أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الثامنة




أفلام مصرية ما بين أدوار خير و أدوار شر قام بها الممثلين.

يا ترى هل كل فنان في حياته زي السينما؟

يعني هل الشرير في السينما بيكون شرير في الحياه؟

هل الأخيار في أفلام مصرية طيبين في الحياة؟

تعالى نكمل…

141) عبدالعزيز خليل (1887-1969) :

عبدالعزيز خليل

من أباطرة الشر في السينما تبريقته كانت تخوف فعلا و كمان كان من المعلمين التقال.

اشتغل في فرقة جورج أبيض. و هو أول نقيب للمثلين. عرف عنه قوة الشخصية.

سي عمر, لاشين, خاتم سليمان و باب الحديد دول كانوا أهم أفلام مصرية عملها.



142) عليه الجباس (1943-2002):

عليه الجباس

أشهر أدوارها على الاطلق هو السبعاوية في لياليي الحلمية. تحس انها ست بيت  كده و هي قاعدة.

بورسعيدية المنشأ. أنشأت فرقة الجمارك المسرحية. و قبلها كانت موظفة في الجمارك.

من اعمالها للتليفزيون: حديث الصباح و المساء، هوانم جاردن سيتي، نحن لا نزرع الشوك، ضد التيار و أرابيسك.

أما عن السينما: يا مهلبيه يا، امرأة فوق القمة، هستريا و امرأة فوق القمة……

143) عبد الله فرغلي (1928-2010):

عبدالله فرغلي

الكوميديان الطيب أبو قلب أبيض اللي تحبه أول ما تشوفه سواء كان في فيلم و لا مسرحية و لا مسلسل.

الاستاذ ملواني بتاع مدرسة المشاغبين و حبيب أمينة رزق في انها حقا عائلة محترمة.

أنا و أنت و بابا في المشمش, حكايات زوج معاصر, يا رجال العالم اتحدوا و المسلسل الاذاعي حكايات مرزوق دول جزء بسيط من مسلسلاته.

أفلام مصرية : ناصر 56, سا عزيزي كلنا لصوص, الشقة من حق الزوجة, أونكل زيزو حبيبي و أظرض النفاق.

هاللو شلبي كانت من أروع أعماله المسرحية و اشترك كمان في شاهد مشفش حاجة و سيدتي الجميلة.

144) عليه عبدالمنعم (1929-1994):

عليه عبدالمنعم

أم طيبة، تربوية، ست مريضة، ست كبيرة سنا دي غالبا كان الدور اللي بتظهر به على الشاشة.

و حتة تربوية دي حقيقة لانها كانت مدرسة موسيقى.

مواليد الحلمية و بدأت كمعدة برامج موسيقية بالتليفزيون.

من اعمالها السينمائية: بيت القاصرات، قهوة المواردي،  عدو المرأة، احنا بتوع الاتوبيس و الشيطان امرأة.

145) أبو الفتوح عمارة (1928-1998):

أبوالفتوح عماره

مواليد الدقهلية و تخرج من المعهد العالي للفنون.

كان طيب أوي في كل أدواره. بواب, فلاح, سواق و سفرجي المهم يكون دور بسيط بس كان بيعجب الناس.

أفلام مصرية :ناصر 56, ليه يا دنيا, ثلاثة على الطريق و المواطن مصري.

مسلسلاته: البخيل و أنا, ونيس, الابطال و الحاوي و ليالي الحلمية و كمان رافت الهجان.

اقرأ أيضا  أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الرابعة

146) ناهد سمير (1920-1996):

ناهد سمير

طيبة طيبات السينما المصرية. هي عنايات محمد محمود جمعه الام الطيبة اللي بتحب ولادها و مغلوبة على أمرها.

بداية و نهاية، ابي فوق الشجرة، بين السما و الارض، دنيا عبدالجبار و حارة برجوان و كتير من الكلاسيكيات اللي شاركت فيها.

147) صالح العويل:

صالح العويل

اسمه مش من شكله خالص ده بالعكس ده كان دايما بلطجي و كان قوي

البنيان و دايما بيضرب في الافلام.

شرقاوي جدع مواليد 46. شوفت له مثلا: الشيطانة التي أحبتني, حسن اللول, عصابة حماده و توتو, العميل رقم 13 و الراقصة و السياسي.

و في التليفزيون: عفاريت السيالة, عايزة اتجوز, المصراوية و عصابة بابا و ماما.

148) زينب صدقي (1895-1993):

زينب صدقي

هي ميرفت عثمان صدقي.

ظهرت في الافلام تركية احيانا و الحقيقة هي تركية الاصل فعلا مش تمثيل.

