أفلام مصرية بين كومبارسات منسية و أدوار تانية و ثانوية أو بطولات مخفية-الحلقة العاشرة و الأخيرة

المجموعة دي اللي شاركت في أفلام مصرية نقدر عليها مجموعة الموت.

دول مجموعة من غيرها السينما المصرية زمانها مكنتش موجودة. دي مجموعة الكبار.

مش ممكن الناس دي, دول أساطير الفن المصري فعلا. بوجودهم أفلام مصرية كتير بقا لها قيمة.

و في مجموعة منهم هم اللي صنعوا السينما و هم اللي عرفونا يعني ايه فن. تعالو نشوف مين دول……..

1) زينات صدقي (1913-1978):

زينات صدقي

“كتاكيتو بني يا كتاكيتو بني” هي فاكهة السينما المصرية. ستات, رجالة, كبار و صغيرين بيحبوا الست دي.

هي أشهر عانس في السينما المصرية.

سبحان الله قبول غير طبيعي. هتخليك تنسا الهم و تضحك من جواك مع ان هي شافت اللي محدش شافه.

من صغرها و هي بتعاني بداية كده والدها جوزها لقريبها الدكتور و هب مفيش سنة و انفصلو.

و بيقال انها اتجوزت سرا من ظابط من ثوار يوليو 52 و مطولوش في الجوازة. اشتغلت في بدايتها مغنية و راقصة.

من اسكندرية في الأصل و اسمها الحقيقي زينب محمد سعد و زينات ده كان اختراع يوسف بك وهبي.

كانت موسوسة شوية من ناحية النظافة و تعنف أي حد يقرب من حاجتها.

طبعا أفلام مصرية لها كانت كلها مكسرة الدنيا نقول منها:

حلاق السيدات, عريس مراتي, معبودة الجماهير, ابن حميدو, أيامنا الحلوة, نهارك سعيد……..

مع سمعة عملت كل حاجة تقريبا:

اسماعيل يس (بوليس سري, في مستشفى المجانين, في جنينة الحيوانات, في الأسطول, في البوليس, عفريتة اسماعيل يس………

و طبعا غدر الدنيا مسبهاش في حالها فزينات اللي ضحكت مصر كلها انتهت بشكل درامي أوي.

فبالرغم من تكريم الرئيس السادات لها على أفلام مصرية كتير عملتها و تحديد معاش شهري لها.

تلاقيها اضطرت في يوم من الأيام تبيع عفشها عشان تقدر تسدد الضرايب اللي عليها.

و اجتمع المرض مع ضيق الماديات و أصيبت بمياه عل الرئة أدت لوفاتها عام 1978.

2) ستيفان روستي (1891-1964):

ستيفان روستي

“ثانية واحدة أتحزم و أجيلك” “نشنت يا فالح” ده بقا متعرفش هو ايه؟ كوميديان و لا شرير و لا ايه بالظبط؟ جن مصور في التمثيل متعرفش هو هيعمل فيك ايه؟

لأ و ايه مش بس تمثيل ده كمان اخراج و مبيخرجش كده ارتجالا ده اتعلم الاخراج في فرنسا و ألمانيا.

اخرج أفلام مصرية زي:

ليلى و البحر بيضحك ليه. و من اشهر افيهاته اللي نفتكرها حديثه لأم كلثوم “أبوس القدم و أبدي الندم على غلطتي في حق الغنم”.

والده كان سفير النمسا  في مصر و اتجوز من ايطالية خلف منها العملاق ستيفان روستي و بعده بفترة انفصلو و راح هو عاش مع أمه.

كان بيحب يلعب رياضة عشان يحافظ على صحته و مكنش يحب علاج الدكاترة و بيعالج نفسه بنفسه من خلال الوصفات الشعبية.

و بمجرد ما تزوجت تاني ساب البيت و مشى عشان يعيش لوحده. و لما دخل مجال الفن ساب بصمة كبيرة جدا. بيقال انه كان يهودي الديانة.

بدأ حياته كراقص في الكازينوهات أثناء تواجده خارج مصر و تم فصله من هيئة البريد اللي كان بيشتغل فيها بوسطجي.

و من المحزن في حياته كمان انه تزوج و هو في الستين من عمره تقريبا و أنجب توأم و توفاهم الله.

و أصاب زوجته بعد وفاته نوع من الاضظراب النفسي أشبه بالجنون.

رصيده فوق ال 350 فيلم هنذكر أمثلة منها:

الستات ميعرفوش يكدبو, كدبة ابريل, كشكش بيه, اسماعيل يس طرزان, ملك البترول و حسن و ماريكا.

