البلكونة و يا عيني على البلكونة
perm_identity ندى حسين

query_builder منذ 3 أسابيع

البلكونة و يا عيني على البلكونة



البلكونة مش مجرد كلمة عادية أو مساحة معينة خارج حدود الشقة، دى عالم تانى لواحدها مفصول بعتبة خشب أبعادها صغيرة موجودة بس عشان تعرفك إنك مجرد ما هتخطيها، إنت خرجت لمكان تانى خالص.

البلكونة و البلكونه

من روائع البلكونة

البلكونة وصلة بيتك مع الشمس و الهواء و الناس و السماء. لو مثلا مزاجك وحش متخانق تعبان زعلان مضغوط أبسط حاجة بتبقى عاوز تبعد وتهرب لمكان هادى، بتفتح باب البلكونة وتخطى خطوة واحدة بس وتقفل بابك وشيشك عليك سواء فى الصبح أو بالليل تاخد نفس كبيييير وتطلع كل همومك فيها على الأرض أو كرسى وترفع رجليك وتفكر من غير أى كلام وتبص حواليك وتبدأ نفسك تهدى مع نسمة هواء معدية أو شمس خفيفة أو صوت لعب أطفال الجيران وفى الشارع، أو تليفون تعمله فى مناخ بلكونى صافى، بعدها ترجع بيتك رايق وهادى ومرتاح.



البلكونة

البلكونة يعنى أطفال ولاد وبنات بتفرش ملاية أو سجادة وترص لعبها وتتقسم وكل واحد ياخد منطقة يلعب فيها براحته ويستمتعوا جواها.
يعنى يوم الجمعة أو يوم أجازة والدنيا هادية وحبيت تعمل زى الباشا أو الهانم وتاخد الفطار فى البلكونة يعنى ترابيزة وكرسيين وأحلى فطارمفتوح وبعدها أحلى كوبايتين شاى وسلامات ترشها على جيرانك أو أى حد تعرفه معدى فى الشارع وتاخد تشميسة دافية صافية.

من روائع البلكونة

برده فى البلكونة تقدرى تروقى على مراتبك ومخداتك وملاياتك وبطاطينك وتصحصحيها فتفرح فرحة كبيرة وتروق عليكى وإنت نايمة، وطبعا هتبقى فى حوارات لذيذة مع الجيران ولقاءات نشيرولم الغسيل.
فيها ممكن تعمل باربيكيومحندق ليه لا؟شوايتك الصغيورة وفحمك وانطلق لحمة وفراخ وسمك كمان.
ممكن تطلع تقف من غير أى أسباب بعد ما خدت نومة حلوة تطل على العالم وغالبا هتشوف تشكيلة من فانلات قوطونيل كت ونص كم واقفه بكل فخر فى البلكونة ولا البشوات.

البلكونة والرومانسية

ارتبطت دايما البلكونة والشباك طبعا بابن الجيران وبنت الجيران فى الأفلام وفى الواقع.أكيد كتيرمروا بالمرحلة الكيوت دى، وبعتلى نظرة وبعتله والحب الصامت سواء طفولة أو مراهقة،وفى ناس ممكن تكون تطورت لمرحلة الجوابات لو البلكونات قريبة شوية ومساعداها .كنتوا هتلاقوا دا فين غير في البلكونه ؟؟؟؟؟؟

البلكونة و الهدوء

فيها هتلاقى تلات بنات قاعدين على الأرض بالليل بيتودودوا فى حديث مليان احلام عاطفية اغلبها وابتسامات خجولة واسرارمحتاجة ضرورى البلكونة.
هى مكان اتنين لسه فى بداية الخطوبة والفضول والتشوق للكلام مع بعضهم وفرصة للتأمل فى الملامح تحت السماء الزرقاء والنجوم اللامعة.
وكمان هى مكان مناسب عشان تسرح بخيالك على أجمل اغانى فيروز وعبد الحليم وكتاب فى إيديك أو رواية أو حتى تسرح وبس فى الملكوت.
هى فسحة راجل مسن او ست عجوزة حركتها بقت خفيفة تماما وكل يومها ومتعتها هى انها تطلع البلكونه وتبص على الناس وتسلم على جيران أو تنادى على ابنها او حفيدها تطلب منه يشترى حاجة وتشوف الشمس والسماء وتحس إنها عايشة ومش عاجزة تماما.

البلكونة والاستثمار

من أهم استثمارات البلكونة طبعا التخزين.بداية من البصل والتوم أشهرسكانها ولحد الأنبوبة الفاضية و جرايد قديمة وخزين إضافى من زيت وسكر وسائل المواعين وأى كراكيب فى الشقة بلكونتنا بتقف وتسد،شيالة طول عمرها.

البلكونة و الاستثمار

يا سلام عليها لما تحولها لحديقة صغننة وتزرع فيها مختلف النباتات أشهرهم الورد البلدى والريحان والفل والياسمين وفى ناس مستواها أعلى وممكن توصل لمرحلة الفاكهة، أكيد مفيش أجمل من بلكونة متزينه بالخضرة والألوان وطالما فى حديقة يبقى ناقص مرجيحة طبعا. لوعندك مساحة كبيرة هتشترى مرجيحة حلوة كده وتتمرجح

البلكونة و المرجيحةالبلكونة و الورود

 

 

 

،طب مفيش فلوس ومفيش مساحة هنرجع لزمان شويه ونعمل اختراع لطيف باستخدام حبل متين يتحمل ومخدة صغيرة حد فاكرها؟؟؟

 

المرجيحة و البلكونة

و أخيرا استثمار حلو جدا وهو قطع الكهرباء ليلا،لما كان النور يقطع عندنا فى البيت وكان فى كشاف وفى شمع وتمام، احنا كنا نحب نطلع كلنا فى البلكونة وناخد الكراسى ونفس كوبايتين الشاى يطلعوا معانا ونتقسم ما بين أب وأم قاعدين على الكراسى وأطفال واقفين بيتفرجوا أو قاعدين على عتبة البلكونه.
الرائع فى المشهد دا إن بيبقى فى ضى خفييييف للسما نازل على المنطقة كلها، وإنك بتبقى سامع أصوات أغلب الجيران كلها فى البلكونات وأحاديث هادية وتبادل احاديث مع بعضهم وضحكات جميلة كنت بحس معاها بألفة جميييلة أوى أوى،

البلكونة و الظلام

وبرده معانا مجموعة الفانلات القوطونيل وممكن نضيف كمان جلابيات حريمى نص كم من غير الخمار أو الطرحة.
أعظم استثمارات البلكونة هى الفراندة واللى كانت قلب وروح المصيف، والبلكون فى المسارح ودور الأوبرا رمز للفخامة، اللى يحجز بلكون بيبقى حد مميز وله مكانه خاصه جدا.

البلكونة و المصيف

تعتبرالبلكونة أيضا موقعك الخاص فى متابعة سينما الشارع فى حالات الأفراح والزفات الجميلة أو الخناقات وأحيانا المطر طبعا بنخرج ونمد ايدينا ونحاول نشرب وندعى.



فى النهاية

البلكونة امتياز لكل مواطن خاصة متوسط أو تحت المتوسط مهما كانت صغيرة أو كبيرة، هى تعتبر التراس اللى بيدينا إحساس الثرايات ونفحة صغننة أوى من حياة البشوات والبرنسيسات.
كل ما تبحثون عنه تجدونه فى البلكووووونة.

البلكونة و الواقع

 

 

 

 

 

 

ندى حسين مقالات الكاتب

صيدلانيه محبه للكتابه ولكل ما يبقى الطفل بداخلنا حيا

تعليق واحد على البلكونة و يا عيني على البلكونة

  1. د. محمد المُر

    09 فبراير

    مقال جميل كالعادة

اكتب تعليق