أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الثانية
perm_identity Mohamed Nabih

query_builder منذ 5 شهور

أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الثانية



هنتناول في الحلقة دي مجموعة من الممثلين اللي عملو أفلام مصرية متقلش في أهميتها عن المجموعة الأولى.

كل واحد فيهم كان له بصمة و شكل معين. هما دوا اللي عملو فعلا أفلام مصرية لها تاريخ.

21) سعيد أبو بكر (1913-1971):

سعيد أبو بكر- أفلام مصرية

سعيد أبو بكر

شيبوب هو أشهر أدواره في فيلم عنتر بن شداد. في أفلام مصرية اتحفرت في التاريخ ده واحد منهم.

من مواليد الغربية. حصل على البكالوريا. و اشتغل في السويس أمين مخازن لمدة 3 سنين.

دخل معهد المسرح سنة 1945. أخرج عدة مسرحيات زي الناس اللي فوق.

عمل بطولة واحدة مطلقة في فيلم السبع أفندي. خطب الفنانة ماجدة لفترة قصيرة.

من أفلامه أيضا اسماعيل يس للبيع, شياطين الجو, الاستاذة فاطمة و ليلى بنت الأغنياء.

22)سامية رشدي (1916-1974):

سامية رشدي

سامية رشدي

أمينة عبدالعزيز الدسوقي هو اسمها الحقيقي. كانت دايما الحماه الشديدة أو الأم اللي بتخاف على بنتها بطريقة متعجبش البنت.

بدأت كمغنية و عملت أوبريت شهرزاد. و تزوجت الممثل علي رشدي.

من أعمالها سر طاقية الاخفاء, ألمظ و عبده الحامولي, هنا القاهرة و رائعة نجيب محفوظ بداية و نهاية.

23) عبدالسلام محمد (1934-1992):

عبد السلام محمد

عبد السلام محمد

صاحب أشهر اعلان توعية في التاريخ المصري بتاع البلهارسيا مع الفنان القدير محمد رضا.

خريج المعهد العالي للفنون المسرحية. و اختاره كرم مطاوع لدور في مسرحية الفرافير بتاعة يوسف ادريس.

جسمه الصغير خلى الشخصية الضعيفة الغلبانة هي الشخصية اللي دايما كان بيقوم بيها في أي أفلام مصرية عملها.

حتى لما طلع حرامي مثلا في احترس من الخط كان ضعيف و غلبان.

من أعماله في التليفزيون الوسية و علي الزيبق. و في السينما الحرام و زمن حاتم زهران.

24) احسان شريف (1921-1985):

احسان شريف

احسان شريف

بهيجة بنت سلطح بابا مرات يوسف وهبي في اشاعة حب اللي كانت الضحكة فيه بتطلع من القلب في كل موقف يجمعهم ببعض.

اتخرجت من مدرسة حلوان الثانوية و اشتغلت مع زكي طليمات في الفرقة القومية.

و كانت قعدت حوالي 6 سنين من غير شغل و بعدها رجعت تاني في فيلم بين قلبين.

أدت دور الراهبة بامتياز في الناصر صلاح الدين.

و ليها مسلسل تليفزيوني رائع مع عزت العلايلي اسمه العنكبوت مسلسل كله إثارة و رعب الحقيقة.

ده غير طبعا الداية في البوسطجي و كتير كتير و كانت آخر أدوارها فيلم شهد الملكة.

25) عبد العظيم كامل (1918-2008):

عبد العظيم كامل

عبد العظيم كامل

طبعا ده كان نموزج الطبيب المصري في السينما زمان.

و ظهر قليل في أدوار تانية بس برضه كان عليها القيمة زي الصحفي, الظابط و المحامي.

اشتغل في الحكومة أولا و سابها و رجعلها تاني بعد كده.

ليه أفلام كتير منها الزوجة التانية, عدو المرأة و انتصار الشباب.

26) ماري باي باي (1917-1997):

ماري باي باي

ماري باي باي

“مدام بوز جزمتك يدل على أنوثة طاغية” و أول ما شاف وشها قال “لا مؤاخذة يا خالتي”.

و ده كان رد فعل عبدالمنعم مدبولي مع ماري باي باي في فيلم مطاردة غرامية.

