الجواز التزام باحترام و اخلاص و حب متبادل.. (وجهة نظر شخصية عن شروط نجاح الجواز)
perm_identity د. محمد جاب الله

query_builder منذ 5 شهور

الجواز التزام باحترام و اخلاص و حب متبادل.. (وجهة نظر شخصية عن شروط نجاح الجواز)

محدش يضحك عليكم

عن الجواز  أتحدث
سيداتي آنساتي سادتي..أسعد الله أوقاتكم بكل خير
مفيش كتالوج للجواز…و مفيش كتالوج لشريك حياتك
و محدش يقدر يحلف عالمصحف ايه المناسب و ايه اللي مش مناسب
و بالتالي أحب أقولكم إن بوستات اتجوز اللي كذا و كذا و كذا ..و مش كذا و كذا و كذا…كلها بوستات من وحي خيال الكاتب و لا تمت للواقع بصلة…و غالبا بتعلي سقف الطموحات و تصعب عملية الاختيار….و تخلي الحكاية أشبه بالمستحيل
حضرتك الجواز بيبقى بين شخصين عندهم التزام واضح بإنجاح الحياة الزوجية و تقبل الآخر
سواء بقى جوازات عن حب و لا صالونات و لا صلاة تراويح….في الآخر بتقلب بجوازة
جوازة ليها متطلبات و مسئوليات



الجواز
مفيش ملايكة نختار منها…..كلنا فينا عيوب….و قدرتك على تحمل عيوب الطرف الآخر تتناسب طرديا مع قدرة الطرف الآخر على تحمل عيوبك
في عيوب لو شفتوها من بدري…اوعوا تحاولوا تقتنعوا انها هتروح مع الوقت….العيوب بشكل كبير بتزيد مع الوقت….إياكم و الغيرة المفرطة…إياكم و العين الزايغة…..إياكم و الأنانية….إياكم و البخل……إياكم و الكذب و الخيانة (الباقي متروك لخيال القارئ و تفضيلاته)
والله لو في حاجات تم اكتشافها فيما بعد…يبقى قضاء الله و قدره
و مفيش حاجة اسمها فولة و اتقسمت نصين و لا بتفكروا زي بعض و لا اهتماماتكوا زي بعض….قدرتكم على استيعاب متطلبات و رغبات و أفكار بعض هي الشئ الوحيد القادر على جعل الزواج ناجح و سعيد
مش هتصبح تلاقي اللي بتفهمك بالتخاطر و بمجرد النظر….إذا كان إنت يا مؤمن قعدت ما لا يقل عن خماشر سنة علشان تفهم أبوك و أمك اللي جيناتك منهم و واكل شارب نايم عندهم…و طبعا أختك لسة متفهملهاش سكة لغاية دلوقتي
يبقى عاوز تقنعني إن إنسان أو إنسانة غريبة عنكم بعون الله حيبقوا متفاهمين معاكم طبق الأصل بعد شهر خطوبة أو سنة جواز؟؟
لااااا…حضراتكم التفاهم ده بيجي بعد فترة زمنية تزيد و تنقص وفقا لمجهود الطرفين في التأقلم و التعود….و كل حاجة بتاخد وقت بدءا من نبرة الصوت و معرفة المزاج العام و الوقت المناسب للنكتة و الهزار…مرورا بأدق خصوصيات العلاقة الزوجية…و انتهاءا بمقادير الأكل و كمية السكر في الشاي و درجة تحمير البطاطس و الباتنجان

الجواز
حضرتك بعد أول شهر من الجواز مش فاهمين بعض…عادي خالص لسة قدامكم العمر طويل بعون الله
حضرتك مش عارف ايه اللي بيضحكها؟؟…..جرب كل حاجة و اللي يضحكها أكتر حاجة اعمله
معاليكي مش عارفة بيصحى مكشر ليه؟؟؟ سيبيه خالص لغاية لما يفوق و بعدين كلميه
خلاصة أي جوازة مهما كانت طريقة تكوينها….هو التزام كامل بين الطرفين بإنجاح هذه الزيجة و المرور بها في كافة محطات الحياة السعيدة و الحزينة و الصعبة
الجواز التزام باحترام و اخلاص و حب متبادل…التزام بمجهود غير محدود و عطاء غير مشروط بإسعاد الطرف الآخر و الحفاظ عليه
نجاحكم في علاقاتكم الزوجية أولا بتوفيق الله ثم بمجهودكم…غير كده….انسوا

د. محمد جاب الله مقالات الكاتب

استشارى الطب الشرعى و السموم

اكتب تعليق