لم تتزوج الا مرة واحدة لمدة 6 شهور و لم تنجب و تبنت طفلة يتيمة.

و مع كل ده برعت في دور الام الطيبة الحنينة.

من اعمالها: اسكندرية ليه، صغيرة على الحب، ليلة غرام و ست البيت.

149) عزت المشد (1934-2002):

عزت المشد

شخصية مجتمع مرموقة غالبا في ادواره.

اشترك في فارس بلا جواد, أوان الورد, أم كلثوم, ترويض الشرسة و يوميات و نيس و…….

أفلام مصرية كتير جدا: اللعب مع الكبار, الهروب, امرأة تحت المراقبة و الامبراطورة.

150)أمينة زهني:

أمينة ذهني

منعرفش عنها حاجة غير اسمها و انها كانت حماة الريحاني في سلامة في خير.

و لا نعرفلها أفلام مصرية تانية أو غيره.

151) عبد العظيم عبد الحق (1906-1993):

عبدالعظيم عبدالحق

و لا عمري كنت أعرف انه ملحن و انه عمل الحان حاجات زي:

تحت الشجر يا وهيبه (تأليف الأبنودي و غناء محمد رشدي), رايداك و النبي رايداك و وحده ما يغلبها غلاب رائعة محمد قنديل.

و موسيقى مسلسلات الضحية, الساقية وهارب من الايام و يعتبر هو أول من أدخل المقدمة الغنائية.

من مواليد المنيا أخوه كان وزير الاوقاف و التاني وزير المواصلات و ده الشيء اللي صعب عليه الامور في البداية بسبب معارضة اسرته.

و دخل المعهد العالي للموسيقى المسرحية و اتخرج منه و بدا يكمل مشواره الفني.

و على المستوى الوظيفي مان وصل لمدير عام الهوايات و الموسيقى بوزارة الشئون الاجتماعية.

و كانت القشة التي قسمت ظهر البعير لما الاذاعة رفضتله أحد الالحان عن انتصار اكتوبر و ده كان صعب عليه جدا فاعتزل التلحين.

عمل مسلسلات مهمة زي ناعسة, الشهد و الدموع, عادات و تقاليد, ليالي الحلمية و كمان شارك في فيلم الرسالة بدور النجاشي ملك الحبشة.

اقرأ أيضا  أفلام مصرية بين كومبارسات منسية و أدوار تانية و ثانوية أو بطولات مخفية-الحلقة السابعة

“حاجات كتير هترخص و تبقى بسعر التراب أنا و أنت و الأستاذ و حضراتكم أجمعين” من أشهر الجمل اللي بيفتكرها له الناس في فيلم الارهاب و الكباب.

152) زينب وهبي:

زينب وهبي

حريصة في مسلسل يوميات ونيس.

هي زوجة المخرج الراحل حماده عبدالوهاب الذي توفي عام 1986.

من الركائز الاساسية لفرقة محمد صبحي و عملت معاه وجهة نظر و ماما أمريكا.

و عملت مسلسلات: أنا و هؤلاء،  حكايات هو و هي، الزوجة الثانية و الأيام.

و عملت أفلام مصرية منها: امرأة آيلة للسقوط، السفارة في العمارة و نهر الخوف.

153) فؤاد شفيق (1899-1964):

فؤاد شفيق

“خبي وشك وشك بيلبش جتتي” الراجل الكبير اللي كان ممؤمن بتحضير الارواح .

كان دايما بيقول الكلمة دي لابنه عبد المنعم ابراهيم اثناء جلسة التحضير في فيلم أم رتيبة.

محمد فؤاد شفيق من مواليد السيدة زينب كان أخو الفنان حسين رياض (الاسم الحقيقي لحسين رياض هو حسين محمود شفيق).

بدأ حياته الوظيفية في السودان و اتجوز هناك و رجع بعدها مصر.و اشتغل مع جورج أبيض و يوسف وهبي.

و عمل مع يوسف بك وهبي فيلم قوي جدا ميتنساش هو سفير جهنم و قام فيه العميد بدور الشيطان و أستاذنا كان الانسان اللي بيغويه هو و أسرته.

عمل مسرحيات كبيرة زي ألف ليلة و ليلة و سكة السلامة.

أفلام مصرية: انا طبعي كده, خد الجميل, بحبوح افندي, غرام الاسياد و سلامة.

154) امام الصفطاوي (1923-2003):

إمام الصفطاوي

من مواليد بولاق.كان بيشتغل موظف في السكة الحديد. كمان كان حارس مرمى النادي الأهلي.

