أفلام مصرية بين كومبارسات منسية و أدوار تانية و ثانوية أو بطولات مخفية-الحلقة السادسة.
حكاياتنا عن نجوم ظهرت في أفلام مصرية مبتنتهيش. تاريخ طويل من الفن و الابداع في أفلام مصرية لها سحر خاص.
و النجوم كمان مبتنتهيش عايشين أو مش عايشين أفلامهم بتخلد ذكراهم.
و نكمل المشوار…….
101) سعيد خليل (1911-1980):
سعيد خليلعلى طول عدو البطل و غريمه متعرفش ليه. من أكابر الشر في السينما المصرية.
كان سبب لدخول توفيق الدقن الفن لما كان في عرض مسرحي في المنيا في مدرسة الدقن اللي كان رئيس فريق التمثيل فيها.
و لاسباب مرضية اعتذر خليل ليحل محله الدقن ليبدأ احترافه الفن.
من أشهر أفلامه صراع في النيل, اسماعيل يس يقابل ريا و سكينة “عبد العال”, ملك البترول, باب الحديد و بحبوح أفندي..
102) نجوى سالم (1925-1988):
نجوى سالمضحكتها من أشهر ضحكات السينما المصرية. دلوعة من دلوعات الفن.
يهود في أفلام مصرية: هي نظيرة موسى شحاته من أب لبناني الأصل و أم اسبانية يهودية. اسم الشهرة نينات.
اشتهرت بأداء مميز و ممتع في المسرح من مسرحياتها: إلا خمسة, لوكاندة الفردوس, حسن و مرقص و كوهين (دور بنت كوهين).
من الأفلام: ملك البترول و شمشون و لبلب.
اعلنت اسلامها سنة 1960 و تزوجت من الصحفي عبدالفتاح البارودي هذا الزواج اللي تم اخفائه لحد وفاتها.
لظروف مرضية اعتذرت ميمي شكيب عن أداء دورها في أحد المسرحيات ليضطر الريحاني لاسناد الدور لنينات اللي كانت متابعة فرقة الريحاني كويس أوي.
و لكن الحياة مبتديش كل حاجة دايما أصيبت نجوى بمرض نفسي هو عقدة الاضطهاد و نظرية المؤامرة سيطروا عليها بشكل كبير.
ما بين اضطهاد المخرجين لها و شعورها الدائم بان في حد عايز يقتلها عشان يهودية الاصل عاشت نجوى حياة معذبة مترددة على المصحات النفسية.
103) عبدالله اسماعيل:
عبدالله اسماعيلكان ملازم للفنان القدير محمد صبحي في كتير من الاعمال و بالاخص رحلة المليون لما كات يرمي الطاقية و بعدها يقول “هاتها”.
كمان كان معاه في الجوكر و أونكل زيزو حبيبي.
من افيهاته المشهورة في سنبل “اصحى للون معايا”.
توفي في حادث على طريق الاسماعيلية عام 1987.
104) ألفت امام:
الفت اماممن خفيفات الظل في عالم الفن. ألفت امام الحاصلة على بكالريوس الفنون المسرحية. مواليد 1964.
لها أعمال كتير على رأسها من المسلسلات: يوميات ونيس, زيزينيا, رأفت الهجان و المحروسة.
و من الأفلام: بيت القاصرات, هستيريا, فيلم ثقافي, الواد محروس بتاع الوزير و فبراير الأسود.
105) عباس رحمي (1916-1969):
عباس رحميكان شغال رئيس الاسطبلات الخاصة الملكية قبل اقتحامه عالم الفن. يقال انه من أصول يهودية و بالتالي ينضم ليهود كتير ظهروا في أفلام مصرية.
اشتهر بأدوار البرستيج يعني مكيل نيابة أو بيه أو شخصية مجتمع.
من اعماله الخمسة جنيه مع محسن سرحان, فيلم مصطفى كامل, الحقيقة العاريه, ألمظ و عبده الحامولي و في بيتنا رجل.
106) ألفت سكر:
الفت سكرهي زوجة الفنان وحيد سيف رحمه الله سورية الأصل, و والدة الفنان أشرف سيف.
مواليد 1942.من المسلسلات: العراف و فرقة ناجي عطا الله.
من الأفلام: شادر السمك, البيضة و الحجر, الجراج, رامي الأعتصامي, الباشا تلميذ, غرام الأفاعي و البيه البواب.
107) نعيم عيسى:
نعيم عيسى“تسلم الجاموسة اللي جابتكم” جملته الشهيرة في ريا و سكينة جميل الحرامي تاجر القماش في المسرحية.