من الطرائف في حياته انه طلع اشاعة انه توفى و بالفعل عملت النقابة حفل تأبين و فجأة لاقوه داخل عليهم بس للاسف مات بعده في نفس السنة.

3) نبيلة السيد (1938-1986):

نبيلة السيد

“عريس يا أماي عريس يا أماي” قالتها مسعدة أول ما دخل عليها سمير صبري في فيلم البحث عن فضيحة.

خفة دمها و بساطتها تجبرك انك تحبها.

ظهرت في كل الأدوار اللي ممكن تعملها ست الا الشريرة و حتى لو ظهرت شريرة كان شرها دمه خفيف.

و ده ظهر أوي مع عادل امام لما عكننت عليه حياته في فيلم ممنوع في ليلة الدخلة و كانت قايمة بدور حماته و عكننت عليه دخلته حتى بعد وفاتها.

مواليد شارع محمد علي لأب صاحب محل آلات موسيقية. لها أكتر من 130 عمل فني مختلف.

حصلت على دبلوم معهد التمثيل.من أشهر مسلسلاتها أهلا بالسكان. و ظهرت كطفلة عمرها 11 سنة في فيلم غزل البنات كتلميذ للأستاذ حمام.

أفلام مصرية زي:

غريب في بيتي, ليلة بكى فيها القمر,خلي بالك من زوزو, البحث عن فضيحة, حكايتي مع الزمان و عماشة في الأدغال.

بس للأسف الشخصية المرحة دي و اللي ياما ضحكتنا أصيبت بالسرطان و تسبب في وفاتها في عام 1986.

4) سراج منير (1904-1957):

سراج منير

عنتر اللي أكل السبع اقلام من لبلب في فيلم عنتر و لبلب. في الكوميديا أستاذ و في الشر محترف.

ظهر بشكلل متكرر مع الفناة ميمي شكيب في الأفلام زي ما حصل في نشالة هانم و ابن زوات مثلا.

هما مش بس في الأفلام لأ ده في الحقيقة كمان. الزواج اللي تم بعد فترة من الرفض من أهلها و التحايل منه.

زواجهم دام 15 سنة و كل الناس حسدتهم عليه و لكن أهلها رفضوه في البداية ولما وافقو عليه أخيرا أهله هما اللي رفضوا لولا تدخل الريحاني.

مع العلم بإن سراج منير عبدالوهاب أبوه كان بيك و ماسك منصب مدير في إدارة المعارف و أخوه هو المخرج الكبير فطين عبدالوهاب.

من الطب لتمثيل أفلام مصرية.سراج دخل كلية الطب و مكملهاش.

كان من مواليد شبرا. بدأ التمثيل و هو في ألمانيا (أثناء دراسته للطب) و ظهر في أحد الأفلام الصامته.

أنتج بعض الأفلام للسينما. و شارك في أفلام مصرية زي: سي عمر, بيومي أفندي, أمير الانتقام, البنات شربات, عفريتة اسماعيل يس و نهارك سعيد.

وفاته كانت مفاجئة لميمي شكيب اللي في رواية بتقول انه توفى بعد ما كلمها تلفونيا و اتطمن عليها مباشرة.

مات الرجل و ترك رصيد أفلام مصرية ناجحة تفوق الوصف.

5) ميمي شكيب (1913-1983):

ميمي شكيب

هي شريرة من نوع خاص. فهي شريرة بضحكة جنان. آه كانت أم قاسية وحماه صعبة لكن تضحكك من قلبك لو عايزة. اسمها الأصلي أمينة شكيب.

حياتها كانت غريبة و فيها مفارقات أغرب. فعلا تنفع قصة فيلم.

هي في الأصل بنت زوات أصولها شركسية. أبوها مأمور و جدها ظابط و أمها سيدة مجتمع و أختها زوزو شكيب.

و بالتالي كان في نوع من التشديد و التزمت في التعامل مع الأختين. و فجأة الأب يموت و تدخل الأم في صراع مع العيلة.

تمتنع الأم عن تسليم الابنتين وتعاقبهم أسرة الأب بالحرمان من الميراث. و ميمي متعودة على حياة بشكل معين.

فلما طلبها الرجل الغني قريب اسماعيل باشا صدقي رئيس الوزراء للزواج وافقت على الرغم من انه يكبرها بعشرين سنة.

و لاقته زي أبوها و متزمت زيه مش كده و بس ده اتجوز عليها و هي حامل بعد 3 شهور. و انفصلوا بعدها بقترة قصيرة.

خلصت منه و دخلت بعدها في علاقة مع أحمد حسنين باشا رئيس الديوان و ده الشيء اللي معجبش الملكة نازلي اللي أنهت العلاقة بالأمر.