 اسمها الأصلي بهيجة محمد. و اشتغلت في فرقة رمسيس و كانت قبلها راقصة في الأفراح.

ده بعد ما انفصلت عن جوزها اللي كان بيشتغل سجان و هي كمان كانت بتشتغل في سجن النسا و اشتغلت مسرح كمان مع الثلاثي.

طبعا لازم نفتكر جميلة مرات عباس الزفر في فيلم اسماعيل يس في الاسطول.

و السكرتيرة الأمورة اللي كانت بتعاكس الرجالة في البحث عن فضيحة.

و من أعمالها كمان عاشور قلب الأسد, اسماعيل يس في مستشفى المجانين و آخر أفلامها الرايا الحمرا 1994.

27) فؤاد أحمد (1936-2010):

فؤاد أحمد

فؤاد أحمد

كان حاصل على ليسانس آداب و بكالريوس المعهد العالي للفنون المسرحية.

اعتبره كتير من الناس انه من أهم مثقفي السينما المصرية.

كان دايما في دور شرير. زي حمودة الأعور مثلا في فيلم المشبوه. و ظهر مع عادل امام كمان في فيلم خمسة باب.

اتحكى انه أثناء تصويره شخصية هامان في مسلسل محمد رسول الله أصيب بالعمى نتيجة ماكياج خاطيء دخل في عينه.

من اعماله أيضا مسلسل الفرسان و جحا المصري.

28) كوثر رمزي:

كوثر رمزي

كوثر رمزي

مواليد 1931 و اشتغلت فترة في الاذاعة. أتيح لها دور أقرب للبطولة في فيلم نداء الحب.

شاركت في أعمال من العيار التقيل زي ليالي الحلمية, رأفت الهجان و يوميات ونيس.

ظهرت كمان في دور الشغالة مع أحمد مظهر في دعاء الكروان.

وكان لها دور جميل جدا في فيلم ليلة عسل لما كانت بتشتغل في تنظيم الأسرة و عندها عيال كتير.

من أدوارها أيضا الرجل الأبيض المتوسط, كيمو و أنتيمو, الواد محروس بتاع الوزير و أمرأة و خمسة رجال.

29)عبد الغني النجدي (1915-1980):

عبد الغني النجدي

عبد الغني النجدي

من مواليد المشايعة أسيوط. برع في دور الصعيدي باتقان لانه مكنش غريب عنه. و كان ليه شنب مميز جدا.

اتجوز الفنانة بديعة صادق. كان بيكتب نكت و يبيعها للمثلين. وكمان ألف بعض الأفلام زي أجازة بالعافية.

مننساش دوره و هو شايل صينية الديك الرومي في بين السما و الأرض و عوكل في الفانوس السحري.

ظهر كمان في اسماعيل يس في الاسطول و البوليس.

و كمان اشترك في المجانين التلاتة و ربع دستة أشرار و كتير من أفلام مصرية جميلة اللي كان آخرها غاوي مشاكل.

30) لولا صدقي (1923-2001):

لولا صدقي

لولا صدقي

كان عنها لدغة جميلة أوي في حرف الراء و هي بنت الكاتب الكبير أمين صدقي من أم ايطالية.

من اسماء الشهرة الشريرة السمراء.

بدأت كراقصة و مغنية في الكازينوهات و غنت بالانجليزي و الفرنساوي كمان و مثلت في بعض الأفلام الايطالية.

ساعدتها أختها صفية على دخول عالم الفن.

تزوجت حوالي 9 مرات.

من افلامها الجميلة فاطمة و ماليكا و راشيل و أبو حلموس و المليونيرة الصغيرة و عريس مراتي.

31) محمود فرج (1933-2009):

محمود فرج

محمود فرج

الشهير بمجانص و كمان كان الجني بتاع المصباح صاحب الجملة الشهيرة “تطلب ايه يا مصطفى”.

رزع اسماعيل يس علئة محترمة في اسماعيل يس في البوليس.

بدأ حياته كرياضي قبل اقتحامه مجال السينما.

و من أفلامه اسماعيل يس طرزان, صراع في النيل, قاضي الغرام و فجر الاسلام و الافيه الشهير “شلت يدي”.

كان أصيب بحالة نفسية سيئة من ضيق العيشة ده غير ان مرض السكر أثر عليه لدرجة كبيرة و اتعمله بتر لاحدى قدميه.

وصل بيه الحال ان صاحب البيت قطع عنه المياه لانه مسددش الفواتير اللي عليه.

32) احسان الجزايرلي (1905-1943):

إحسان الجزايرلي

إحسان الجزايرلي

هي بنت الفنان الكبير فوزي الجزايرلي مش مراته على عكس ما كانت ناس كتير فاهمه.

قدموا مع بعض دويتو مشهور أوي على انهم واحد و مراته و ساعدها في ده طبيعة جسمها.

اسسوا فرقة فوزي الجزايرلي و قدموا على مسرح عماد الدين ثنائي السينما الأول بحبح أفندي و مراته أم أحمد.

الفرقة دي ظهر فيها الطفل محمد عبدالوهاب و عمره 11 سنة وقتها.

من الحكايات اللي اتقالت عنها انها اتكسرت في يوم من الايام.

و عشان العروض متتوقفش طلب فوزي من الصغيرة ماري منيب تقوم بالدور بتاع احسان.

طبعا قامت بيه ماري على أكمل وجه و ده أزعج احسان جدا و بمجرد رجوعها أزاحت ماري من الفرقة كلها مش من الدور بس.

من أعمالها المعلم بحبح, بحبح باشا,الفرسان التلاتة.

33) ابراهيم سعفان (1924-1982):

ابراهيم سعفان

ابراهيم سعفان

كوميديان حكاية. من مواليد شبين الكوم حصل على البكالوريا.

و خد بعدها كلية شريعة ارضاء لابوه و بعدها معهد تمثيل 1951.

من اعماله الكوميدية الجميلة:

تجيبها كده تجيلها كده هي كده,أنكل زيزو حبيبي التمرجي عم مدبولي اللي فيه حقن الديك و بقا عملاق و أذكياء لكن أغبياء.

من أعماله الجميلة جدا دور المحامي اللي بيدافع عن شنب النجعاوي في 30 يوم في السجن.

بيقال انه رحمه الله ساعد سعاد حسني على تعلم القراءة و الكتابة.

توفي في عجمان بالامارات اثر أزمة قلبية عام 1982.

34) نادية شمس الدين (1942-2017):

نادية شمس الدين

نادية شمس الدين

مخدتش شهرة كبيرة أوي على الرغم من أدوارها الكتير. اشتغلت مسرح و تليفزيون و سينما كمان.

من اعمالها يوميات ونيس, ليه يا بنفسج, الآنسة كاف, العفاريت و غرام الأفاعي.

ليها أكتر من 200 عمل فني مختلف. كان آخرها زواج على ورق سوليفان.

35) حمدي يوسف (1930-2003):

حمدي يوسف

حمدي يوسف

كان دايما جاي بيه أو مسئول كبير أو شخصية مهمة. و في الحقيقة هو حاصل على بكالريوس التجارة.

كانت البداية في فيلم شيء من العذاب عام 1969.

و تتوالى الاعمال القيمة مثل بئر الحرمان, ثرثرة فوق النيل, حتى لا يطير الدخان, اعدام ميت و القطط السمان.

و الحاجات دي كلها كان كبير في السن (لأن هو أصلا بدأ التمثيل كبير سنا) و أدواره كلها جدية.

ليه حوالي فوق ال140 عمل فني زي:

مهمة في تل أبيب, طيور الظلام, كراكون في الشارع, الارهاب و الكباب, الواد محروس بتاع الوزير.

و دي كانت مرحلة من حياته قدم فيها أدوار فيها طابع الكوميديا في أفلام مصرية كتير.

36) برلنتي عبد الحميد (1935-2010):

برلنتي عبد الحميد

برلنتي عبد الحميد

كانت برلنتي اللي من مواليد السيدة زينب في شبابها آية من الجمال.

واسمها الحقيقي نفيسة و حصلت على دبلوم تطريز و بعدها دخلت معهد الفنون المسرحية.

كانت تزوجت من المشير عبدالحكيم عامر و أنجبت منه عمرو.

طبعا كان من أبرز أدوارها دور سكينة في فيلم ريا و سكينة.

و كمان كانت حبيبة توفيق الدقن في سر طاقية الاخفاء.

ده غير افلام تانية كتير زي اسماعيل يس في متحف الشمع و الشياطين التلاته.

توفت بجلطة في المخ عام 2010.

37) حسين الشريف:

حسين الشريف

حسين الشريف

كان غالبا في معظم أدواره ظابط. و في الحقيقة هو حاصل على ليساني حقوق.

من مواليد 1956 بالسنبلاوين – الدقهلية.

بدأ بفيلم أين المفر و بعدها كمل مسيرته بمجموعة أفلام متميزة زي العميل رقم 13, أبو كرتونة  و العفاريت.

من المسلسلات اللي اشترك فيها كمان احلام الفتى الطائر و محمود المصري و تقريبا ليه أكتر من 220 عمل فني.

38) زوزو شكيب (1909-1978):

من أصول شركسية, و أبوها كان ظابط شرطة و جدها ظابط جيش.

اشتغلت زينب شكيب أولا مع فرقة الريحاني و بعدها المهندس.

وكمان دخلت مجال الانتاج مع اختها ميمي شكيب في فيلم قلوب دامية.

ليها مجموعة ضخمة من الافلام زي سي عمر, الأحدب, قصر الشوق, شنبو في المصيدة و كان آخرها رجب فوق صفيح ساخن اللي توفت قبل عرضه.

38) شلاضيمو:

شلاضيمو

شلاضيمو

الغريب بقا ان ده كان اسمه فعلا مش اسم شهرة. كان بارز جدا في أدوار الشر.

أول ظهور ليه على الشاشة كان مع أنور وجدي في قلبي دليلي و حظه انه مثل في واحد من أفلام مصرية بارزة في السينما.

ليه كمان حوالي 20 فيلم منهم دهب و جعلوني مجرما.

39) راقية ابراهيم (1919-1977):

راقية ابراهيم

راقية ابراهيم

الحقيقة هي مش من أصحاب الأدوار التانية و لا كومبارس.

و لكن كتير من الناس يشوفها و ميعرفش دي مين عشان كده حبينا نتكلم عنها.

اسمها الحقيقي راشيل ابراهام ممثلة مصرية من أسرة يهودية.

مولودة سنة 1919. اشتهرت أوي بعد تمثيلها لمسرحية توفيق الحكيم سر المنتحرة.

من أفلامها أيضا سلامة في خير و ملاك الرحمة و اجمالا تقريبا 19 فيلم. و هي دي اللي غنى لها عبدالوهاب حكيم عيون.

هاجرت لامريكا سنة 1952  و تزوجت أمريكي و توقفت عن تمثيل أي أفلام مصرية بعدها.

و اتقال ان كان لها يد في اغتيال عالمة الذرة المصرية سميرة موسى و انها كانت عميلة للموساد الاسرائيلي.

40) حسن كفته (1927-2013):

كفته-150×150.jpg” alt=”حسن كفته” width=”150″ height=”150″ /> حسن كفته

بجسمه الضئيل أوي قدر يبقا واحد من أشهر كومبارسات السينما المصرية. اسمه الحقيقي حسن عبدالسلام.

قعد كتير على قهوة بعرة في وسط البلد, القهوة اللي دايما يقعد عليها الكومبارسات مستنيين أي شغل.

بدأ حياته الفنية من و هو 10 سنين في فيلم لسعد عبدالوهاب و بعدها جعلوني مجرما بتاع فريد شوقي.

اشتغل صبي سمكري مع أبوه في الورشة و لما شافه المخرج مختار حسين أخدوا معاه في فيلم العيش و الملح.

اشتغل فترة في لبنان و بعدها الامارات كمقاول نقاشة و اتهم في قضية تزوير خد فيها حكم و لما تم الافراج عنه رجع مصر تاني.

في ناس بتقول ان هو الراجل بتاع متقدرش مع محمد صبحي في مسرحية الهمجي بس دي معلومة مش متأكدين منها أوي.

اشتغل أفلام مصرية كتير أوي منها علي سبايسي, التجربة الدنماركية, أصحاب و لا بيزنس و كابتن توفيق في الكبير أوي.

Mohamed Nabih مقالات الكاتب

طبيب بشري- بكالريوس الطب و الجراحة (جامعة المنصورة)-ماجستير جراحة العظام (جامعة قناة السويس)

اكتب تعليق