أفلام مصرية بين كومبارسات منسية و أدوار تانية و ثانوية أو بطولات مخفية-الحلقة السابعة




تميزت أفلام مصرية كتير بظهور اليهود فيها زمان. مصر طول عمرها ملهاش كتالوج.
ده غير الحب اللي حصل بين الفنانين أثناء اشتركهم في أفلام مصرية عارفنها كويس بس منعرفش ايه اللي كان بيحصل في الكواليس من قصص حب.

نكمل بقيت القصص…….

121) عبد الحميد بدوي:

عبد الحميد بدوي

بدأ العمل الفني في الثلاثينات. هو خال تحية كاريوكا توحة في فيلم المعلمة

و هو كمان كان الشيخ صابر صاحب البيت في دعاء الكروان.

و اشتغل في أفلام كتير ياما منها حسن و نعيمة, المفتش العام و سلفني 3 جنيه



122) كوثر العسال (1939-2013):

كوثر العسال

اللي مكناش نعرفه عن كوثر العسال انها سبق و تزوجت من الفنان عبد المنعم ابراهيم و بعد وفاته تزوجت من الفمان محمد وفيق.

و هي كانت بنت خالة الفنان محمد وفيق و كانوا جيران في السكن. و حبهاو مصرحهاش بحبه الا بعد وفاة زوجها. و لكن لم ينجب الفنان محمد وفيق منها.

و من افلامها أنف و ثلاثة عيون, الحرام,نحن لا نزرع الشوك و حافية على جسر الذهب.

و عملت أعمال تليفزيونية غاية في الجمال منها: القاهرة و الناس و لن أعيش في جلباب أبي في دور زوجة الوزير.

123)حسن عبد الفتاح:

حسن عبد الفتاح

أستاذ الجامعة اللي كام منيم الحتة من المغرب مع سمير و شهير و بهير.

الصحفي اللامع في يوميات زوجة مفروسة و رجل الأمن الحويط مع محمد رمضان في واحد صعيدي و صاحب كتكوت.

مواليد 65. اشتغل الأول في الحكومة في مصنع الالبان و اتجه للفن عن طريق العملاق محمد صبحي.

صوته جميل و تحب تسمع له. و يعتبر أحد أهم السنيدة في الوقت الحالي.

نكمل بعض أفلامه: شيكامارا, حاحا و تفاحة, أسد و أربع قطط و اوعى وشك.

124) كوثر شفيق:

كوثر شفيق

و من الصور العالقة بذهني و هي ركنة على الجيطة في جنب و بتسمع العندليب في الوسادة الخالية.

هي من مواليد 1930.

تزوجت من المخرج الراحل عز الدين ذوالفقار بعد انفصاله عن الفنانة فاتن حمامه و ده شيء ممنعهاش انها تعمل معاها آخر أفلامها و لا عزاء للسيدات.

من افلامها المهمة أبضا: عدو المرأة, الحلاام و الوسادة الخالية.

125) رضا حامد:

رضا حامد

لو اتكلم قصادك هيلخبطك له طريقة كلام كده غريبة و تعرفش هي بيقولها ازاي.

و دي كانت طريقته للوصول لقلوب الناس. من مواليد المنصورة سنة 1954.

افلامه كتير زي: جيم أوفر, عمر و سلمى, العيال هربت و حبيبي نائما.

عمل عدد كبير من برامج المقالب و الكاميرا الخفية.

126) مديحة سالم (1944-2015):

مديحة سالم

الرقة كما يجب أن تكون ده هو أقل لفظ تقدر توصف به البسكوته مديحة سالم.

رومانسية, أنوثة و جمال دول ثلاثي ميحتمعش في ستات كتير و لكن اجتمعوا في خريجة كلية البنات مديحة سالم.

اقرأ أيضا  أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الرابعة

من مواليد القاهرة. من أفلامها الجميلة: أم العروسة, حب و كبرياء,مذكرات تلميذة حواء على الطريق و نادية.

127) حسين أبو حجاج:

حسين أبو حجاج

لؤي في صعيدي في الجامعة الأمريكية و في الأصل صاحب محل كاوتش عربيات.

تركيبة جسمه غريبة شوية و تحس فيها شيء من العملقة كده. و ده ساعده عل انه يكون مميز في أدواره بشكل مختلف عن غيره.

اتظلم شوية في حياته من حيث اشاعة وفاته اللي كل يوم و التاني تطلع بها اشاعة و ينفيها ربنا يديله الصحة و طول العمر.

عمل كمان فيلم الناظر, أسد و أرع قطط, غبي منه فيه, خليك في حالك, زكي شان, الناظر و اللمبي 8 جيجا.

من المسرحيات: حودة كرامة و من المسلسلات: عصابة بابا و ماما, عريس دليفري, جوز ماما مين و أكد دوره الرائع في مسلسل الكبير أوي.

128) زوزو حمدي الحكيم (1912-2003):

زوزو حمدي الحكيم

نظرة حادة صارمة صوت قوي ميزوها عن غيرها في أدوار الام الشديدة و أدوار الشر كمان.