بعدها اتجوزت رجل الاعمال المصري جمال عزت و طلقها هو كمان بعد شوية و قبله ارتبطت بالثري عبود باشا.

و بعدها تزوجت من سراج منير زي ما قولنا قبل كده.

و بعد وفاة زوجها حصلها صدمة شديدة و لكن مع الوقت بدأت ميمي تستكمل حياتها بشكل طبيعي و يمكن أكتر من طبيعي.

بداية النهاية:

بيتها كان مفتوح دايما للسهر و الحفلات زي ما كانت بتعمل في أفلام مصرية مثلتها.

و بين يوم و ليلة اتقبض على ميمي و اللي معاها بتهمة إدارة شبكة منافية للآداب.

و اتسجنت ميمي على زمة القضية (سموها قضية الرقيق الابيض وقتها) لحد ما طلعت براءة لان مكنش في حالة تلبس.

و لكن ده أثر على نفسيتها جامد و خاصة ان المجتمع خلاص ثبت في ذهنه الفكرة.

ليتفاجأ الجميع بالقاء ميمي شكيب من البالكونة طب مين اللي قتلها و لا هي انتحرنت محدش يعرف الى الآن.

و يقال ان قصة شبكة الدعارة دي أكبر من ميمي شكيب و اللي معاها بكتير و انها كانت نتيجة لخلاف حصل بين القذافي و السادات.

أفلام مصرية: الحموات الفاتنات, حميدو, دعاء الكروان, شارع محمد علي, تحيا الستات و شاطيء الغرام.

6) حسين رياض (1897-1965):

حسين رياض

في فيلم رد قلبي قام فجأة من على الكرسي المتحرك بعد نجاح ثورة يوليو 1952.

أخو الفنان فؤاد شفيق و اسمه الحقيقي حسين محمود شفيق.

من مواليد السيدة زينب و أبوه تاجر جلود من أصول تركية و أمه سورية الأصل.

تزوج في سن متأخرة بعد تجاوزه 40 سنة. عمل الفنان حسين رياض في العديد من الفرق المسرحية مثل الريحاني, منيرة المهدية و الكسار.

من المواقف الجميلة لأبو الفن المصري:

تهديده لادارة المسرح القومي بالاستقالة لو استمر خلافهم مع حسن يوسف اللي كان بيعتبره من أبنائه هو و مجموعة تانية من النجوم.

اندماجه في الشخصية كان عالي أوي و كان بيعيشها فعلا.

لدرجة انه أصيب بحالة أشبه بالشلل فعلا أثناء تصوير شخصية رجل قعيد في فيلم الاسطى حسن.

اشتغل للمسرح أعمال كتير من الروايات العالمية منها: مصرع كليوباترا, عطيل و تاجر البندقية.

أما عن أفلامه فهو عمل أدوار ملهاش عدد و معظمها في نطاق الموظف الغلبان و الأب الحريص على أولاده.

من أفلامه: سلامة في خير, البنات و الصيف, شفيقة القبطية, رابعة العدوية, في بيتنا رجل, المماليك و السبع بنات.

توفى بأزمة قلبية أثناء تصوير أحد المشاهد في فيلم ليلة الزفاف.

7) وداد حمدي (1924-1994):

وداد حمدي

هي أشهر خادمة في السينما المصرية و هي من أكتر الناس اللي ضحكتنا في أفلامها و بكتنا بوفاتها.

تحسها طيبة كده و جدعة زي أهل بلدها كفر الشيخ علما بان جذورها كردية. قبل احترافها الفن كانت مغنية.

الاسم الاصلي وداد محمد عيسوي زرارة. تزوجت أولا من الموسيقار محمد الموجي و بعده من الفنان محمد  الطوخي و من بعده الفنان صلاح قابيل.

مسلسل غوايش هو الاشهر لها في التليفزيون. قامت بدور الراوي بالصوت فقط في فيلم الخمسة جنيه.

من اعمالها السينمائية: أفواه و أرانب,يا عزيزي كلنا لصوص, إشاعة حب, أم رتيبة, لحن الوفاء, الآنسة حنفي و حماتي قنبلة ذرية.

لكن النهاية الحزينة لم تتركها هي أيضا فقد قتلها الريجسير متى باسليوس طعنا بالسكين طمعا في فلوسها.

8) رياض القصبجي (1903-1963):

رياض القصبجي

الشاويش عطية, أشهر شاويش في أفلام اسماعيل يس و في السينما المصرية عامة.

رياض محمود حسن القصبجي. مواليد الاسكندرية و كان ساكن في منطقة ريا و سكينة الحقيقيين. بدأ كمسري في السكة الحديد قبل التمثيل.

