أكثر 10 لاعبين لم يحصلوا على تقديرهم الكافى بسبب تواجدهم فى عصر سوبر ستار فى مركزهم.

فى أشخاص محظوظين بتواجدهم فى المكان المناسب فى الوقت المناسب , و لكن فى أشخاص برضه كانوا غير محظوظين بتواجدهم فى المكان غير المناسب أو الوقت غير المناسب , الموضوع ده بينطبق على كل حاجة فى الحياة و أكيد منها كرةالقدم ونجومها خاصة من كانو يستحقو أن يصبحو سوبر ستار.

فى المقاله دى هنحاول نتكلم عن أشهر لاعبين كانوا من الممكن أن يحصلوا على قدر أعلى من الشهرة لو كانوا تواجدوا فى زمن ثانى , و لكن شهرتهم قلت بسبب تواجد لاعب سوبر ستار فى نفس مركزهم , او فى مركز ثانى مقارب , و اللاعب النجم خد الشهرة و النجومية كلها على حساب اللاعب ده , على الرغم من الجودة المتقاربة بينهم.

مايكون / دانى ألفيس

مايكون ظهير أيمن منتخب البرازيل , و على الرغم من مشواره الطويل على مستوى الأندية ( لعب فى كروزيرو و موناكو و إنتر و السيتى و روما ) , أو المنتخبات حيث أنه لعب مع منتخب البرازيل 76 مباره دوليه ,  و سجل  فيها 7 أهداف إلا انه عاش افضل فتراته مع الإنتر فى ظل ظهير أيمن اليوفينتوس الحالى و برشلونه و إشبيليه السابق دانى ألفيس سوبر ستار , اللى قدر ياخد منه مكانه الأساسى فى المنتخب , و يخفيه بشكل تدريجى لدرجه انه اتنسى تماماً , و ده صاحبه انخفاض فى مستوى مايكون فى اخر فتراته مع الإنتر , ثم السيتى و روما , ليصبح اسمه منسى , رغم انه كان ممكن يتذكر ضمن الأفضل فى تاريخ البرازيل.

جيوفانى إيلبر / رونالدو الظاهرة

أحد نجوم فتره بدايه الألفيه , بدأ رحلته الإحترافية مع نادى الميلان فى عمر 18 سنه , و بعد فترات استقر بيه المطاف إنه يوقع مع نادى بايرن ميونخ , ليبدأ أفضل فتراته الكرويه حيث لعب مع البايرن 169 مباراه سجل فيها 92 هدف , حقق فيها القاب كتير زى الدورى الألمانى 4 مرات , و دورى الأبطال , و كأس الإنتركونتنتال فى 2001 . و رغم فترات التألق دى إلا إنه لم يلعب مع منتخب البرازيل سوى 15 مباراه دوليه فقط , سجل فيها 7 أهداف , و عاش تقريبا فترات تألقه كلها فى ظل سوبر ستار البرازيل رونالدو.

بول سكولز / ستيفان جيرارد / فرانك لامبارد

كتير من مدربى و محللى كره القدم بيعتبروا إن سكولز من أفضل لاعبى خط الوسط فى الفتره اللى لعب فيها , بل البعض قد يكون بيصنفه ضمن الأفضل فى مركزه فى التاريخ , لكن التقدير ده موصلش للجمهور , اللاعب اللى لعب حوالى 499 مباراه مع مانشستر يونايتد فى الفتره من 1993 حتى  2013 , عاصر فيها كل إنجازات اليونايتد الكبرى تحت قياده السير ألكس , كان فى الظل مع اليونايتد لفترات طويله على الرغم من مستوياته لصالح النجم صاحب الهاله الإعلاميه الرهيبه و الكاريزما الفائقه ديفيد بيكهام , أما المنتخب مكنش حظه أفضل بتواجد جيرارد و لامبارد فى خط وسط منتخب إنجلترا , شخصيه اللاعب الهادئه و قله ظهوره الإعلامى كان ليهم عامل كبير برضه فى الموضوع ده.

تولدو / بوفون

عند ذكر أفضل الحراس فى التاريخ من الصعب انك تنسى إسم بوفون , و بالتأكيد هتنسى إسم تولدو , الحارس اللى ارتبط اسمه بفيورنتينا و الإنتر فى فتره التسعينات و العقد الأول من القرن الحالى , الفتره دى كانت ايطاليا مليئه بالحراس العظام , المخضرم باليوكا , بيروزى , و الصاعد ابياتى , و لكن الإسم الأكبر و الموهبه الأكبر كانت من نصيب سوبر ستار بوفون , تولدو كان محظوظ قبل يورو 2000 لأن بوفون كان قد أصيب بكسر فى اليد و ده خلاه بقى الحارس الأساسى للمنتخب الإيطالى فى البطوله دى , و رغم تألقه و احتفاظه بنظافه شباكه فى 3 مبارايات فى البطولة , و صده لضربة جزاء حاسمه أمام منتخب هولندا فى نص النهائى , إلا انه خسر النهائى اما فرنسا بنتيجه 2/1 , تولدو خسر مركزه ثانى لصالح بوفون فى النص الثانى من تصفيات كأس العالم 2002 , و من يومها و بوفون مسيطر سيطره كامله على حراسه عرين المنتخب الإيطالى , لحد ما اعتزل تولدو دوليا فى 2004 , و عدد مشاركاته الدولية لم تتخطى ال 28 مباراه على الرغم من امكانياته الكبيره اللى كانت ممكن تخليه حارس إيطاليا الأول لفترات طويلة.