من مواليد 1937. التحق بفرقة مدبولي. اسكندراني الأصل. و كان وصل لدرجة مدير المسرح العسكري.
اشترك في افلام زي المتسول, الانسان يعيش مرة واحدة.
108) استر شطاح (1884-1971):
استر شطاحأحد اليهود في السينما المصرية . سورية الأصل. ملهاش أدوار كتير. لكن شكلها مألوف بالنسبه لنا.
اشتركت في عدد من الافلام الكبيرة زي: آه من حواء, تمر حنة, الحرمان, سلامة و الخمسه جنيه.
غلب عليها دور الشر في أفلامها أو العجوز المتعبة لأقاربها فعلا يهودية في أفلام مصرية.
109) ابراهيم عبد الرازق (1912-1987):
إبراهيم عبدالرازقمن مواليد شربين (الدقهلية). التحق بفرقة المنصورة المسرحية.
“حديد على حديد يفعل الله ما يريد” دي كانت جملته المشهورة في مسلسل غوايش.
هو شندويلي في عنتر شايل سيفه. من اعماله كمان البعض يذهب للمأزون مرتين.
توفى على المسرح أثناء تأدية دوره في مسرحية كعبلون.
110) صالحة قاصين (1878-1964):
صالحة قاصينيهودية الأصل عاشت في مصر عكس اختها جراسيا قاصين اللي هاجرت لاسرائيل.
بيقال انها كانت جميلة جدا في شبابها و الريحاني كان معجب بها جدا و لم يتمكن من الزواج منها لكونه مسيحي الديانة و هي يهودية.
ده مش كده و بس ده يقال انها كانت سبب دخوله الفن من الأساس.
هي أول سيدة تقف على خشبة المسرح.
أفلام مصرية من أعمالها: شهر عسل…شهر بصل, لوكاندة المفاجآت, اسماعيل يس في مستشفى المجانين و حلال عليك.
في اشاعات بتقول انها مش بس مهاجرتش من مصر ده كمان أشهرت اسلامها.
طبعا كحال الدنيا لا تدوم فبعد العز اللي شافته وصل بها الحال لاستئجار غرفة في حديقة منزل جورج أبيض تعيش فيها.
أصيبت بالزهايمر قبل وفاتها.
111) عبدالله حنفي (1953-2015):
عبدالله حنفيحاصل على نجمة سيناء لكونه واحد من أبطال أكتوبر و نديله نجمه كمان في أفلام مصرية كتير ظهر فيها.
سويسي أصيل. حاصل على بكالريوس فنون مسرحية 1978.
من أفلامه: حسن و مرقص,جري الوحوش و الحب فوق هضبة الهرم.
من أشهر أعماله في المسلسلات التي وصلت فوق 100 عمل: الزيني بركات, الباطنية, ذئاب الجبل, عمر بن عبد العزيز و المال و البنون.
112) جراسيا قاصين (1900-1977):
جراسيا قاصينالممثلة المصرية اليهودية اللي هاجرت لاسرائيل و ماتت هناك.
على عكس أختها صالحة اللي فضلت في مصر.
كان دورها المميز و اللي بنفتكره دايما في فيلم اسماعيل يس في بيت الأشباح. و كمان فيلم فاطمة و ماريكا و راشيل.
ده غير أفلام مصرية زي قلبي دليلي, أحمر شفايف و لعبة الست.
113) مجدي وهبه (1940-1990):
مجدي وهبهمن الأشرار في السينما الحديثة و ساعده على كده ملامحه الجامدة
من مواليد بني سويف. ليسانس آدلب علم نفس. تزوج من بنت عم الملكة ناريمان ملكة مصر.
من مسلسلاته: عمرو بن العاص, محمد رسول الله و عقبة بن نافع.
و من الأفلام: حنفي الأبهه, ثرثرة فوق النيل, يمهل و لايهمل و كلمة شرف.
على الرغم من انه ظهر في دور ظابط و وكيل نيابة الا انه في الحقيقة أدمن المخدرات.
و اتقبض عليه أكتر من مرة. و توفى في الغردقة بجرعة زايدة من المخدرات أدت لهبوط حاد بالدورة الدموية.
114) دولت أبيض (1896-1978):
دولت أبيضهي صاحبة العصمة و كونتيسة المسرح, هي الجدة في امبراطورية ميم و أم ماجدة في الحقيقة العارية.
شخصية بنت زوات و ارستقراطية , ملكة و أم حازمة دي كانت أدوارها في أفلام مصرية عملتها.
ظهورها في أفلام مصرية كبيرة كان له رونق خاص و يدي للأفلام دي طابع خاص من الوقار.
عزبت ماجدة في المراهقات و نفس الشيء مع لبنى عبد العزيز و أحمد مظهر و عمر الشريف في غرام الاسياد.
دولت حبيب بطرس قصبجي صعيدية الاصل من اسيوط لأم روسية و والدها كان مترجم في الحربية في السودان.
تزوجت من جورج أبيض و أشهرت اسلامها هي و أسرتها سنة 1953. و عملوا سينما هونولولو اللي اتحرقت مع حريق القاهرة.
بدأت مع عزيز عيد و بعده الريحاني و بعده جورج أبيض و منها على منيرة المهدية و استقرت في القومية. و هي أول مصرية تقف على خشبة المسرح.
افلامها: مصنع الزوجات, الوردة البيضا, امبراطورية ميم و اولاد الذوات.
115) علي عبد العال (1910-1975):
علي عبدالعالمن سمناء السينما الثمان ذوي الدم الخفيف. ضحكنا في أفلام مصرية كتير بسببه.
كان يا اما صاحب التياترو أو الخواجه. هو صاحب علي الكسار في سلفني 3 جنيه.
و فيلمه المميز نور الدين و البحارة الثلاثة مع علي الكسار و اسماعيل يس.
كان يملك محل سمك في باب اللوق و تمسك به للآخر خوفا من غدر الايام.
من اعماله اسماعيل يس في البوليس, غرام المليونير, لحن الوفاء, بلبل أفندي و اسماعيل يس في متحف الشمع.
116)نادية عزت (1938-2011):
نادية عزتالجميلة الحاصلة على بكالريوس الفنون الجميلة. زينات مرات خليل البخيل في يوميات ونيس.
اسمها الحقيقي بثينة ابرهيم حجازي.
شاركت في المجانين في نعيم, جبروت امرأة, إنذار بالطاعة (لما كانت بتضرب بنتها ليلى علوي عشان تتجوز الراجل الغني) و بلطية العايمة و معبودة الجماهير (اللي فرقت فيه بين شادية و عبدالحليم) و……
للتليفزيون المال و البنون, سارة, عائلة شلش و هوانم جاردن سيتي.
اتحجبت قبل وفاتها و ظهرت بعدها محجبة في كل أعمالها.
117) محمد الشويحي (1930-1996):
محمد الشويحيابن قرية أويش االحجر (المنصورة). من حفظة القرآن الكريم.
تمتع بخفة الظل و اجادة المواويل بصوت منمق جميل الشيء اللي ظهر بوضوح في أفلام مصرية عملها.
و غنى مع فرقته اللي اسمها الدراويش بنوع من الشعر اسمه الحلمنتيشي.
هو الشيخ طه في المال و البنون اللي من العلامات في الدراما المصرية. و عمل كمان للدراما الزيني بركات, بكيزة و زغلول و علي الزيبق.
من الأفلام: الرجل الذي عطس, سمك لبن تمر هندي, الدنيا على جناح يمامة و الشقة من حق الزوجة.
118) رفيعة الشال (1904-1962):
رفيعة الشالخريجة معهد تمثيل تزوجت من الممثل فرج النحاس (اللي اشهر اعماله كانت اذاعية في عيلة مرزوق) ثم حسن البارودي.
من افلامها بهيه, عنتر بن شداد, المعلمة و شارع الحب.
119) محمد بدوي:
محمد بدويبرعي حاجب المحكمة في شاهد ما شفش حاجة اللي الزعيم قاله “اتكل على الله و اشتغل رقاصة”.
بس هو في الأصل موظف بوزارة الزراعة.
وجه عتاب للنجم عادل امام في اكتر من مرة انه مخدوش معاه تاني في أي عمل فني.
سافر أمريكا فترة كبيرة و معملش خلال الفترة دي أي أفلام مصرية أو أجنبية.
رجع تاني مصر و عمل فيلم المش مهندس حسن بتاع محمد رجب.
120) سميحه توفيق (1928-2010):
سميحة توفيقمن الستات اللي عملوا ادوار اغراء في السينما زمان.
من مواليد الفيوم.
كانت أم بدوي احدى ضحايا ريا و سكينة شادية و سهير البابلي في المسرحية.
من ادوارها المميزة في هجرة الرسول اللي عملت فيه الراقصة اليهودية, نحن لا نزرع الشوك (أم دلال) و بلبل أفندي.