نحكي ايه و لا ايه القصبجي محتاج كتب عشان نتكلم عن أدواره. شرير تلاقي, فكهي موجود, طب افتكر منظره كده لما تعاطف مع اسماعيل  يس لما اتجنن.

و لا منظره و هو قاعد على مكتبه و موقفه قدامه عمال يبستف فيه بطريقته اللي ملهاش حل.

شوف عمل ايه مع سمعه مثلا: اسماعيل يس في (الجيش-البوليس-بوليس حربي-مستشفى المجانين-الطيران-جنينة الحيوانات), ابن حميدو, مغامرات اسماعيل يس, اسماعيل يس يقابل ريا و سكينة و الآنسة حنفي……..

شكلوا مع بعض دويتو رائع مفتكرش انه حصل في السينما حتى يومنا هذا.

و لكن دوام الحال من المحال. أصيب الشاويش عطية بارتفاع مفاجيء في ضغط الدم أدى لشلل نصفي.

بدأ القصبجي علاجه و الحمد لله بدأ يتحسن. المخرج حسن الامام الجدع قال لنفسه “طيب ما نجيب القصبجي معانا نرفع من معنوياته شويه”.

استدعاه عشان دور في فيلم الخطايا مع العندليب. حضر الفنان و لما جه دوره ملقاش دوره.

ملقاش حاجة يقولها, مش قادر, مش فاكر و مش عارف. يبكي الشاويش و يبكي اللي حواليه.

و يموت بعدها بسنة شاويش السينما المصرية و تموت معاه الشخصية دي لان مهما عملو مش هييجي شاويش تاني زيه.

9) كريمة مختار (1934-2017):

كريمة مختار

“ماما نونا” ضحكتنا كتير في الحفيد, وقعتنا على الأرض في العيال كبرت, زعلتنا أوي في ساعة ونص و بكتنا في نهاية يتربى في عزو.

هو ده التميز نفسه امها تقدر تعمل أي حاجة. احساس عالي,تقمس و اندماج  و حاجات حلوة كتير شفناها مع أم الاعلامي معتز الدمرداش بل أم الفن المصري كله.

عطيات محمد البدري, أصولها من الصعيد, من أسيوط. حصلت عل بكالريوس الفنون المسرحية. و بدأـ زمان مع بابا شارو و قدمت برامج في الاذاعة. تزوجت من المخرج نور الدمرداش. و هي شقيقة الاذاعية عواطف البدري.

طبعا البخيل و أنا اللي عملت فيه دور مرات فريد شوقي من المسلسلات اللي نجحت جدا و مازالت مأثرة فينا لدلوقت.

قدمت للتليفزيون مجموعة من أعظم المسلسلات زي:الفرسان, القاهرة و الناس, الف ليلة و ليلة و الحارة.

و طبعا انتاجها للسينما كان بارز جدا منه أفلام مصرية:

نحن لا نزرع الشوك, أميرة حبي أنا, و بالوالدين احسانا, سعد اليتيم, يارب ولد و الفرح.

10) عبدالفتاح القصري (1905-1964):

عبدالفتاح القصري

“يا صفايح الزبدة السايحة يا براميل القشطة النايحة” ده كان أسلوب فنانا الجميل لما يحب يعبر عن اعجابه بالست.

طبعا الأسلوب ده يخليك عمرك ما تتخيل ان القصري خريج مدارس فرنساوي. بس احنا حبناه كده و هو ضحكنا كده.

ده يمكن يكون أسلوبه ده هو السبب الرئيسي في تألقه و اختلافه عن باقي كوميديانات عصره بل اختلافه عن كوميديانات مصر من يومها الى الآن.

لو عندك فكرة معينة و أبوك رجل ثري و  هددك بانه هيحرمك من ميراثه غالبا هتتخلى عن فكرتك هو بقا معملش كده.

لما اعترض والده تاجر الدهب على التمثيل و هدده بحرمانه من ميراثه مهمهوش الفلوس و اتمسك بفكرته.

تركيبته شكلا كانت ملفته للنظر كان فنان قصير و بكرش و عنده حول في عينيه و شعر ناعم و على العكس تماما كانت دي مؤهلات نجاح فنان بالفطرة.

شغله مع اسماعيل يس أضاف له كتير من الشعبية و لكن أضاف هو لأفلام سمعه بريق و طعم خاص زاد من قبولها لدى الجماهير.