كتب أغاني أفلام مصرية زي “يا مغرمين” للعندليب, “على عش الهوى المجروح” لنجاة و أغاني فيلم قمر 14.

عمل دور أبو جهل في فيلم الشيماء و عمل كمان فيلم قليل من الحب كثير من العنف و الواد محروس .

عمل في بعض المسلسلات مثل هارون الرشيد, إمام الدعاة, يوميات ونيس و ساكن قصادي.

155) سليمان نجيب (1892-1955):

سليمان نجيب

هو أول رئيس مصري لدار الأوبرا و قنصل مصر في اسطنبول. بك ابن بشوات. خاله كان أحمد زيور باشا رئيس وزراء مصر السابق.

خريج كلية الحقوق رفض فكرة الزواج مطلقا. صديق الزعيم مصطفى كامل.

من أفلام مصرية عملها: ورد الغرام, غزل ابنات, لعبة الست, الآنسة حنفي و ناديه.

156) عدلي كاسب (1918-1978):

عدلي كاسب

جوز كريمة أخت سميحة في صغيرة على الحب مع سعاد حسني و رشدي أباظة و أبو جهل في هجرة الرسول..

اقرأ أيضا  أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الثانية

معلم ممكن, باشا جايز, كوميدي أستاذ و شرير عادي كل حاجة يعرف يعملها.

مواليد مصر القديمة القاهرة و خريج المعهد العالي للتمثيل. بطل في رفع الاثقال. في الاصل مهندس خريج فنون تطبيقية.

ظهر في أحلام الفتى الطائر مع عادل امام

من افلامه: الكرنك, آدم و النساء, هجرة الرسول, عائلة زيزي, رد قلبي و الاسطى حسن.

157) محمد الشرقاوي (1954-1996):

محمد الشرقاوي

اكتشاف جلال الشرقاوي و غير اسمه من محمد اسماعيل رشوان لمحمد الشرقاوي لعترافا بالجميل.

من مواليد الشرقية. أصيب بسكتة قلبية أدت لوفاته في صالون منزله. اشترك في عمو فؤاد و بوجي و طمطم (في دور زقلط).

الافوكاتو, الفلاحين أهم, الصعايدة جم, المعلمة سماح و لولاكي  من أشهر أفلامه.

المسرحيات اللي اشترك فيه راقصة قطاع عام مع يحيي الفخراني, قصة الحي الغربي, عفوا زوجتي العزيزة و سوق الحلاوة

المسلسلات: ساكن قصادي, يحكى أن, ليالي الحلمية و على باب الوزير

158) محيي الدين عبدالمحسن (1940-2012):

محيي الدين عبدالمحسن

هو عبده الكرف في فيلم الكيف. و هو رزين السينما زي ما سموه.

من العياط جيزة, خريج آداب عربي. توفى بتليف في الكبد.

مسلسلاته منها: الزناتي مجاهد, أكتوبر الآخر, المصراوية, قضية رأي عام و جمهورية زفتى.

افلامه منها: الجزيرة, إمرأة هزت عرش مصر, التوت و النبوت, العار و وش اجرام.

من مسرحياته: الصعايدة وصلو, عطيل, هاملت و دلع الهوانم.

159) محمود الحفناوي (1955-2014):

محمود الحفناوي

أصوله من المنوفية. بدأ في فترة السبعينات. و كان عند لدغة خفيفة في حرف الراء مميزة جدا لطريقة كلامه.

من مسلسلاته الروائع رأفت الهجان, العصيان, السقوط في بئر سبع, المراغي و عباس الأبيض.

من المسرحيات جحا يحكم الدينة و واحد لمون و التاني مجنون.

من الافلام: اللعب على المكشوف, لصوص خمس نجوم و الى من يهمه الامر.

توفى بأزمة قلبية بعد ما عمل عدة عمليات بالقلب.



160) شعبان حسين (1940-2013):

شعبان حسين

“تلاته” هي أشهر كلمات فنانا الجميل في مسلسل يوميات ونيس اللي فيه لنا زكريات جميلة معاه.

بكالريوس زراعة و كمان فنون مسرحية.

الشيخ الكفيف في وجهة نظر, جوز الست في تخاريف و السواق في سكة السلامة ده غير لعبة الست لما عمل بلالايكا, وكمان يوميات ونيس مسرحية و ماما أمريكا. و كل ده كان مع صبحي.

و في المسلسلات تاني مع صبحي زي فارس بلا جواد, يوميات ونيس و خد عندك كمان شيخ العرب همام, شربات لوز و الملك فاروق……

من افلامه المشهورة الطائرة المفقودة, جواز بقرار جمهوري, العميل رقم 13 و إعدام ميت.


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *