الساعة البيولوجية و تأثيرها على الجسم  .. كيف تعيد ظبط ساعتك البيولوجية

ازاي هظبط نومي بعد رمضان …السؤال اللولبي للمرحلة دي كالعادة .وطبعا كلنا بنوووعاني من موضوع النوم بعد رمضان.

وهتلاقي الأخ اللي واقف في الاخر هناك يرد ويقولي …هي محتاجة فكاكة ياضاكتور .هنطبق ومش هنام لمدة يوم وبعدها كله هيبقي تمام اوك …. هو بصراحة أغلبنا ونظرًا للظروف اللي حوالينا بيعمل كدا بس ده له تأثير سلبي طبعا علي يومك اللي هيمر بصعوبة دا غير التوتر واللخبطة ….
خليني ابسط لكم الموضوع شوية بحيث تكون فاهم ولما تيجي تنفذه تكون علي دراية وده بيكون اسهل …

الساعة البيولوجية هى ما يتحكم فى موضوع النوم

المتحكم في موضوع النوم حسب آخر الدراسات هم هرمونين يفرزا من نواة بالمخ ومش مهم تعرفوا اسمها مش عاوزين كلكعة.
الهرمونين هما الميلاتونين والكورتيزون .والنوم بيتأثر بدورة الهرمونين دول في جسمنا علي مدار اليوم والدورة دي اسمها الساعة البيولوجية . طيب نفصص الهرمونين دول بقي ع السريع كدا

الكورتيزون هو هرمون الصحيان والنشاط واللي بيكون في قمة تركيزه من الساعة ٦صباحا وحتي ٩ صباحاوبعدها بيبدأ يقل لغاية مايوصل لأقل تركيز علي الساعة ٤عصرا كدا.

علي الساعة ٦مساء يبدأ هرمون الميلاتونين وهو هرمون النوم بيدأ في التركيز علشان كدا بتحس ان جسمك بدا يهدأ ويسترخي .تركيزه بيعلي من الساعة ١٠ مساء ويستمر الي ٤ صباحا.

كيف تعيد ظبط ساعتك البيولوجية

طيب دلوقتي ازاي بقي اقدر اظبط نومي تاني….

أولا : أهم حاجة تثبت موعد للصحيان حتي لو معرفتش تنام في موعد معين.
ثانيا :  انسي ساعة القيلولة في الفترة الأولي لتظبيط نومك وبعد ماترجع للنوم الطبيعي بتاعك اوك.
ثالثا : هرمون النوم وهو الميلاتونين مهم جدا لتجديد خلايا الجسم وتصفية الذهن وعلشان يشتغل لازم يكون مكان نومك مظلم بدون اضاءة( وياريت تبدأ تقللها بعد الساعة ٨ وتمنعها علي الساعة١٠ علشان تهيأ نفسك للنوم) وكمان بدون ضوضاء وكمان درجة حرارة الغرفة تكون كويسة وكمان بلاش شرب منبهات زي القهوة والشاي بعد الساعة ٣ عصرا لان كل العوامل دي بتأثر علي نشاط هرمون النوم اللي هو الميلاتونين.
رابعا : عدد ساعات النوم الطبيعي من ٥_١٠ ساعات وبتختلف من شخص لآخر وتقريبا ٧ونص هي المثلي، و أفضل وقت للنوم من الساعة ١٠ مساء إلي ٥ و نص صباحا تزيد أو تقل علي حسب طبيعتك.

وسلام بقي علشان اعرف اظبط ساعتي البيولوجية وأنام …