يوم من عمري يوم حلو في خيالنا نفسنا نعيشه حقيقة و واقع
يوم من عمري دي جملة بنقولها كتير أوي بس فعلا لو تخيلناه و عشناه هتبقا حاجة جميلة جدا.
لو عايز فعلا تحس ان يومك يوم حلو مفيش أحلى من انك تصحى تصلي الفجر حاضر.
ابتدي يومك بقراءة سورة الفاتحة و شوية قرآن عشان تحس ان ربنا هيباركلك في يومك.
الصبح:
ممكن بعدها تريح شوية عشان تصحى كده و تفوق و تفطر و تشرب فنجان القهوة بتاع الصبح.
مهم أوي فنجان القهوة بتاع الصبحتلعب شوية رياضة بسيطة في البيت تسخن بيهم كده قبل ما تنزل تجري النص ساعة اليومية بتاعتك.
ترجع بقا تآخد دش و توصل مراتك الشغل و تطمن ان ولادك ركبوا الباص بتاع المدرسة الانترناشونال اللي بيروحوها.
في الشغل:
طبعا تدخل شغلك بابتسامة عريضة عشان يبقا يوم حلو من أوله.
كل زمايلك في الشغل بيصبحوا على بعض بابتسامة جميلة فايقين و رايقين كده و ريحتهم حلوة.
نبتدي شغلنا في هدوء و راحة بال لحد ما ييجي معاد البريك بتاع الضهر.
تقعد تشرب شايك أو النسكافيه بتاعك أمال يعني هنشربهم و احنا شغالين مثلا ولا لا سمح الله نفطر في الشغل.
في البيت:
وبعد ما يخلص يوم العمل الشاق جدا ده تروح بيتك تلاقي مراتك مستنياك على أحر من الجمر و محضره الغدا.
الولاد قاعدين نضاف في هدووووء بيعملوا الهوم وورك بتاعهم في اوضتهم على المكتب طبعا مش على الأرض أو على السفرة جنب الأكل ابدا لا يمكن.
مراتك حبيبتك تقولك ” حمد الله ع السلامة يا بيبي ثواني و يكون الغدا ع السفرة بس وطي صوتك عشان الولاد يركزوا “.
آخر النهار:
المهم اتغديت انت خلاص و نمت شوية حلوين بنوم عميق و طبعا لا يمكن حد يقلقك.
انجز بقا بسرعة عشان معاد التمرين بتاع الولاد في النادي.
بعد ما ترجع الولاد يدخلوا يناموا في هدوء بمجرد ما مامتهم تقول لهم “يلا يا ولاد معاد النوم جه”.
بالليل:
أكتر يوم مراتك بتحبه يوم خروجتك مع أصحابك لدرجة انها هي اللي بتفكرك بيه و لا عمرها بتقولك نص كلمة لو رجعت نص الليل.
يوم القهوة اللي مراتك بتستناهعمرها ما بتزعل ابدا لو اتأخرت لانها عارفه انه حقك انك تغير جو و تبعد عن البيت و العيال و دوشتهم.
ده طبعا اعترافا منها بالجميل لان انت محدد يوم في الاسبوع تخرج فيه معاهم تفسحهم.
بيبقا يوم هادي خالي من العصبية تماما. الولاد مؤدبين جدا و بيسمعو الكلام بشكل غريب و بيتعاملو مع بعض بمنتهى اللطف ولا يمكن يضربو بعض ابدا.
ولو محددين الخروجة عشان تعملو شوبنج بيبقا الطف من كده كتير. لان مراتك الواعية عارفة كويس أوي هي هتشتري ايه و لا يمكن ابدا تورطك في حاجة ملهاش لازمة.
يوم الشوبنج يوم من عمري
وكل اسبوع تقولك هيجرى ايه يعني ده يوم من عمري.
فقرات محببة:
ده غير طبعا ان انت ليك يومين ﭼيم اسبوعيا.
و يوم تاني لازم تروح فيه حمام السباحة.
لان انت لا يمكن تقبل أبد انك تترهل حتى! مش بس يطلعلك كرش.
لا يمكن تسمح ان يطلعلك كرشو لا يمكن تنسى تزور أهلك كل أسبوع وأهو حتى تشوف ولاد اخواتك المؤدبين الهاديين الكتاكيت الصغيرين دول.
ختامها مسك (طبعا الخميس ده بتاعك):
بخلاف بقا اجمل يوم في الاسبوع اللي لازم تروح فيه عند أهل مراتك اللي بيحبوك.
خصوصا حماك اللي بيحترمك جدا جدا.و حماتك اللي بتتمنالك و بتتمنى لامك كل خير.
حماتك بتموت فيكدول بقا لا يمكن تطلع من أي حد فيهم كلمة تحرق دمك أو تجرحك لا قدر الله.
يا سلام بقا لو أصروا انكم تباتوا معاهم يوم الخميس اللي يا أهبل كنت بتقول عليه بتاعك اليوم ده تحديدا بيبقا يوم حلو أوي الصراحة يوم يتقال عليه يوم من عمري.
اترك تعليقاً