من مواليد المنوفية خريجة معهد المعلمات و تزوجت من الفنان محمد التابعي زيجة قصيرة العمر. من مؤسسي المسرح بدولة الكويت الشقيق.

في كلام تاني بيقول ان ابراهيم ناجي كتب قصيدة الاطلال في حبها هي مش في ملك الجمل و الله أعلم.

من أهم أدوارها ريا و سكينة, المومياء, بيت الطالبات و ليلى بنت الفقراء.

129) محمد فرحات (1931-1997):

الدكتور شديد

“وماله يا أخويا و ماله” “يارب ياخويا يارب” بالجملتي دول ارتبط الفنان الكبير بالناس بشكل كبير حتى لو ميعرفوش اسمه الحقيقي.

الشهير بالدكتور شديد. كان والده مهندس آثار و والدته مدرسة و هو ابنها الوحيد. من مواليد العباسية. ليسانس آداب فلسفة. حاصل على ماجستير و دكتوراه

اللي ابتكر شخصية الدكتور شديد هو المؤلف عبدالفتاح السيد بتاع ساعة لقلبك المسلسل الاذاعي.

من اعماله:اسماعيل يس في السجن, حمتاتي ملاك, اسماعيل يس في مستشفى المجانين و عروس النيل.

130)  نيللي مظلوم (1925-2003):

نيللي مظلوم

شفناها في دور لاتانيا في ابن حميدو في دور مهربة المخدرات.

هي زوجة عاطف صدقي رئيس وزراء مصر السابق. هي راقصة فاروق المفضلة البالرينه نيللي مظلوم.

من مواليد الاسكندرية لاأب جواهرجي ايطالي و أم يونانية.

زيها زي كتير غيرها أصول غير مصرية و تشارك في أفلام مصرية من علامات السينما.

تزوجت من رجل يوناني اسمه أندرياس روسوس يقال انه أبو المفني العالمي ديميس روسوس.

من مريضة شلل أطفال في صغرها لراقصة باليه محترفه و ده بفضل الدكتور اللي عالجها منه و مراته تبنتها فنيا كمان.

من أفلامها: اسماعيل يس في جنينة الحيوانات و فاطمة و ماريكا و راشيل.

131) ميمو رمسيس:

ميمو رمسيس

عدد 2 أفلام مصرية فقط لا غير.

أكيد فاكرين الحرامي اللي هرب من اسماعيل يس في فيلم اسماعيل يس بوليس سري اللي ضحك عليه و قال له عطشان يا شاويش.

اقرأ أيضا  أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الثامنة

و عمل كمان فيلم ملاك و شيطان و اتسبب في قتل اونكل عزت و كان اسمه أبو شفه.

هاجر لأمريكا مع أخوه جمال. و كان في اشاعة انه هو رأفت الهجان.

132) سهير الباروني (1937-2012):

سهير الباروني

“دخل الحرامي و أنا نايمة شوف قلة أدبه” من أشهر المقاطع لها في فيلم فول الصين العظيم.

يا خبر أبيض عليها في هاللو شلبي و لا دور لوليتا مع فؤاد المهندس و شريهان ملوش حل في عاشان خاطر عيونك ده غير طبعا شارع محمد علي.

فاكرلها طبعا الحقودة أم دم خفيف في لن أعيش في جلباب أبي و متنساش رأفت الهجان و فرقة ناجي عطا الله.

هي أصلا مكنتش بتسكت لحد و من الحكايات في الموضوع ده:

ان جارتها ماري منيب سمعتها مرة بتهزأ حد من الجيران و قالت لوالدتها اللي ادتها علقة سخنة عقابا لها.

سهير محمد يوسف الباروني من مواليد العجوزة تعتبر واحدة من أشهر عوانس أفلام مصرية على الاطلاق.

خد عندك من أفلامها: بين القصرين, قصر الشوق, قصة الحي الشعبي و بنت اسمها محمود……

133) عبدالعليم خطاب (1913-1978):

عبدالعليم خطاب

“غور جبر يلمك” من جمله المشهورة في أفلامه اللي ظهر فيها دايما قوي متعجرف لحد الشر لو لزم الامر.

عبد العليم محمد أحمد شرف الدين خطاب منوفي مواليد 1913. عرف عنه قوة الشخصية.

درس الاخراج في لندن و احترف المونتاج.

أخرج أفلام مصرية منها: العلمين و جزيرة الاحلام.

و شارك في ليلى بنت الفقراء, قطار الليل, الفتوة, النداهه و دعاء الكروان اللي قال فيه “هنادي خدها الوبا” بعد ما قتلها عقابا لها على خطيئتها….

134) كريمان (1936-2005):

كريمان

واحدة من أشهر دلوعات السينما المصرية. خريجة مدرسة الليسيه و اشتركت مع بابا شارو في برامج الاطفال.

دورها في سكر هانم من الادوار الجميلة مع عبدالمنعم ابراهيم, كمال الشناوي, سامية جمال و عمر الحريري.