عمل مع اسماعيل يس مجموعة أفلام مصرية منها:

ابن حميدو, بيت النتاش, حماتي قنبلة ذرية, الآنسة حنفي, اسماعيل يس في مستشفى المجانين و في جنينة الحيوانات و في متحف الشمع و يقابل ريا و سكينة.

“كلمت لا ممكن تنزل اللأرض أبدا, خلاص هتنزل المره دي” طبعا دي كانت أشهر جمله قالها القصري و كانت في فيلم ابن حميدو لمراته المتسلطة.

النهاية:

و فجأة عملاق الكوميديا يبدأ سطور النهاية لما يصيبه العمى نتيجة ارتفاع كبير في نسبة السكر و هو في أحد العروض مع اسماعيل يس و تتخلى عنه زوجته و يصاب بفقدان الذاكرة.

و كمان تتجوز واحد تاني بعد ما كتبلها القصري ممتلكاته كلها. و ينتهي به الحال في أوضة صغيرة في الشرابية.

و يسدل الستار على واحد من أقوى و أهم كوميديانات السينما المصري على الاطلاق بعد ما كان بيفتح الستار ليمتعنا بفنه.

11) ماري منيب (1905-1969):

ماري منيب

مش محتاج أتكلم عن ماري منيب, الصغير قبل الكبير عارف من اللي قال “اسأليني أنا مدوباهم اتنين”.

كلنا عارفين من هي الحماه الأشهر في تاريخ السينما. برعت في تقديم الدور ده.

جننت اسماعيل يس في الافلام لما كانت حماته في حماتي قنبلة ذرية.حتي فؤاد المهنس مفلتش من ايديها في اعترافات زوج.

طلعت عين يوسف فخر الدين في فيلم حماتي ملاك. و الغلبان كمال الشناوي في الحموات الفاتنات اتبهدل هو كمان.

حتى و هي مش حماه ضيعت أحمد مظهر و عادل امام في لصوص لكن ظرفاء.

و اللي ملوش حل فعلا من أفلامها أم رتيبة. و لا “انت جايه تشتغلي ايه” في مسرحية الا خمسة.

و خد من ده كتير عملته ماري سليم حبيب نصر الله الشبراوية الاقامة و شامية الأصل زوجة الفنان فوزي منيب جدة المطرب الراحل عامر منيب.

انفصلت عن منيب بعد امجابها بنت و ولدين منه و تزوجت جوز أختها (بعد وفاة أختها) المحامي فهمي عبدالسلام  و ؟أشهرت اسلامها عام 1937.

رحلت صاحبة الضحكة المميزة عن عالمنا في عام 1969.

12) عبدالسلام النابلسي (1899-1968):

عبدالسلام النابلسي

“ابسطها يا باسط” دي كانت دعوته قبل ما لما تتدلق عليه الملوخية من زينات صدقي في فيلم شارع الحب و كان رد فعله “متبسطهاش أوي كده”.

و من يومها و الكلمة دي بقت ماركة مسجلة باسم عبدالسلام النابلسي و أصبحت لزمه على لسان المصريين عامة.

النابلسي هو عازب السينما. لم يتزوج الا في الستين من عمره.

عمل دور بطولة في فيلم حلاق السيدات و ده كان واحد من أجمل أفلامه و عمل بطولة مطلقة في فيلم عاشور قلب الأسد.

. اشتغل كتير مع اسماعيل يس في أفلام جميلة منها عفريته هانم و معاهم فريد الأطرش, الفرسان الثلاثة و اسماعيل يس في البوليس الحربي.

“و ليالي زمان” كان بيطلع صوته فجأة بالكلمتين دول في أغنيةضخك و لعب و جد و حب مع العندليب في فيلم يوم من عمري.

نشأ النابلسي في أسرة متدينة و بعته والده لمصر علشان يتعلم في الأزهر فهو في الاصل فلسطيني مولود في لبنان و كمل حياته في مصر.

بعد النجاحات المتتالية للنابلسي حصل خلاف بينه و بين الضرايب انتهى برحيله من مصر و استيلاء الضرايب على عفش شقته اللي في الزمالك.

بعودته للبنان خسر جزء من جمهوره في مصر اللي معدش بيشوفه لكن على المستوى المادي كسب كتير لانه كان مدير المتحدة للأفلام و أنتج هناك عدد كبير من الأفلام.

أوحى النابلسي للجميع أنه يعاني من مشاكل بالمعدة و الحقيقة انه كان مريض بالقلب و عمل كده علشان شغله ميتأثرش.

و بالفعل توفي بأزمة قلبية عام 1968.

و كانت وفاته بعد انهيار بنك انترا و اشهاره لافلاسه و بالتالي افلاس النابلسي اللي كان حاطط فيه كل فلوسه.

13) عقيلة راتب (1916-1999):

عقيلة راتب

طبعا مسلسل عادات و تقاليد واحد من أشهر الاعمال التليفزيونية وقتها و الى الآن.

ده كان من أسباب ازدياد شعبية النجمة عقيلة راتب (فوق ال 300 حلقة).

راتب ده مش والدها و لكن أخوها اللي مات و هو صغير  لان والدها رفض كغيره من آباء معظم الفنانات ان بنته تمثل.

و عقيلة ده اسم صديقتها المقربة (هي كاملة محمد شاكر بنت  رئيس قسم الترجمة بالخارجية).

عقيلة راتب كانت أم سعاد حسني و فؤاد المهندس و أحمد رمزي في فيلم عائلة زيزي.

من أهم أعمالها للسينما:

احنا بتوع الاتوبيس, اسكندريه ليه, البعض يذهب للمأذون مرتين, طلاق سعاد هانم و الفرسان الثلاثة.

أما في المسرح هتلاقي: حلمك يا شيخ علام, الزوجة آخر من تعلم, زقاق المدق و القاهرة 30.

أطلقوا عليها لقب معونة الشتاء لانها خصصت جزء من دخلها الشهري لصالح الفنانين المحتاجين و غيرهم من أصحاب الحاجات.

و استكمالا للنهايات الحزينة للفنانين فقدت فنانتنا المتألقة بصرها أثناء تصوير فيلم المنحوس و تغادر عالمنا في عام 1999.

14) حسن فايق (1891-1980):

حسن فايق

أبو ضحكة جنان و طبقة صوت متعرفش هو عاملها فين بالظبط و صلعة مفيش زيها اتنين.

عمل مع اسماعيل يس مجموعة من الافلام مش قليلة هم كمان زي: ليلة الدخلة, اسماعيل يس في جنينة الحيوانات و العقل و المال.

حسن فايق محمد الخولي مارس في حياته فن المنولوج بشكل كبير و كتب منولوجات ليه و لغيره من الفنانين.

في اختلاف على الى اين تمتد جذوره ما بين الاسكندرية أو الدقهلية (مركز شربين تحديدا).

من ضمن مجموعة أفلام مصرية عملها: أبو حلموس, قمر 14, سكر هانم, أم رتيبة, الزوجة 13, معبودة الجماهير و قلبي دليلي.

اشتغل فايق في معظم الفرق اللي اتكونت في الفترة دي ما بين رمسيس, الريحاني, جورج أبيض و اسماعيل يس.

سبق له الزواج مرتين احداهما لمدة كبيرة حوالي 40 سنة.

و لما توفت زوجته أقدم على الزواج من فتاة تصغره سنا بكتير و ده الشيء اللي خلى الصحفيين يهاجموه.

أما عن البطولة فكانت في فيلمين هما العقل و المال و حسن و مرقص و كوهين.

و كالعادة النهاية الغير سعيدة للفنانين كانت هي السمة الاغلب.

فقبل وفاته بفترة كبيرة أصيب الفنان حسن فايق بالشلل و عانى خلال الفترة دي حتى وفاته.

15) محمود المليجي (1910-1983):

محمود المليجي

امبراطور الشر في السينما المصرية “أنتوني كوين الشرق” هو “محمد أبو سويلم” في فيلم الأرض.

التجاعيد اللي وشه مكتوب عليها تاريخ السينما المصرية. جسد المصري الأصيل اللي بيعشق تراب بلده و هو بيتسحل على وشه في فيلم الأرض.

هو مبيمثلش هو حقيقي. انت عايش معاه مش بتتفرج عليه. هو أمير العفوية في السينما. هو تلقائييييي

لقطته فاطمة رشدي في احدى العروض المسرحية بمدرسته و اشتغل في فرقتها و منها لفرقة رمسيس.

و اختاره يوسف شاهين ليكون قاسم مشترك في أفلامه: حدوته مصرية, اسكندريه ليه و عودة الابن الضال.

ابن المغربلين اللي ضحكنا و بكانا و خوفنا و عمل و عمل…… كان في بيته غير كده خالص.

تاريخه فيه الجد و الاحترام هما الطريقين اللي فيه ملهومش تالت. حتى في اختيار زوجته اللي هي الفنانة علوية جميل.

احترمها و احترمته و عاشوا مع بعض حياة مستقرة مخلصين لبعض.

و كان هو أحن عليها من أي حد و مطيع لها جدا على عكس ما كنا نتخيل تماما من انه هيكون الزوج الحاد الطباع.

تاريخ حافل من العطاء الفني وصل لاكتر من 700 فيلم.