توتى / ديل بيرو

من الصعب تعرف من اللى كان مظلوم اكتر , و لكن بحسبه البطولات , و عدد المبارايات الدوليه لكل منهم و الإعتراف العالمى هتعرف إن الاتنين ظلموا بعض , توتى أكتر بنسبه قليله ممكن , لأن فتره التوهج الكروى بتاعته قضى فتره كبيره فيها كبديل سوبر فى منتخب ايطاليا , و ده اللى خلى مشاركاته تقتصر على 58  مباراه دوليه فقط  , كان بديل فى الكثير منها , و سجل فيها 9 أهداف فقط , ديل بيرو فى المقابل لعب 91 مباراه دوليه سجل فيها 27 هدف , عدم قدره أى مدرب على وضع خطه تناسب الإثنين معاً و عدم قدرتهم على الإنسجام الكروى داخل الملعب مع بعض كان عامل اضافى فى ظلمهم لبعض . و لكن وفاء الاثنين لأنديتهم و بقائهم فيها رغم الإغراءات خلاهم أيقونات للوفاء فى عالم كره القدم و الإثنين بصراحه اتميزوا فيه , ديل بيرو كمل مع اليوفى حتى فى دورى الدرجه الثانيه , و توتى رفض عروض من ريال مدريد و بايرن و انديه كبيره كتير , و أمضى مسيرته الإحترافية كاملة فى نادى واحد هو روما.

فابريجاس / تشافى / انيستا

فابريجاس فى فتره من الفترات كان كابتن آرسنال , و كان صاحب افضل أرقام فى صناعه اللعب فى العالم , و رغم كل ده مكنش بيقدر يدخل التشكيله الأساسيه لمنتخب اسبانيا , و عند انتقاله لبرشلونه صاحب هذا الأمر انخفاض فى المستوى و لم يتمكن ايضاً من حجز مكانه كأساسى فى منتخب اسبانيا , و على الرغم من انه لعب مع منتخب أسبانيا 110 مباراه دوليه و كانت له مساهمات مؤثره , الا ان دور كبديل كان أكبر , حيث انك لو حسبت عدد دقائق لعبه ستجد إن الوقت الفعلى اللى لعبه كان 72 مباراه فقط مع منتخب اسبانيا  . فابريجاس فى فتره تألقه مع الأرسنال كان يقدم مستويات تؤهله لدخول التشكيله الأساسيه لمنتخب اسبانيا فى أى عصر أخر غير عصر تشافى و انيستا.

فرانكو باريزى / جايتانو شيريا

باريزى الكثير بيتعبروه من أعظم المدافعين فى تاريخ إيطاليا و العالم و كان ممكن يعتبروه الأفضل على الإطلاق , بس تألق شيريا فى فتره صعود باريزى حرمته من حاجات كتير زى زياده مباراياته الدوليه او الحصول على كأس العالم , شيريا كان أحد افراد جيل منتخب إيطاليا الذهبى سنه 1982 , و باريزى كان ضمن القائمه و لكن فشل فى الدخول فى التشكيل الأساسى فى أى مباراه , فى مونديال 1986 لم يتم إستدعائه من الأساس , و برضه صاحب المكان الأساسى كان شيريا , فترات تألق باريزى مع منتخب إيطاليا لم تبدأ ألا بعد اعتزال شيريا دوليا سنه 1986 بعد المونديال , و من هنا بدأت فتره تألق كبيره مع الميلان ( ملعبش لأى نادى تانى فى تاريخه زى اسطوره الميلان مالدينى ) , فى مونديال 90 على الرغم من تألقه الا انهم خسروا قصاد الأرجنتين و فشلوا فى تحقيق اللقب , و فى مونديال 94 اصيب و سابق الزمن عشان يلعب النهائى و رجع فى 25 يوم , عشان يواجه هجوم منتخب البرازيل الرهيب فى الوقت ده بقياده روماريو و بيبتو , و يحافظوا على نظافه شباكهم و لكن فى النهايه و بعد الوصول لضربات الترجيح يضيع ضربه الترجيح اللى نفذها , و يخسر نهائى البطوله الأكبر فى العالم .

الكثير بيقولوا ان باريزى كان ممكن يصنف كأفضل مدافع فى تاريخ ايطاليا لو انه لم يعاصر شيريا فى فتره صعوده , على أى حال الإتنين بلا جدال يعتبروا من أحسن مدافعى ايطاليا على مدار التاريخ.

مورينتس / راؤول

راؤول فتى أسبانيا الذهبى .. سوبر ستار .. فتى أسبانيا المدلل زى ما كان معظم المتابعيين بيسموه , معشوق الجماهير الإسبانيه , فى الوقت نفسه كان بيشكل عقده للاعب ثانى هو فرناندو مورينتس , الإثنين كانوا فتره صعودهم واحده , و أعمارهم متقاربه , و لعبوا حتى لفريق واحد هو ريال مدريد , و ده كله كان بمثابه لعنه لمورينتس , اللى كان بيمثل دور البديل السوبر فى ريال مدريد و بالتالى منتخب أسبانيا لصالح راؤول , موريتنس مكنش مهاجم ضعيف , بس مقدرش يحجز مكان أساسى فى ظل راؤول , و اضطر لمغادره الفريق مع بدء عصر الجلاكتيكوس مع ريال مدريد , لبقدم أفضل مستوياته مع موناكو لما وصلوا لنهائى دورى أبطال أوروبا بعد ما نجحوا فى عمل ريمونتادا قدام فريقه الأصلى ريال مدريد اللى كان معار منه لموناكو و يخسروا النهائى لصالح بورتو مورينهو , فى النهايه لعب مورينتس لفرق كتير بعد فترته مع الريال , منها قدم مستويات مقبوله و منها قدم مستويات دون المستوى , و لكن محدش يقدر ينسى إن فتره صعود مورينتس و أفضل مستوى قدمه ضاع سواء فى ريال مدريد أو منتخب أسبانيا فى ظل راؤول جونزاليس.

.

هاسلبانك / كلوفيرت / بيركامب

هاسلبانك المهاجم الهولندى اللى لعب لأندية كبيرة و كان مشهور بطريقه احتفاله و غزاره اهدافه , المهاجم اللى لعب أفضل فتراته مع أتيليتكو مدريد و تشلسى فى الفتره بين 1998 و 2004 , كان مظلوم جداً لانه تواجد فى جيل فيه نجم برشلونه باتريك كلوفيرت , و نجم آرسنال سوبر ستار دينيس بيركامب , هولندا اصلا كان عندها تخمه فى المهاجمين الرائعيين فى الفتره دى , لو القيت نظره على قائمه منتخب هولندا فى الفتره دى هتلاقى ان بالاضافه للاسمين الكبيرين دول و هاسلبانك كان فيه نجم فينورد فان هيدونك اللى كان مشهور بضرباته الثابته و قوته البدنيه الكبيره و روى مكاى و المنافسه كانت شديده جداً على مجرد الدخول فى قائمه الفريق , كل ده خلى مشاركات هاسلبانك مع منتخب هولندا تقتصر على 23 مباراه , سجل فيها 9 أهداف فقط و كان بديل فى كثير منها ليعيش أفضل ايامه فى ظل الثنائى بيركامب كلوفيرت.

ريدوندو / سيدورف / مكاليلى

لو سألت متابعى الكره عن أفضل المحاور الدفاعيه فى التاريخ هتلاقى اسماء معينه بتكرر , مكاليلى اكيد من ضمنها الى جانب سيدورف و فييرا و اسماء تانيه كتير , و لكن ريدوندو اللى كان مشهور بقدرته على اللعب الدفاعى فى بلد لا تعرف الدفاع زى الأرجنتين , الى جانب قدرته على صناعه اللعب مع العمق اللى اتميز فيها جداً , ريدوندو برضه ملعبش كتير مع منتخب الأرجنتين بسبب قرارته الغريبه , يعنى رفضه دخول قائمه منتخب الأرجنتين فى سنه 90 بعد إستدعائه و برر ده بإنه مش فاضى بسبب دراسته الجامعيه , و بعد كده قال ان السبب الحقيقى إنه مكنش واثق من دخول التشكيله الأساسيه , بعد كده لعب فى 1994 , بعد كده رفض يلعب تحت قياده باساريلا كمدير فنى لمنتخب الأرجنتين لانه منع الشعر الطويل و الحلق و أى من مظاهر عدم الإنضباط فى رأيه فى المنتخب , و ده بسبب رفضه حلاقه شعره , و بعدها انتقم منه باساريلا باستبعاده من قائمه منتخب الأرجنتين فى 1998 . فى ريال مدريد كان سيدورف اللى لعب معاه لحوالى 3 مواسم واخد شهره اكبر , و ظهور مكاليلى و رغبه الريال فى ضمه فى 2000 , أنهت على مشواره الكبير مع الريال , ليتم نسيانه كثيرا بسبب الإتنين دول رغم طريقه لعبه المميزه و جماهير الريال اللى كانت رافضه لخروجه من الفريق.