برج الحوت – دينا الشربيني – شيرين رضا يا بخت اللي يغنيله الهضبه عمرو دياب



زادت شعبية برج الحوت جدا في الفترة الأخيرة بعد ما غنی له الهضبة عمرو دياب في ألبومه الجديد “ معدي الناس “.

مواليد برج الحوت دلوقت ماشيين في الشارع مفيش حد عارف يكلمهم و حاسين انهم جنس أعلى شوية من غيرهم.

يعني لو أنت ميزان مثلا زي حالاتي و حاولت تكلم حد برج الحوت ممكن يبصلك من فوق لتحت و ميردش عليك.

بيتهيألي الموضوع ده لو استمر شوية كمان أكتر من كده ممكن شهرته تعدي أغنية ديسباسيتو اللي شافها أكتر من ثلث سكان الكوكب.

و بما إن برج الحوت هو آخر برج في مجموعة الأبراج الفلكية فأعتقد إن في ناس أساسا مكنتش تعرف إن فيه برج اسمه الحوت.



ايه حكاية برج الحوت مع عمرو دياب:

الحكاية و ما فيها إن الهضبه قرر يغني في ألبومه الأخير أغنية للشاعر الكبير تركي آل شيخ باسم ” أجمل عيون “.

إلى جانب أغنية كمان من تأليف نفس الشاعر بعنوان أحلى حاجة.

بس العيون كلها كانت على أغنية ” أجمل عيون ” اللي لحنها الملحن عمرو مصطفى بعد فترة إنقطاع للتعاون مع الهضبه.

الأغنية في كوبليه فيها بيقول ” والله لأحبك موت و أحب برج الحوت “.

بالصدفة كده كان في إشاعة إن في علاقة بين الهضبه عمرو دياب و الممثلة الشابة دينا الشربيني.

و بالصدفة كمان دينا الشربيني مواليد برج الحوت.

و من هنا اتقال ان عمرو دياب غنى لحبيبته الجديدة دينا الشربيني.

كلمات أغنية أجمل عيون:

يا أجمل عيون و أحلى عيون صحيتي ليل العاشقين

صحيتي الشوق من غير ميعاد و سافرتي ليه أخر البلاد

والله لأحبك موت و أحب برج الحوت

و أعشق تفاصيلك ضحك و بكى و سكوت

لأنك الدنيا و اللي يفوت يفوت

يا اللي عيونك بحر و ليل و نهار

ليها سحر فيها قلبي داب و احتار

يا صوت نبرته حياه حبيته و عشقت صداه

أنا ليكي يا اللي انتي صوتك عذب و ملائكي

همسات صوتك ضحكتك تروي عطش روحي

نظرة عيونك ملهمه و انتي دوا جروحي

اقرأ أيضا  صفات الأبراج .. كل برج له شخصية مميزة

والله لأحبك موت و أحب برج الحوت

و أعشق تفاصيلك ضحك و بكى و سكوت

لأنك الدنيا واللي يفوت يفوت

مين هي دينا الشربيني؟

طبعا الهضبه أكيد احنا عارفين عنه كل حاجه تاريخ طويل من النجاحات المستمرة.

لكن دينا الشربيني ممكن يكون ناس كتير مكنتش تعرف عنها حاجة أو متعرفهاش من الأساس.

هي ممثلة شابة مواليد القاهرة سنة 1985. خريجة إعلام 6 أكتوبر.

بداية تعارف الناس بيها كان من برنامج شبابيك على قناة دريم سنة 2006.

من الأفلام اللي شاركت فيها دينا الشربيني جواب إعتقال, سمير أبو النيل, كدبة كل يوم, الحفلة و هروب اضطراري.

أما عن المسلسلات: حكايات بنات, جراند أوتيل و عشم إبليس.

و شاركت أحمد مكي البطولة في مسلسل رمضان الأخير ” خلصانه بشياكه “.

نتعرف كمان على برج الحوت:

بما إن برج الحوت هو المشكلة الأساسية في الموضوع فلازم نعرف شوية حاجات عنه و عن مواليده.

برج الحوت هو آخر الأبراج عامة من 19 فبراير إلى 20 مارس.

يتميز مواليد برج الحوت بالآتي:

انهم خياليين جدا و بيحبوا الخيال أوي.

غالبا شخصية مشرقة ربيعية الطبع.

شخص حنين يميل للهدوء في التفكير.

حساس مبيحبش يقول لحد لأ.

المرأة و الرجل و برج الحوت:

بالنسبة للمرأة فهي بتكون ذكية و لا تقبل بالخداع, انفعالية و مندفعة.

مبتحبش الشهره لكن بتحب الراجل بتاعها يبقى مشهور و بتحاول تساعده في ده طول الوقت.

بتحب الابهار و لفت الأنظار, من عشاق الرومانسية, و الأنوثه ليها عنوان.

و أعتقد الحاجات دي ماشية مع دينا الشربيني بشكل كبير.

أما عن رجل الحوت فهو إنسان خجول و طيب, حدسه قوي لكن شخص مبذر.

شخص فضولي لكن فضوله كويس مش مؤذي, بيحب المفاجآت و كثير الأحلام.

بيبعد دايما عن العنف و ده بيبان حتى في تربيته لأولاده.

رومانسي لكن خواف بمعنى مبيقولش لحد إنه بيحبه غير بعد ما يتأكد إنه بيبادله نفس الشعور.

مشاهير برج الحوت:

 على المستوى العالمي من أشهر مواليد برج الحوت الرئيس الأمريكي الأسبق جورج واشنطن.

العالم الفيزيائي المشهور أينشتين, الممثلة الأمريكية ساندي كراوفورد و اليزابيث تايلور و المخترع الألماني جتنبرج.

و كذلك الوسيط الروحاني إدجار سايس و الممثل بروس ويليس.

اقرأ أيضا  حميد الشاعرى .. 20 معلومة عن حميد الشاعرى ، من دارس للطيران إلى مفجر ثورة الموسيقى

أما على الصعيد العربي الفنان محمد عبدالوهاب موسيقار الأجيال, صابر الرباعي, شيرين عبد الوهاب و حنان ترك.

و كمان محمد صبحي, أحمد السقا, هيفاء وهبي, أحلام و يسرا.

حفلة عمرو دياب الأخيرة:

زاد الموضوع سخونة كمان بعد حفلة عمرو دياب الأخيرة في جولف بورتو مارينا في الساحل الشمالي “ربنا يوعدنا بزيارته”.

و الحفلة دي هي الأولى بعد طرح الألبوم و بالتالي كان الإقبال عليها مبالغ فيه.

بدأ عمرو دياب الحفلة بأغنية قمرين و بالتدريج دخل في الألبوم الجديد و عاد و زاد في أغانيه و كررها أكتر من مرة.

و تكرار الهضبة لأغاني الألبوم الجديد ضايق بعض الناس خاصة حبيبة الأغاني القديمة.

و إن كان ده حق مشروع لعمرو دياب للإعلان عن ألبومه جديد في أول حفلة بعد نزول الألبوم.

و طبعا الهضبة عمرو دياب تصرف بذكاء كما عهدناه دايما و مفوتش الفرصة.

و تطرق لقصة برج الحوت و اتكلم عن انه من الأساس لا يؤمن بفكرة الأبراج (و مع ذلك غناها حوالي 5 مرات).

و علشان يبعد التفكير ده عن دماغ الناس غنى لبرج الدلو و الميزان.

بس الأمر ميسلمش من النقد فبعض الحضور انتقد كمان معاملة البودي جاردات في الحفلة و كثرة حالات الإغماء.

ده غير انتقادهم ساعتها ل عمرو دياب لما قال ” شيلو الميتين اللي تحت “.

و كمان في ناس قالت إنه اتكلم مع الناس أكتر ما غنى.

و بالرغم من كل ده الألبوم تصدر قائمة الألبومات الأكثر مبيعا في الشرق الأوسط كالعادة.

الصيف ده في الساحل سموه صيف الهضبه خاصة إنه هيعمل حفلة تانية في مراسي.

ردود الأفعال كانت كتير و مختلفة:

أحد أهم ردود الأفعال كان رد الملحن عمرو مصطفى لأنه شهادته نفت الموضوع من الأساس.

لأنه قال إن الأغنية كانت موجهه من الأساس لزوجته هو شخصيا و شريكة مشواره اللي هي مواليد برج الحوت هي كمان.

دينا الشربيني هي كمان مفوتتش الفرصة و نزلت على الصفحة الخاصة بها سؤال عن رأي الجمهور في ألبوم عمرو دياب الجديد.

و كانت ردود فعل المتابعين كبيرة جدا وصلت لأكتر من 6000 رد.

أما عن الفنانة شيرين رضا اللي سبق لها و تزوجت من عمرو دياب و هي أم بنته نور فكان ردها منسق و هاديء.

اقرأ أيضا  معدي الناس .. ألبوم عمرو دياب الجديد .. نصر جديد بعد مغادرة روتانا

ردت و قالت ان حكايتها مع الهضبة إنتهت من أكتر من 20 سنة و إنها دلوقت مجرد مستمعه جيدة لعمرو و بس.

بس الأكيد إنها عندها معلومات محبتش تقولها و خاصة ان بنتها نور كانت مع الهضبه و دينا في أحد الرحلات.

الغريب إن المقارنة بعد الإشاعة كانت بين شيرين رضا (اللي الحقيقة من أجمل جميلات الفن) و دينا الشربيني.

و ده على الرغم من إنتهاء علاقتهم ببعض من زمان و تناسى الناس أنه متزوج من زينه عاشور و أنجب منها باقي أولاده.

بس طبعا كان من نصيبها إشاعة إنه تم الإنفصال بينهم خلاص, الأمر اللي اتنفى بعدها و إشاعة إن أغنية نغمة الحرمان موجهه لها.

كمان نفت عائلة الشربيني حدوث زواج بين عمرو دياب و دينا بالرغم من ظهورهم مع بعض في أكتر من مناسبة.

و كانت أهم المناسبات رحلة أسبانيا مع رجل الأعمال المصري أبو هشيمه.

كمان كان في ظهور لدينا الشربيني في حفلة عمرو دياب الأخيرة بلبس قريب جدا في الشبه مع لبس الهضبه.

مش أول مرة لعمرو دياب:

دي مش المرة الأولى اللي يغني فيها عمرو دياب لحد بيحبه.

من زمان خالص و غنى عمرو دياب لشيرين رضا أغنية متخافيش و أغنية عيني منك.

و ظهرت معاه شيرين في الكليب ده.

و اغنية نور العين لبنته نور الكبيرة. و كمان أغنية قمرين لما ربنا رزقه بتوأم.

و كمان أغنية يا كنزي و كل ما ليه لبنته كنزي.

بس الله أعلم المره دي هو غناها لمين؟



من المستفيد؟

في الحقيقة كل الأطراف استفادت.

بداية من الجمهور اللي لقى مادة حلوة للنقاش و الهري على مواقع التواصل الاجتماعي.

و طبعا دينا الشربيني اللي الناس بدأت تدور عليها و تعرف مين هي دينا الشربيني.

و شيرين رضا كمان الناس رجعت تفتكرها بقوة بعد الموضوع ده.

كمان الهضبة عمرو دياب الضجة الي حصلت صاحبها إقبال كبير على الحفلة و الألبوم.

و أكبر المستفيدين كان برج الحوت و مواليده اللي بدأوا يحسوا بإنهم برج مختلف عن الآخرين.


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *