أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الرابعة



غير ان في ممثلين منعرفهومش أو بمعنى أصح منعرفش أسمائهم في كمان أفلام مصرية منعرفش عنها حاجة.

ده كان بسبب عدم التسجيل خاصة في بدايات عصر السينما نظرا لقلة الامكانيات.

و في كمان أفلام مصرية كتير اتعملت في لبنان أثناء فترة الركود الفني.

و نرجع نكمل حكاوينا………

61) محمد كامل (1916-1983):

محمد كامل

“عثمان” أشهر سفرجي في السينما اللي نفتكرله دور مرجان في قلبي دليلي.

و ده نوبي آخر أثرى السينما المصرية بكتير من الروائع.

بدايته مع نجيب الريحاني في فيلم سلامة في خير.

و كمل مسيرته بافلام جميلة تانية منها آمال و قام فيه بدور كبريت , فاطمة, الزوجة السابعة, غرام و انتقام.

له منولوج مشهور اسمه رنجي رنجي من الحان سيد درويش. كان نسيب رئيس تركيا السابق “محمود بايار” .



62) فاطمة مصطفى:

فاطمة مصطفى

و مين ينسى الدادة عزيزة في صغيرة على الحب.

و أم سعاد حسني في الزواج على الطريقة الحديثة.

و تالت أم سعاد حسني في فيلم شيء من العذاب.

و هي معملتش غير الثلاث أفلام دول و كلهم مع سعاد حسني.

63) محمد التابعي (1907-1964):

محمد التابعي

من مواليد بورسعيد. اسمه الحقيقي محمد محمود أبو شرابه من أسرة بتشتغل في تجارة الجلود.

والده كان معترض جدا على التمثيل و لما عرف أخده في عز البرد وعاقبه بدش ماء بارد.

له حوالي 20 فيلم.

من أشهر أدواره عبدالرحيم كبير الرحيمية اللي كان بيقول “تروح فين يا عبدالرحيم تتصرف كيف يا عبدالرحيم”.

من افلامه كدبة ابريل, المليونير و خد الجميل. توفي نتيجة جلطة بالمخ عام 1964.

64) سهير رضا:

سهير رضا

مواليد 1911. هي العجوز المتصابية مدام فنطاس في أرض النفاق و مرات مدير البنك في عفريت مراتي.

تلاقيها كمان في خائفة من شيء ما, أفواه و أرانب, الأرض و الستات ميعرفوش يكدبوا.

65) أحمد فرحات:

أحمد فرحات

الطفل اللمض الشقي في معبودة الجماهير و سر طاقية الاخفاء.

من مواليد 1950. تخرج من المعهد العالي الصناعي.

و اشتغل مهندس اتصالات برئاسة الجمهورية.

له تاريخ فني كبير و افلام مميزة: اسماعيل يس في السجن, نهر الحب, شارع الحب و اشاعة حب.

66) انجيل آرام (1946-2011):

أنجيل آرام

الممثلة البدينة اللي كان دمها زي الشربات تفتكرها على طول بدورها مسلسل الأطفال مع ايمان الطوخي كوي كاك.

انجيل آرام رابزيان أرمينية الأصل و التحقت بمعهد السينما. لها تاريخ فني طويل.

ابنها هو الشيف الشهير أيمن عفيفي.

التليفزيون بالذات عملت فيه أدوار كتير منها: ساكن قصادي, غاضبون و غاضبات, هو و هي و الأبطال.

المسرح كمان كان له نصيب كبير في أعمالها مليونير بالعافية, بندق بيه, حمري جمري و فندق المجانين و الزعيم.

أما عن السينما فحدث و لا حرج:

نسمه طبعا في العميل رقم 13, شعبان تحت الصفر, الاتحاد النسائي, البيضة و الحجر, كراكون في الشارع, الوردة الحمرا و دموع صاحبة الجلالة.

اقرأ أيضا  أفلام مصرية بين كومبارسات منسية و أدوار تانية و ثانوية أو بطولات مخفية-الحلقة التاسعة

67) محمد الديب (1908-1979):

محمد الديب

واحد من أساطير الشر في السينما المصرية بشنبه الرفيع المميز و خفة ظله اللي كانت حاضرة معاه حتى في أدوار الشرو العصابات.

محمد حسن الديب. اسم الشهرة المعجباني.

تزوج من الفنانة جمالات زايد. بدأ زي ناس كتير أوي في فرقة الريحاني.

من افلامه: حسن و مرقص و كوهين, الأستاذة فاطمة و أكاذيب حواء.

له مسرحيات تعتبر من أفضل الاعمال المسرحية القديمة: 30 يوم في السجن و إلا خمسة.

68) كيتي (1927-1980):

كيتي

كان لها غمزة عين مميزة أوي و هي بترقص.

كيتي فوتساتي, يونانية الأصل من مواليد اسكندرية. من المحتمل انها كانت يهودية الديانة.

تدور حولها الشبهات بانها اشتغلت جاسوسة.

و يقال انها كانت على علاقة برأفت الهجان و المعلومة دي اتنفت من أكتر من مصدر.

هاجرت و سابت مصر فجأة بعد التحقيق مع الياس مؤدب و اتهامه هو كمان بالجاسوسية.

و انقطع أي اشتراك لها في أفلام مصرية. تزوجت لفترة من المخرج حسن الصيفي.

من أفلامها: اسماعيل يس في مستثفى المجانين, اديني عقلك, من أين لك هذا و ابن زوات.

69) صلاح نظمي (1918-1991):

صلاح نظمي

من نوعية الشرير خفيف الظل الوقور قوي الشخصية في كلامه يبان قوته.

حلاوة العنتبلي في على باب الوزير من أدواره اللي متتنساش.

من مواليد أسكندرية و اشتغل مهندس في التليفونات.

تزوج من أرمينية أشهرت اسلامها لتتزوجه و مرضت فيما بعد و طلبت منه الزواج بأخرى لكنه عارض بشدة.

له قصة مشهورة مع عبدالحليم حافظ.

ان العندليب لما اتسأل عن أرخم ممثل في مصر قال “صلاح نظمي” و رفع عليه قضية.

و لما حليم عرف راح له بيته و صالحه و اداله دور في أبي فوق الشجرة و قاله “ايه ده يا صلاح ده انت رخم فعلا”.

من أفلامه: الافوكاتو, عصابة حماده و توتو و الرجل الثاني

70) زينات علوي (1930-1988):

زينات علوي

راقصة مصرية اسكندرانية بنت بلد و جدعة بشهادة كل اللي اتعاملو معاها.

تزوجت من صحفي اسمه محب مانع صاحب مجلة أخبار النجوم.

من أسماء الشهرة بتاعتها زينات قلب الاسد. و هي من أشهر الراقصات اللي ظهروا في أفلام مصرية.

لانها كانت معروفة بالانضباط و الالتزام في شغلها و كمان أطلقوا عليها لقب راقصة الهوانم.

من مواقف الجدعنه بتاعتها انها راحت لكامل الشناوي بعد فصله من عمله.

و هددت انها هترمي نفسها من البلاكونه لو مخدش منها فلوس و اللي حكى الحكاية دي الكاتب الكبير أنيس منصور.

موقف تاني لها ان رشدي أباظه حاول يوقعها في حبه لكنها منعت نفسها من ده وفاء لصديقتها سامية جمال.

لو تفتكر كانوا دايما بيقدموها في الافلام بنفس الطريق و ييجي واحد يقول “و الآن مع الراقصة زينات علوي”.

اتعرفت أوي برقصتها بالعصاية. من أعمالها ريا و سكينة, نهارك سعيد, اسماعيل يس في الاسطول, العقل و المال.

اقرأ أيضا  أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الثالثة

و الدور المميز في الزوجة 13 اللي رقصت فيه على أغنية كنت فين يا علي.

لكن مع كل ده من نجوميه و شهرة و جدعنة ماتت راقصة الهوانم وحيدة و فضلت ثلاثة أيام دون أن يعلم أحد.

71) نظيم شعراوي (1921-2010):

نظيم شعراوي

القاضي بتاع مسرحية شاهد ما شفش حاجة بصوته الأجش و هو بينادي على سرحان عبدالبصير.

من مواليد اسكندرية. تخرج من المعهد العالي للتمثيل.

له دور جميل جدا في الواد محروس بتاع الوزير.

وكمان في طيور الظلام, ليلة بكى فيها القمر, ربع دستة أشرار و العتبة الخضرا و غيره و غيره.

و زي كتير من الفنانين نهايته كانت حزينه لانه أصيب بضعف شديد في الذاكرة نتيجة ضمور في المخ الشيء اللي ألزمه كمان انه يقعد على كرسي متحرك.

72) احسان القلعاوي (1932-2008):

احسان القلعاوي

هي عزيزة في عائلة مرزوق بتاع الاذاعة.

شقيقة الفنان محمود القلعاوي زوجة محمد أبو يوسف كاتب السيناريو.

هي أم الدكاترة كما يلقبها البعض. خريجة آداب فرنساوي.

من أفلامها السمان و الخريف, المرأة و الساطور و ليلة سقوط بغداد.

أما عن المسلسلات هتلاقي من الذي لا يحب فاطمة, أين قلبي و قضية نسب.

73) محمد عتريس (1945-2008):

محمد عتريس

من أكثر الملامح قساوة اللي ظهر على الشاشة.

عمل دور الصول كتير أوي و  هي دي فعلا مهنته الحقيقية.

من مواليد فاقوس (الشرقية).

اشتغل في مسلسل ميزو مع سمير غانم و كمان في هند و الدكتور نعمان, فارس بلا جواد.

و عمل كمان ليالي الحلمية, أنا و انت و بابا في المشمش,البشاير,ذئاب الجبل, دموع في عيون وقحة, البحار مندي و ساكن قصادي.

في المسرح: أخويا هايص و أنا لايص و أنا و النظام و هواك.

من أفلامه: غريب في بيتي, اتنين على الطريق,أيام السادات,الدنيا على جناح يمامة, الحقونا, أرض الخوف, اقتل مراتي و سوق المتعة.

له أكتر من 170 عمل فني.

74) رجوات منصور:

رجوات منصور

اشتهرت بتأدية أدوار البنت اللي مش حلوة.

منعرفش عنها كتير و عملت أفلام مصرية بس مش كتير.

من مواليد 1914. تفتكرلها طبعا سوسو خطيبة اسماعيل يس في فيلم ليلة الدخلة.

من أفلامها اسماعيل يس طرزان, قمر 14 و تحيا الرجالة.

75) حسن حسين (1935-2005):

حسن حسين

التخين أبو دم خفيف. من أجمل أدواره كان في فيلم عفريت مراتي مع شادية و صلاح ذو الفقار.

خريج طب بيطري و اشتغل بمهنته قبل اقتحامه عالم التمثيل. من مواليد القاهرة. له حوالي 54 فيلم.

من أفلامه الجميلة: البطل, امرأة فوق القمة, مهمة في تل أبيب,كابوريا, كتيبة الاعدام و وداعا بونابرت.

مسلسلاته زي: البراري و الحامول و يوميات ونيس

76) ليلى فهمي ( 1938-2003):

ليلى فهمي

هاتلي واحد محبش ليلى فهمي, استحالة. خفة دم لا تقاوم.

فاكرها في احترس من الخط مع عادل امام و لبلبة. طب فاكرها في المسرحية العظيمة هاللو شلبي.

من مواليد المنصورة و حصلت عل بكالريوس فنون مسرحية.

اقرأ أيضا  أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الثانية

بصراحة أنا بعتبرها من عمالقة الكوميديا في الفن المصري.

اسمها الحقيقي ثناء محمود عبدالله و ليلى فهمي الاسم الفني. لها أكتر من 170 فيلم و مسلسل.

من أدوارها العملاقة فيلم حسن و نعيمة, ليلة القبض على فاطمة مع فاتن حمامة و كمان فتوة الناس الغلابة..

ده غير واحدة بواحدة و كمان عملت مسلسلات كبيرة زي ليالي الحلمية و يوميات ونيس.

77) سيد سليمان (1901-1981):

سيد سليمان

نوبي آخر لمع في سماء الفن. ظهر بشخصية السفرجي في أفلام مصرية كتير.

عارف لما تقول على حد من أيام السينما الصامته ده واحد منهم  اللي ظهر في فيلم اسمه البحر بيضحك ليه اخراج ستيفان روستي.

كان منولوجست كبير.

“حا يا نحيل الخصر حا” ده كان مطلع المنولوج اللي اسمه الحمار اللي يعتبر من أشهر منولوجاته.

هو عم آدم في مسرحية إلا خمسة بتاعة ماري منيب “انت جاية اشتغلي ايه” فاكرها؟

سيد سليمان هو سبب انشاء الرقابة متخيل ليه؟ في أحد منولوجاته عن معاكسة الستات كان لابس لبس مش منسق بالنسبة للناس.

“الشيخ جونسون” كان اسم المنولوج” و كان لابس عمة و جبة على قميص و بنطلون اعتبره الازهر استخفاف به و قدموا بلاغ ضده و بعدها اتفرضت الرقابة.

كغيره من فنانين زمان اشتغل مع الكسار و بديعة و الريحاني.

78) رجاء أمين:

رجاء أمين

هي جمالات في المتزوجون لو عايز تفتكرها. كانت متزوجة من العميد سميح شفيق.

من أفلامها الوان السما السابعة, حكايتي مع الزمان و ديل السمكة.

اشتركت في قمم المسلسلات زيزينيا, أميرة في عابدين,قاسم أمين, قضية رأي عام و المرسى و البحار.

79) الياس مؤدب (1916-1952):

الياس مؤدب

“معلوف” كان صاحب دم خفيف و وزن تقيل و شفناه كتير مع سمعه اسماعيل يس في حوالي 12 فيلم.

ايليا مؤدب ساسون كان عايش في حارة اليهود لاب شامي و أم من الغربية.

كان يهودي الجنسية. من اكتشاف بشارة واكيم.

اتهموه بالجاسوسية لصالح اسرائيل و لما أفرجوا عنه خد بعضه وسافر الشام و في رواية تانية بتقول انه فضل في مصر لحد وفاته.

قايمة أفلام مصرية كتير زي: الستات عفاريت, عنبر(ده اللي غنى فيه في منولوج اللي يقدر على قلبي).

و كمان منديل الحلو, فلفل, حلال عليك و بيت النتاش دي كلها من روائعه.



80) ماجدة حمادة:

ماجدة حماده

ليالي الحلمية, الشهد و الدموع, رأفت الهجان, ضمير أبله حكمت, يوميات ونيسو زينب و العرش أسماء كبيرة جدا في الدراما المصرية.

كل دول مسلسلات شاركت فيهم ماجدة و ده شيء يحلم به أي فنان.

هي مثلا عليه الزوجة التانية المغلوب على أمرها مرات سليم البدري في ليالي الحلمية.

هي الاخت الصغرى لليلى حمادة. خريجة آداب لغات شرقية. و بدأت هي كمان مع بابا شارو و ماما سميحة.

سابت الفن فترة و قعدت في ايطاليا و بعدها رجعت مصر و رجعت للفن تاني.


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *