أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الأولى
perm_identity Mohamed Nabih

query_builder منذ 3 شهور

أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الأولى

في كده مجموعة من الممثلين اللي اتعودت عينينا تشوفهم في أفلام مصرية من غير ما نعرف عنهم حاجة أو حتى نعرف اسمهم.



دول بيسموهم بلغة السينما كومبارسات. شخصيات من غيرها الفيلم ميكملش. الفيلم ميبقاش ليه طعم.

كانوا غالبا ماشيين على خط واحد. الطيب طيب و الشرير شرير. بس ده ممنعش بعضهم انه يغير من وقت للتاني.

و في كمان السنيد اللي عمره ما عمل بطولة بس دايما كان جنب البطل بيسنده. دول بيقولوا عليهم أصحاب الأدوار الثانية.

بس دول خدوا حقهم الى حد ما مقارنة بالكومبارسات اللي فعلا اتظلموا في السينما بشكل كبير.

هنحاول نتعرف في المقال ده على الناس اللي طول عمرنا بنشوفهم و منعرفش عنهم حاجة.

1) محمد فؤاد أمين راتب (1930-1986):

الخواجة بيجو- أفلام مصرية

الخواجة بيجو

أشهر خواجة في السينما المصرية. الخواجة بيجو (بيشو).

المفاجأة هنا انه مكنش خواجة و لا حاجة. كان مصري أصيل من الزقازيق.

أول ما اشتغل كان في مصنع تعبئة شاي و اترقى بعدها لحد ما وصل مدير العلاقات العامة في اتحاد الصناعات المصرية.

كان احد الشخصيات الرئيسية في المسلسل الاذاعي ساعة لقلبك.

و شارك في العديد من الأفلام زي عروس النيل-حماتي ملاك-اسماعيل يس في مستشفى المجانين.

اتقال انه  اصيب بشلل نصفي و اكتئاب قبل وفاته بفترة.

2) ليلى حمدي (1929-1973):

ليلى حمدي

ليلى حمدي

غالبا الناس اللي وزنها تقيل بيبقو خفاف الدم. و ليلى حمدي ينطبق عليها القاعدة دي.

اسم الشهرة بتاعها رفيعة هانم. من سوهاج في الاصل. سبق لها الزواج من الفنان سمير ولي الدين.

ظهرت في ادوار كتير جميلة . تلاقيها مثلا تلميذة مشاغبة لعبدالحليم حافظ في شارع الحب و الخادمة السمينة في سكر هانم.

و كانت مرات محمود المليجي في اسماعيل يس في الاسطول و ام البنتين اللي بيغنوا في فيلم صغيرة على الحب.

3) صفا الجميل (1907-1966):

صفا الجميل

صفا الجميل

طبعا ده لا يمكن ننساه. اسمه الحقيقي صفاء الدين حسين زكي و الاسم الاشهر ليه بالنسبة لينا نوفل.

يقال انه مكانش معاق ذهنيا و لا حاجة. اكتشفو محمد عبدالوهاب و قدمه في فيلم يحيا الحب.

من ادواره المميزة حرنكش ابن زينات صدقي في فيلم دهب. و فيلم سلامه في خير لما كان دايما ينشز ورا شرفنطح.

و مثل كمان في افلام تانية زي سلفني 3 جنيه و غزل البنات.

هو مرتجل مقولة شرف البنت زي عود الكبريت في فيلم شباك حبيبي و اللي كان فيه بداية تسميته نوفل.

سبق ليه حب ليلى مراد و أسمهان لكن حب من طرف واحد و كأنها قصة في أفلام مصرية.

4) ملك الجمل (1929-1982):

ملك الجمل

ملك الجمل

غالبا كانت بتيجي في دور شرير. بورسعيدية الاصل و خريجة آداب.

ليها اعمال كتير جدا في المسرح, الاذاعة و السينما.

زي القوادة في شفيقة و متولي, المتذمتة في حكاية بنت اسمها مرمر و الخاطبة في فيلم اسماعيل يس في الاسطول.

و من اهم اعمالها خالتي بمبه الرغاية مع ابو سيد (رافت فهيم) في الاذاعة في برنامج ربات البيوت بتاع صفية المهندس.

 5) حسني عبدالجليل (1928-2001):

حسني عبدالجليل

حسني عبدالجليل

أول ما تشوفه لازم تخاف و تفتكر ادواره الشريرة.

خاصة دوره في مسلسل هند و الدكتور نعمان و نظرات عينيه للطفلة ليزا مع صوته الاجش.

كان حاصل على دبلوم فني. اشتغل في بعض الافلام زي خمسة باب و مستر كاراتيه و الرجل الابيض المتوسط.

و مثل كمان في ارابيسك و يوميات ونيس و البخيل و أنا.

 6) جمالات زايد (1919-1980):

جمالات زايد

جمالات زايد

كانت كوميديانة صاروخ الصراحة.

لا يمكن تنسالها أبدا الدور اللي كانت فيه أم عبد المنعم ابراهيم و فرحات في فيلم سر طاقية الاخفاء.

كانت أخت آمال زايد اللي كانت مرات سي السيد في الفيلم.

و خالة معالي زايد في الحقيقة و سبق ليها الزواج من الفنان محمد الديب.

أي حد كان بيسمع الاذاعة لازم يكون عارفها لو مكنش من خلال أم بندق في سلعة لقلبك هيبقا عن طريق أم علي في عيلة مرزوق.

عملت طبعا مجموعة أفلام مصرية في السينما منها الستات ميعرفوش يكدبوا, عريس مراتي, فاطمة و ماريكا و راشيل و الآنسة حنفي.

 7) محمد شوقي (1915-1984):

محمد شوقي

محمد شوقي

كان دايما رجل أصيل و ابن بلد و من أشهر الناس اللي عملت دور الخادم في السينما.

اتولد في حي بولاق. اشتغل بهيئة المساحة بديوان محافظة أسيوط و سبق الجواز ليه مرتين.

بدأ في فرقة الكسار و جت له فرصة ذهبية لما اختلف على حسين مع الكسار.

و أسند الدور لفنانا محمد شوقي اللي قام بيه على أكمل وجه.

اشتغل بعدها في فرقة شكوكو ثم الريحاني.

ليه حوالي 250 فيلم منهم سكر هانم, عصابة حمادة و توتو, القطط السمان و اسماعيل يس في الطيران.

أصيب بالتهاب كبدي في آخر أيامه.

لدرجة انه وقع على المسرح أثناء تأدية دوره في مسرحية هات و خد مع حسن يوسف.

اتنقل المستشفى و توفى بعدها بأسبوع تقريبا.

8) فايزة عبدالجواد (1945-2016):

فايزة عبد الجواد

فايزة عبد الجواد

أشهر كومبارسات السينما و تحديدا أشهر روصية دماغ.

ضربت نص فنانات مصر تقريبا و كان ظهورها في السينما أمر معتاد لينا جدا من غير ما نعرف اسمها.

تم اكتشافها بالصدفه لما كان رشدي أباظة بيصور فيلم تمر حنة في المنطقة اللي ساكنه فيها.

شافها و قدمها لنا لتصبح أشهر كومبارس يظهر في أفلام مصرية على الاطلاق.

كانت بارعة في أداء دور السجانة اللي عملته أكتر من مرة.

زي فيلم حب في الزنزانة و أحيانا كمان دور السجينة اللي لازم تضرب البطلة معاها في السجن زي فيلم نساء خلف القضبان.

تم تكريمها عام 2004 من قبل مهرجان الاسكندرية السينمائي.

اشتغلت أفلام كتير زي هنا القاهرة مع محمد صبحي و من أشهر مسلسلاتها بكيزة و زغلول.

9) عبدالمنعم اسماعيل (1907-1970):

عبد المنعم اسماعيل

عبد المنعم اسماعيل

كان دايما دور المعلم ابن البلد و كان خفيف الظل لحد كبير.

كذلك ظهر بدور الشرير في بعض الأفلام. شارك في حوالي 260 عمل.

أبرز أدواره في فيلم قنديل أم هاشم و الزوج العاذب.

كمان ظهر في عنتر و لبلب, اسماعيل يس في مستشفى المجانين و لهاليبو.

اتقال و الله أعلم انه مات منتحر بالقاء نفسه في النيل لضيق المعيشة.

 10) فكتوريا كوهين (1891-1966):

كانت يهودية شكلا و موضوعا.

فكتوريا كوهين

فكتوريا كوهين

فهي يهودية الاصل و كمان سينمائيا كانت تيجي دايما في دور اليهودية.

اشتهرت كمان بدور البخيلة.

اشتغلت في فرقة يوسف وهبي و الريحاني و أول ما ظهرت كان في فيلم برسوم يبحث عن وظيفة.

من أعمالها المسرحية الجميلة أنا و هو و هي و مسرحية أنا فين و انت فين و في أفلام مصرية شفناها فيها زي: قصر الشوق و رابعة العدوية.

 11) زكريا موافي (1936-1988):

زكريا موافي

زكريا موافي

“الحاج عبدالموجود موجود” محدش يقدر ينسا الافيه ده.

كان في مسرحية سك على بناتك اللي كان اسمه فيها كريم و اللي اشتهر به الفنان الجميل زكريا موافي.

خريج طب بيطري و اشتغل مع الثلاثي فمثلا متنسالوش أبدا المتزوجون مع سمير غانم و جورج سيدهم اللي كان جوز بنته.