لو اتفرجت على دوره في مسلسل العنكبوت هتعرف يعني ايه ابداع ده غير كمان الأيام. أحلام الفتى الطائر و القط الأسود.

توفى فجأة أثناء تصوير فيلم أيوب مع العالمي عمر الشريف.

16) زكي رستم (1903-1972):

زكي رستم

زكي محرم محمود رستم أيقونة الشر في تاريخ السينما المصرية. ابن الذوات اللي فضل التمثيل عن بقاءه في القصور.

فوالده كان أحد البكوات و عضو بالحزب الوطني و جده اللواء محمود رستم باشا.

كانت رغبة أسرته الارستقراطية انه يدخل كلية الحقوق و ده الشيء اللي رفضه هو تماما.

تنقل بين الفرق التمثيلية و قتها و انتهى به الحال في الفرقة القومية. و اختارته احدى الصحف الفرنسية كواحد من أهم عشر فنانين في تاريخ السينما.

طبعا تاريخ فني طويل و قوي من أفلام مصرية منها:

أنا و بناتي, الحرام, خاتم سليمان, بائعة الخبز, أين عمري, نهر الحب, صراع في الوادي و هذا جناه أبي…….

كل الناس اللي اشتغلت معاه تؤكد على قدرته الغريبة على الاندماج في أي شخصيه يعملها فهو فعلا بالف وش.

من عظماء التمثيل في تاريخ السينما و مكدبتش مجلة لايف الامريكية لما قالت عليه أعظم فناني الشرق.

تشهد عمارة يعقوبيان الشهيرة على تاريخ هذا الرجل الفني الكبير و حياته الخاصة الهادية.

عازب السينما كما تحمل الكلمة من معنى, لم يتزوج و عاش مع خدمه و كلبه أصيب بضعف السمع لفترة كبيرة الى أن توفى في عام 1972.

17) جورج أبيض (1880-1959):

جورج أبيض

الفكرة هنا ان جورج ابيض عمرنا ما شفنا له أي عمل فني.

بس الفرقة اللي عملها تقريبا مفيش فنان في مصر وقتها الا لما لازم يكون عدا عليها.

اسمه الحقيقي جورج الياس أبيض و مراته دولت أبيض أخدت لقبها منه. لبناني الأصل.

هو من قدم أول فيلم غنائي مصري و هو أول نقيب للممثلين.

اتعلم الفن في فرنسا و الخديوي عباس هو اللي بعته هناك يتعلم الفن.

المسرحيات اللي نسمع عنها انه عملها كلها في الأصل من روايات الأدب العالمي زي عطيل, أوديب و تاجر البندقية.

منحه الملك فاروق عام 1945 البكوية.

طبعا جورج أبيض اسم بنسمعه كتير جدا علشان كده حبينا نلقي الضوء عن نبذة بسيطة عن حياته.

18) حلمي رفلة (1909-1978):

حلمي رفله

بدأ حياته كماكيير ليصبح واحد من أهم مخرجين مصر.

ألف مجموعة من الأفلام أهمها المفتش العم. و أخرج مجموعة كبيرة جدا من الأفلام.

اخرج أفلام مصرية زي:

فاطمة و ماريكا و راشيل, خطيب ماما, الحموات الفاتنات, أبو الدهب, معبودة الجماهير و مكالمة بعد منتصف الليل.

من انتاحه: شارع الحب, نهر الحب, احنا التلامذة و السبع بنات.

19) هنري بركات (1914-1997):

هنري بركات

هو شيخ المخرجين و من أثرهم غزارة في الانتاج الفني. تم تكريمه في العديد من المهرجانات.

حاصل على ليسانس الحقوق و تعلم الاخراج في فرنسا.

أصله لبناني. وثقت فيه آسيا داغر و بالفعل مخذلهاش فقدم للسينما أسطول من الأعمال الخالدة.

أخرج أفلام مصرية زي:

ليلة القبض على فاطمة, معلش يازهر, لحن الخلود,الحرام, دعاء الكروان, أمير الدهاء, أفواه و أرانب و هذا جناه أبي……

ككاتب سيناريو: اليتيمتين, عفريتة هانم, شاطيء الغرام, ورد الغرام, رسالة غرام و أيام و ليالي………

20) يعقوب صنوع (1839-1912):

يعقوب صنوع

الاسم ده تردد على مسامعنا كتير نت غير ما نعرف عنه حاجة.

هو يعقوب روفائيل صنوع, موليير مصر و رائد المسرح المصري و الصحافة المصرية.

مصري يهودي درس الفن و الادب في ايطاليا من مواليد الشعرية.

سفره لايطاليا كان مكافأة لقصيدة مدح في الامير يكن حفيد محمد علي باشا اللي كان أبوم مستشار له..

كان بيعلم أولاد الخديوي الفنون و العلوم. درس الاديان السماوية التلاتة و اتعلم 13 لغة.

ترجم العديد من القصائد الاجنبية للعربية و العكس.

أسس أول مسرح مصري عام 1869. و كذلك أول فرقة مصرية مسرحية. و بعدا أنشأ المسرح القومي المصري.

أصدر العديد من الصحف منها الوطن المصري و أبو نضارة.

تم نفيه لأوروبا التي توفى فيها بعد خلاف مع الخديوي على الأوضاع الموجودة بمصر وقتها.

و هناك من يكذب كل ما قيل عن صنوع و أنه افتراء على التاريخ و أن صاحب هذا

الدور في المقام الأول هة شخص يدعى سليم النقاش.

21) آسيا داغر (1901-1086):

آسيا داغر

أشهر منتجة سينما مصرية زمان. لبنانية الأصل.

أسست شركة لوتس فيلم للانتاج و التوزيع السينمائي.

هي خالة الفنانة ماري كوين زوجة المخرج أحمد جلال مؤسس استديو جلال.

هي من قدمت للسينما هنري بركات, حلمي رفلة, حسن الامام, كمال الشيخ و يوسف شاهين و……..

من أبرز أعمالها الناصر صلاح الدين مع يوسف شاهين.

من اعمالها ايضا: رد قلبي و أمير الانتقام.

22) نيازي مصطفى (1910-1986):

نيازي مصطفى

خليط كده طلع نيازي مصطفي من مصري صعيدي من أسيوط لأب سوداني ظابط بالجيش و أم تركية.

اتعلم في المانيا و أخرج عدد ضخم من الافلام. زوج الفنانة الراحلة كوكا. هو اللي قدم للسينما كمال الشيخ و صلاح أبوسيف.

أفلام مصرية:

سي عمر, سر طاقية الاخف, من أين لك هذا,اسماعيل يس طرزان, سلطان, عنترة بن شداد, 30 يوم في السجن, حواء و القرد و العتبة جزاز……

بس كانت نهايته مأساوية. في أواخر أيام تصوير فيلم القرداتي عثر عليه مقتولا في شقته.

طباخه الخاص لقاه مقتول في أوضة نومه و ايدين مربوطين من ورا بكرافته و بقه مقفول بقطعة قماش و شرايين ايده متقطعة.

و قيدت الحادثة ضد مجهول.

23) توجو مزراحي (1901-1986):

توجو مزراحي

يهودي آخر في السينما المصرية. من مواليد الاسكندرية و ايطالي الأصل.

عمل سلسلة اعمال بطلها شخص يهودي في بداية حياته.

بعد اعلان قيام اسرائيل ترك مصر و عاش في ايطاليا خوفا من اتهامه بالصهيونية.

قدم للسينما ليلى مراد و الممثل اليهودي شالوم.

اسس شركة الافلام المصرية. ظهر باسم مستعار في بدايته هو أحمد المشرقي خوفا من أهله.

اخرج للسينما: ليلى بنت الريف و بنت مدارس, شالوم الترجمان, سلفني 3 جنيه, سلامة و أنا طبعي كده ,………

ألف للسينما: نور الدين و البحارة التلاتة, تحيا الستات, قلب امرأة, شالوم الترجمان و العز بهدلة و………

أفلام مصرية ظهر فيها الممثل اليهودي شالوم باسمه: خمسة آلاف و واحد, الترجمان, العز بهدلة و الرياضي.

24) عبد الله أحمد عبد الله (1919-1996):

عبدالله أحمد عبدالله

ميكي ماوس السينما المصرية و واحد من أشهر من أرخوا لها.

هو الكاتب الساخر اللي من غيره كان زمان في معلومات كتيرة جدا موصلتناش.

كان بيعمل برنامج تليفزيوني اسمه “نجوم لها تاريخ” كان غالبا بييجي يوم الجمعة الساعة 3 العصر تقريبا.

و أغلبية الاسماء الي فوق دي مستوحاه من مشاهدتي لهذا البرنامج زمان.

و مازلت أذكر جيدا طريقة كلام ميكي ماوس و لدغة السين البسيطة خالص اللي عنده.

من مواليد باب الشعرية. كان له مقال يومي في جريدة المسا باسم أنت تسأل و ميكي ماوس يجيب.

 هو من اكتشف المترجم أنيس عبيد.

من الظلم تماما أن تتحدث عن السينما المصرية دون أن تذكر هذا العملاق. رحمه الله رحمة واسعة و غفر له.