كريمان عملت خدعة على آسيا عشان تدخل الفن بعد ما لفضتها لانها صغيرة راحت لبست كعب عالي و حطت روج و دخلت اللعبة على آسيا و وافقت.

و أهي البنت الشقية دي كانت شخصية منعزلة الى حد ما عن باقي الوسط.

حتى اعتزالها كان فجأة و بدون مقدمات بعد 14 سنة من العمل الفني.

من اعمالها الاخرى: بنات اليوم, مراتي مدير عام, تمر حنة و الفانوس السحري اللي عملت فيه خطيبة اسماعيل يس.

135) حسن حامد (1932-1989):

حسن حامد

مدرس التربية الرياضية القاهري في السينما كان فتوة و شرير بس دمه خفيف لو لزم الامر.

له حوالي 65 عمل فني. البحث عن فضيحة, 30 يوم في السجن و افتكر كده شنب النجعاوي, رابعة العدوية, صراع في النيل و رصيف نمره 5.

أخرج و أنتج بعض الافلام زي الكل عاوز يحب.

136) إيمان:

إيمان

متختلفش كتير عن مديحة سالم نفس الرقة و الجمال. حبيبة العندليب في فيلم أيام و ليالي.

اقرأ أيضا  أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الخامسة

حد ينسا اللي غنالها عبدالحليم أنا لك على طول خليك ليه؟ من مواليد الاسماعيلية على فكرة.

اشتركت مع الكروان فريد الأطرش في فيلم عهد الهوى. و اشتركت معاه تاني

في الحقيقة لمت اتجوزت أخوه فؤاد لفترة و بعدها انفصلوا.

هاجرت لألمانيا بعد زواجها من مهندس ألماني أشهر اسلامه. عملت عدد من الأفلام منها: أنا بريئة, حياة و أمل و تحت سماء المدينة.

الاسم الحقيقي ليلى هلال يس من مواليد 1938 و سماها العندليب سمراء النيل.

137) محمد كمال المصري (1886-1966):

شرفنطح

العجوز البخيل المكار الشهير بشرفنطح. مولود في شارع محمد علي. هو جميل بك في فيلم سي عمر بتاع الريحاني.

كان هو ناظر المدرسة في فيلم سلامة في خيرعمل كمان حسن و مرقص و كوهين.

كان آخر أفلامه عفريتة اسماعيل يس اللي عمل فيه دور شملول جوز ضريبة هانم.

من النهايات الحزينة للفنانين فهو لم يقدر له الانجاب و  أصيب بالربو و اعتزل التمثيل.

و مش كده و بس ده بيته آل للسقوط و اضطر يقضي آخر أيامه في أوضة صغيرؤة في باب الخلق.

138) إيمان (تاني بس بالألوان):

إيمان

على عكس الفنانة ايمان العندليب ظهرت اليزابيث طوروس سركسيان (أو ليز سركسيان) الشهيرة بايمان هي كمان. مواليد 1945.

لان ايمان هنا دايما تظهر في دور يميل للشر بعيد عن الرومانسية و تفوقت في توصيل الفكرة دي للمشاهد.

هي لبنانية الأصل و اسمها الفني هو إيمان زي ما قولنا قبل كده.

اشتغلت كتير في لبنان فهي لم تكتفي بالنجاح هناك و جت مصر لتستكمل مسيرة النجاح.

تجيد عدة لغات مثل الفرنسية و الاسبانية. أدوارها فيها شيء من الاغراء بجانب الشر. خريجة الجامعة الامريكية كلية الصيدلة.

أفلام مصرية عملتها:  الصعود الى الهاوية, شعبان تحت الصفر, ولاد العم و العميل رقم

13.

بالنسبة للتليفزيون لها اعمال قوية جدا: للثروة حسابات أخرى, هوانم جاردن سيتي, زيزينيا و الثعلب.



139) محمد أباظة (1921-1980):

محمد أباظه

أبو سفيان في فيلم هجرة الرسول مع ايهاب نافع هيخليك تفتكره على طول.

من أهم أدواره شفيقة القبطية و رابعة العدوية و قيس وليلى و جميلة مع الفنانة ماجده.

شرقاوي الميلاد اللي تميز بقساوة الملامح و شدتها.

ومن أدواره كمان: السكرية, أنف و ثلاثة عيون و معبودة الجماهير (الاستاذ عادل رئيس التحرير).

انتاج مش قليل من أفلام مصرية و مسلسلات و صل لما يقرب من 65 فيلم.

140) سعاد حسين (1928-2008):

سعاد حسين

هي زوجة الكاتب الكبير أنور عبدالله و أسست معاه فرقة الفكاهة المسرحية. و هي والدة الممثلة الكبيرة سماح أنور. من مواليد الاسكندرية.

شاركت في افلام مصرية جميلة زي: أخطر رجل في العالم, البؤساء, أرض النفاق و الحب فوق هضبة الهرم.

و من مسلسلاتها: ونيس, رفاعة الطهطاوي و جمهورية زفتى.


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *