جت في السوستة..قد تكون جملة صادمة لكنه جروب فيس بوك يعرفك معنى الانسانية
perm_identity Mohamed Nabih

query_builder منذ 5 شهور

جت في السوستة جروب فيس بوك يعرفك معنى الانسانية



جت في السوستة ممكن تكون جملة صادمة للي بيقرأها، لكن لو عرفت الحقيقة هتبقى مصدوم برضه لكن رأيك هيختلف جدا.

جت في السوستة ده يا سيدي جروب على الفيس بوك.

الجروب اتعمل قريب مش من زمان. اتعمل تقريبا في شهر ٥ اللي فات.

لكن الجروب دلوقتي من أقوى الجروبات على الفيس بوك.



ازاي اتعمل جت في السوستة:

جت في السوستة

جت في السوستة

بدأت الحكاية ب ان مؤسس الجروب اللي هو محمد چيري كان عنده مشكلة مرضية معينة.

محمد حب يتناقش في الموضوع مع ناس اصحابه.

بس حس ان هيبقا فيها شيء من الحرج انه يتكلم في الموضوع على الملأ.

ففكر چيري انه يعمل جروب سري على الفيس بوك يضم فيه مجموعة من صحابه علشان يعرف يتكلم براحته.

جروب سري على الفيس معناها انشاء جروب خاص بمجموعة من الناس غير مسموح لحد تاني غيرهم انه يشوف البوستات بتاعتهم.

المهم محمد اتفاجيء ان الموضوع بدأ يكبر و الناس اللي بتدخل بدأت تحس بشيء من الراحة و الخصوصية و هما بيتناقشوا مع بعض.

و بعد ما كانت فكرة الجروب بسيطة خالص اصبح جروب كبير له طابع خاص.

على كل لون يا سوستة:

شوف بقا الجروب مبدئيا كده مبيضمش غير الرجالة.

و رجالة هنا قصدي بها طبعا الجنس و الطبع.

بمعني انهم رجالة من حيث التصنيف آه بس الأهم انك تكون راجل في تصرفاتك مش بس ب…….

الجروب بيضم الرجالة من كل الفئات من كبيرهم لصغيرهم.

هتلاقي عندك كل المهن تقريبا المحامي، النقاش، المهندس، صاحب المحل و ……….كل حاجة تقريبا.

هتلاقي عندك الناس اللي دماغها عالية و مبتحملش هم حاجة و الناس اللي تفكيرها عميق اوي.

عايش جوه مصر أو بره مصر مش هتفرق، المهم ان انت راجل و بس.

اقولك على حاجة مش لازم مصريين انا مثلا لمحت بوستات لرجالة من فلسطين، الأردن، سوريا، السعودية، المغرب و السودان على سبيل المثال لا الحصر.

تجربتي مع جت في السوستة:

الحكاية بدأت معايا ان لقيت واحد صاحبي بيقولي انا ضفتك على جروب انما ايه مش هتصدق اللي هتشوفه لما تدخل.

محمد أبوالفتوح صاحبي اللي ضافني بطبيعته مندفع اوي و لو حب حاجة بيحبها بشكل غير طبيعي.

فأنا في الاول قولت اكيد هتبقا حاجة خايبة و ملهاش لازمة زي حاجات كتير كان بيقولي عليها.

محمد ده مثلا منشني قبل كده على مكان بيدرب الناس على ركوب الخيل.

بالذمة ده كلام! ركوب خيل ايه حضرتك ده انا اصلا كنت فاشل في ركوب العجل.

يبقا كنت هصدقه ازاي؟

المهم دخلت الجروب و قعدت اقلب فيه لقيت بقي عمال يتفتح بالتدريج و عيني بتبرق زيادة.

مش مصدق اللي انا شايفه في البوستات!!!!!

هو فيه كده؟ ايه الجدعنة دي! ايه المودة و الحب بين افراد الجروب ده؟

طب ايه الدافع؟ طب بيخدموا بعض ليه؟

الناس دي بيتكلموا مع بعض بمنتهى الراحة كده ازاي؟

الناس دي ميعرفوش بعض اساسا، ده مشافوش بعض من اصله!!!!

