ديسباسيتو ( Despacito ) – طفرات أغاني أسبانية – أغنية تعمل لدولة تاريخ
perm_identity Mohamed Nabih

query_builder منذ 5 شهور

ديسباسيتو (Despacito ) – طفرات أغاني أسبانية – أغنية تعمل لدولة تاريخ



ديسباسيتو كلمة طبعا مكنتش أعرف معناها ايه و لا حتى أعرف هي بأي لغة.

لكن في الفترة الأخيرة لقينا ناس كتير بترددها و احنا طبعا نبرق و نقتح بقنا و مش فاهمين الناس دي بتقول ايه.

نيانا و ديسباسيتو:

بدأت القصة بأني لقيت فيديو منتشر على مواقع التواصل الاجتماعي لبنت في حدود 13-14 سنة ملامحها شرق آسيوية بترقص في أماكن كتير.

البنت فلبينية و اسمها نيانا جوريرو و بتحب أغنية جدا لدرجة انها أول ما بتشتغل البنت بتبتدي ترقص لاإراديا.

الأغنية دي هي ديسباسيتو و باباها مصورها في كل حته و هي بترقص على ديسباسيتو و هي بتآكل و هي في الشارع و هي بتركب العربية و في كل حته.



ديسباسيتو و بورتوريكو:

الأغنية أسبانية بس اللي بيغنيها من إقليم بورتوريكو و اسمه لويس فونسي و معاه مغني راب اسمه دادي يانكي.

الأغنية دي خلت الناس تدور أساسا على دولة بورتوريكو عشان يعرفو عنها معلومات.

طبعا انت بتسمع كلمة بورتوريكو في نص الأغنية.

الشيء اللي أدى في النهاية لانعاش اقتصاد بورتوريكو بشكل مكنوش يحلموا به خاصة بعد ما كان الاقليم على وشك الافلاس.

و كان ردة الفعل المفاجأة ان السياحة زادت في بورتوريكو بنسبة تتجاوز 45 % و لأول مرة في التاريخ أغنية تنقذ اقتصاد دولة.

هو ايه اقليم بورتوريكو:

بورتوريكو كلمة أسبانية معناها بالعربي الميناء الغني. عاصمتها هي مدينة سان خوان.

بيقال ان اللي اكتشفه أحد الرحالة اللي كان مع كريستوفر كولومبوس و سابه في محاولة منه لاكتشاف العالم الجديد.

سكانها الأصليين من الهنود الحمر و لكن طبعا دول حاليا جزء بسيط جدا من الاقليم.

خاصة بعد قدوم الأسبان للاقليم و استقدامهم للأفارقة عشان يشتغلوا هناك.

تقع بورتوريكو في شمال البحر الكاريبي شرق جمهورية الدومينكان.

الاقليم تابع للولايات المتحدة الأمريكية حتى الآن بالرغم انه مش مسموحلهم الادلاء بأصواتهم في الانتخابات الأمريكية لانها لا تعتبر ولاية أمريكية.

ملهومش عملة خاصة و بيتعاملوا بالدولار الأمريكي حتى الآن.

مناخها استوائي  لكن جوها جميل لانها عبارة عن مجموعة جزر في البحر.

مين هو لويس فونسي؟

من مواليد سان خوان-بورتوريكو 15 إبريل سنة 1978. كان هو الابن الاكبر لأبوه و أمه. له أخ تاني مغني هو كمان.

اسمه الحقيقي لويس ألفونسو رودريجيز سيبيرو.ديسباسيتو

اتنقل لأورلاندو- فلوريدا-الولايات المتحدة الأمريكية مع أسرته و هو صغير.

من صغره و هو كان بيحب الموسيقى و بدأ دراستها من هو صغير.

مثل في بعض الأفلام المكسيكية.

لويس كان حبيب مخلص. ارتبط زمان بمقدمة برامج في شبكة univision التليفزيونية اسمها أداماري لوبيز.

في سنة 2006 أصيبت أداماري بالسرطان و هو مسبهاش و راح معاها في كل مكان و مرضاش يتخلى عنها.

و لكن رغم كل ده و بعد ما اتجوزوا رسمي سابته و انفصلوا عن بعض.

و بعدها عرف عارضة أزياء اسمها أجويدا لوبيز و ارتبطوا لمدة 3 سنين و اتجوزوا بعده و معاهم طفلة.

حصل فونسي على بعض الجوايز المهمة في حياته على رأسها الجرامي اللاتينية.

طيب مين هو دادي يانكي؟

الاسم الأصلي رياموند أيالا. من مواليد بورتوريكو 3 فبراير 1977.

مغني راب أصلا.كان له ألبوم حقق شهرة جامده اسمه باريو فينو.

بيسموه في الوسط هناك الكانغري (El Cangri) بمعنى الأنيق.

حصل هو كمان على بعض الجوايز و مثل في بعض الأفلام.

نجاح ديسباسيتو:

ديسباسيتو طلعت كلمة أسبانية معناها ببطء بالعامية كده بالراحة يعني.

أغنية ديسباسيتو مش معمولة من زمان, دي ظهرت للنور في بداية 2017 في شهر يناير اللي فات.

ديسباسيتو حققت حتى الآن 2 مليار و نص مشاهدة و ده لاقم قياسي جديد بالنسبة للأغاني الأسبانية يعني حوالي تلت سكان الأرض.

و قياسا على تاريخ اصدارها ده رقم ضخم جدا بالنسبة لعدد المشاهدات في الفترة القليلة دي.

طبعا مننساش أغنية مكارينا اللي غناها لوس ديل الريو عدى عليها أكتر من 20 سنة و احنا مش واخدين بالنا.

بس ديسباسيتو تخططت حاجز نجاح مكارينا. و قريب جدا هتعدي جانجنام ستايل الأغنية الكورية الجنوبية اللي حققت ما يقرب من 3 مليار مشاهدة.

دخلت ديسباسيتو قائمة بيلبورد هوت لأفضل 100 أغنية لمدة 10 أسابيع.

من أبرز مظاهر نجاح ديسباسيتو ان المغني الكندي جاستن بيبر عملها ريميكس و غناها بالانجليزي.

صناع ديسباسيتو:ديسباسيتو

كتب كلماتها المؤلفة البنمية إيريكا إيدير.

ساعدها في ده لويس و يانكي نفسهم.

أخرج الكليب المخرج كارلوس بيريز الحاصل على جايزة المخرج المبدع.

بطلة الكليب هي ملكة جمال الكون سنة 2006 زيليخة ريفيرا.

أحد أسرار نجاح الأغنية تحويل الكلمة لمقاطع زي (ديس با سي تو ).ديسباسيتو

و ده اللي قاله بحث علماء نفس أمريكان ان المتلقي بيستوعب الكلمة أكتر لما تبقا متقطعة.

احنا و ديسباسيتو:

شهرة كبيرة حققتها ديسباسيتو في جميع أنحاء العالم و منهم طبعا مصر و الوطن العربي.

و يشهد على كده الكليب اللي عملته الموهبة الفلسطينية نويل خرمان و استخدمت في ديسباسيتو.

لدرجة اني بقيت متخيل ان كلمة ديسباسيتو هتدخل اللغة العربية و احنا مش حاسين زي كلمات كتير أجنبية اقتحمت اللغة العربية.

يعني مثلا ممكن تلاقي واحد صاحبك بيعمل أي حاجة بعنف تلاقي نفسك من غير ما تقصد بتقول له ديسباسيتو ديسباسيتو.ديسباسيتو

لو اتفرجت عليها فعلا هتحس انك مبسوط بشكل لا ارادي بالرغم من انك طبعا مش فاهم حاجة.

بس مثلا هتلاقي في النص كلمتين قريبين أوي للعربي و هو بيقول باسيتو باسيتو و كأنه بيقول بسيطه بسيطه و معرفش معناها ايه بالعربي.



هل فيه نقد لديسباسيتو ؟

لولا اختلاف الأذواق لبارت السلع. القاعدة دي حقيقية مفيش كلام.

لان بعض الناس هاجمت الأغنية بشراسة نتيجة الايحاءات الجنسية الكتير اللي في الكليب.ديسباسيتو

بس أصلا  ايقاع الأغنية اسمه Perro و ترجمة الكلمة دي للعربي تعني كلب و نوعية الموسيقى هي الريجاتون Regaeton.

و ده بيتطلب نوع معين من الرقص اللي ممكن يكون مش مناسب لناس كتير.

يعني نرجع و نقول مش كل الناس حبت ديسباسيتو.

احكم بنفسك و شاهد الأغنية من خلال هذا الرابط .

Mohamed Nabih مقالات الكاتب

طبيب بشري- بكالريوس الطب و الجراحة (جامعة المنصورة)-ماجستير جراحة العظام (جامعة قناة السويس)

اكتب تعليق