و عصير الطماطم و النعناع.
و مثلا شرب المياه الدافية على الريق ناس كتير جربته و استفادت منه.
شرب القرفة و الجنزبيل هما كمان لهم دور كبير في التخلص من الدهون و حرقها.
الاكثار من شرب المياه و التقليل من تناول السكريات بيساعدوا على التخلص من الدهون.
المياه الغازية بشكل عام خطرة جدا و خصوصا على موضوع الكرش ده.
النوم لساعات كافية يوميا مهم جدا للحفاظ على رشاقة الجسم.
تخسيس البطن :
بيعتمد تخسيس البطن بشكل رئيسي على التمارين الرياضية و تغيير نمط الحياة اليومي.
ممارسة الرياضة بشكل يومي مهم جدا للتخلص من دهون البطن، رياضة المشي من أجمل الرياضات للتخلص من الكرش و تخسيس البطن.
الهرولة أي المشي السريع و لو تقدر على الجري يبقا أحسن و أحسن.
لو كنت من ميسوري الحال و تقدر تتابع في چيم أو حتى تشتري عجلة ثابتة للتخسيس فده هيساعدك بشكل كبير.
رياضات الأيروبك بشكل عام مهمة للصحة العامة و التخسيس.
حتى نط الحبل هو كمان بيساعد جدا في الحالات اللي زي دي.
و ده اللي بيخلي الاطباء دايما بينصحوا الستات بعد الولادة بممارسة الرياضة قبل ما العضلات تضعف بشكل يجعل الامور اكثر صعوبة.
تمارين البطن :
من أهم الحاجات اللي يجب الالتزام بها لتتخلص من كرشك؛ تمارين البطن، و هي انواع كتير.
1) تنام على ضهرك مع رفع الساق مفردة و تثبيتها لمدة 10-15 عدة مع التكرار.
2) تنام على ضهرك و تفرد رجليك و تتني الركبة في اتجاه البطن.
3) تنام على جنبك مع رفع الساق الغير ملامسة للأرض بموازاة الارض.
4) تنام على ضهرك مع ثني البطن للأمام.
5) النوم على الضهر مع ثني الجزع للأمام و لأحد الجانبين.
6) تمارين الضغط.
7) النوم على الضهر و الارتكاز على الضهر و تثبيت القدمين مع رفع الوسط لاعلى.
8) النوم على البطن مع رفع الوسط و الصدر و الرأس لأعلى.
جراحات السمنة :
أصبح لجراحات السمنة دور مهم جدا للتخلص من الدهون و الكرش.
بداية مثلا من تركيب البالون و جراحات تكميم المعدة و تدبيس المعدة.
و كمان عمليات تحويل المسار و شفط الدهون.
لكن كل دول لهم دواعي معينة علشان المريض يعملهم، يعني مش أي عيان بكرش يعمل العمليات دي.
لان العمليات دي لها مضاعفات خطيرة جدا.
بعد كل اللي فات ده لازم تعرف ان الفشل طريق النجاح، من الوارد انك تفشل مرة و اتنين بس لازم تقاتل علشان تتخلص من قاتلك.
الكرش قاتل، تخلص منه قبل ما يخلص عليك.
اترك تعليقاً