انا الى وقتنا هذا لم اعطي اي تعليق على اي بوست في الجروب، مجرد مشاهد فقط.

لكن يمكن يكون ده من تأثير الصدمة بس بصراحة حاسس اني كان لازم اتكلم عنهم.

بيعمل ايه جت في السوستة:

جت في السوسته اصبح جروب مهم جدا لمجموعة كبيرة من الرجالة.

يعني انت مينفعش تعدي يومك من غير ما تدخل تبص على الجروب مهما كنت مشغول.

الى جانب انه جروب مناسب جدا للفضفضة بدون اي كسوف هو اصبح جروب خدمي للمنفعة المتبادلة.

يعني جت في السوستة بيسمح لك انك تعرض شغلك على الجروب و ممكن اي حد ينتفع منك و ينفعك.

عندك اي مشكلة، اي مشكلة اتكلم فيها براحتك هتلاقي الف واحد يرد عليك و يقولك نصيحته او يحكيلك تجربته.

و الجميل فيهم كمان انهم عملوا نظام و أسس معينة للجروب.

جت في السوستة

مبيتكلموش في السياسة اطلاقا. الكلام كله عن مواضيع اجتماعية بحتة.

ده غير ان ممنوع الفتي في الدين و الكورة.

و كمان ممنوع الاباحية الجنسية في تناول موضوعاتهم على الجروب.

جت في السوستة بيان عملي على نقاء النفس البشرية:

الكلام ده مش كلام مبالغ فيه و لا حاجة ده حقيقة و واقع.

هو انا اعرفك علشان اخدمك! طب انا هكسب ايه لو خدمتك؟

الكلام ده مش موجود في قاموس جت في السوستة.

طيب فسرلي كده يعني ايه واحد مثلا ينزل من بلده لبلد تانية ميعرفش فيها بني آدم يلاقي واحد يستضيفه و يساعده في

عارف ليه ؟ علشان سوستجي زيه مش اكتر.

يعني ايه واحد بره مصر اساسا تحصل له مشكلة و السوستجية يساعدوه و يحلوا المشكلة؟

واحد من ذوي الحاجات الخاصة يحتاج حاجة تلاقي الف واحد يساعده.

طيب واحد عنده مشكلة في بيته مع ابوه و لا زوجته يحكيها ليه على الجروب؟

لانه عارف انه بيتكلم وسط اهله برضه كأنه وسط بيته. عارف ان دول سوستجية رجالة.

و الأمثلة من ده كتير جدا في الجروب.

هو ده التراحم في أقوى صوره.

الناس دي واخدين على بعض شيكات مثلا؟ لأ طبعا.

طب ماضيين مع بعض عقد!!! و دي كمان لأ.

الناس دي عملوا كده بكلمة شرف فقط لا غير و استرجلوا بعض مش اكتر.

و هو ده نقاء النفس البشرية اني اخدمك لوجه الله لمجرد انك انسان مش اكتر.

اخدمك لأني حابب اخدمك مش لأني منتظر منك مقابل.

رد فعل السوستجية لو حد غلط:

احنا متفقين ان الجروب للرجالة فقط.

جرب كده الشيطان يوزك و تقل بأصلك مع حد تآخد اسكرينة مثلا و تطلعها بره الجروب.

هتوصل لمرحلة ان الموت اكرملك و تضرب نفسك ب…….

شوف, هيتعمل عليك حفلة و لا اللي اتعملت يوم طهورك.



الخلاصة في جت في السوستة :

في الحقيقة شرف ليا اني انضميت ل جت في السوستة.

انتم فعلا عملتم حاجة جميلة تحمل اسمى معاني الانسانية.

فعلا تستحقوا تعدوا ال ٢٠٠ الف عضو و ان شاء الله توصلوا مليون.جت في السوستة

جروب مبني على الانسانية و نقاء النفس البشرية دون النظر لأي معايير أخرى.

شكرا محمد چيري شكرا جت في السوستة.

Mohamed Nabih مقالات الكاتب

طبيب بشري- بكالريوس الطب و الجراحة (جامعة المنصورة)-ماجستير جراحة العظام (جامعة قناة السويس)

اكتب تعليق