من أحلى أفلامه احترس من الخط, يارب ولد و فيفا زلاطا.

 12) سعاد أحمد (1907-1962):

سعاد أحمد

سعاد أحمد

نظرة شديدة من أم حميدة و بصوت عالي تقول “حنفي”.

و يرد عليها عبدالفتاح القصري “خلاص تنزل المرادي” و هي دي الرائعة سعاد أحمد.

كان و لازال من أشهر مشاهد السينما المصرية في فيلم ابن حميدو.

بدأت منولوجست في شارع عماد الدين و بعدها قدمها توجو مزراحي للسينما.

من أفلامها أيضا الافوكاتو مديحة و عنتر و لبلب.

 13) زكي ابراهيم (1884-1971):

زكي ابراهيم

زكي ابراهيم

عمرك ما شفته الا شخصية وقورة و عاقلة مكانش بتاع هلس. كان تركي الاصل و بدأ الفن كبير في السن.

كان ضابط شرطة و أنهى خدمته لما اصيب في عينه. ألف مسرحية اسمها شيخ البلد و فيلم شالوم الترجمان.

بنته هي الممثلة هدى زكي اللي اشتهرت بدور ناعسة مرات الشيخ سنطاوي في مسلسل عادات و تقاليد.

و حفيدته هي الفنانة تحية حافظ بنت الفنانة هدى زكي اللي ظهرت في عدد أفلام مصرية مش قليل.

من أبرز أعماله عفريتة هانم اللي قدم فيه دور العفريت, أمير الانتقام و كان فيه مع أنور وجدي في السجن, لحن الوفاء و أرض النفاق.

14) زكية ابراهيم (1901-1970):

زكية ابراهيم

زكية ابراهيم

ظهرت كتير في دور الحماة الصعبة خاصة مع علي الكسار زي سلفني 3 جنيه و علي بابا و الأربعين حرامي.

كمان ليها كده ربطة منديل مميزة فوق دماغها. كانت بتحب الكسار و متجوزتوش.

ليها فيلم جميل جدا مع اسماعيل يس اسمه ليلة الدخلة.

من القصص اللي اتقالت عنها:

انها كانت صديقة حكمت فهمي الجاسوسة (لحساب القوات الالمانية ضد الحلفاء) اللي اتقبض عليها.

و كانت عملت معاها فيلم العزيمة و كانت دايما تودها و تخدمها.

15) طوسون معتمد (1925-1990):

طوسون معتمد

طوسون معتمد

شرير ملوش حل و رئيس عصابة محنك, وجوده يعني عنصر الشر في الفيلم.

من أبرز أفلامه الأرض, عصابة حمادة و توتو, حب في الزنزانة و دعاء الكروان.

16) منيرفا:

منيرة أحمد خشبة من أجمل الوجوه اللي ظهرت في السينما المصرية لكن مخدتش أدوار كبيرة أبدا.

منيرفا

منيرفا

كانت ممثلة و راقصة. ليها أكتر من 20 عمل.

بدايتها كانت في فيلم أنقذوا هذه العائلة سنة 1979 و اعتزلت بفيلم قدارة 1994.

من أهم أعمالها سلام يا صاحبي, ليلة بكى فيها القمر , مين فينا الحرامي, عفوا زوجتي العزيزة و احترس عصابة النساء.

17) محمد درديري:

محمد درديري

محمد درديري

كان طبيب بالتليفزيون قبل ما يشتغل في السينما.

الشيخ شرف في فيلم وداعا بونابرت هو ده محمد درديري.

طبعا فاكرين الصحفي  المعارض اللي حقق معاه أحمد ذكي في زوجة رجل مهم.

المدمن في فارس و بني خيبان. الظابط الجدع في الدنيا على جناح يمامة.

كل التنوع ده معناه انه كان موهوب فعلا.

من أقوى افيهاته القانون ينص يا ربع يا تمن و كذلك افيه اطمئن في الافوكاتو.

من أعماله أيضا الفرسان, فريسكا, الأفوكاتو و الدنيا على جناح يمامة. توفي عام 2015.

18) فاطمة كشري:

فاطمة كشري

فاطمة كشري

اسمها ده أخده نور الشريف لعبلة كامل في لن أعيش في جلباب أبي.

و هو اسم مش من فراغ لان عيلتها فعلا بياعين كشري.بس اسمها الحقيقي فاطمة السيد عوض.

كانت مبتعرفش تقرا و تكتب لكن بتحفظ دورها كويس.

حكوا عنها ان سعيد حامد طردها من البلاتوه في مسلسل عيش أيامك عشان تركيزها بس نور الشريف اتوسط و رجعها.

ليها أفلام كتير جدا منها:

الحرب العالمية التالتة لما عملت ريا و سكينة و هما بيعملو كل حاجة مع بعض.

و الست اللي ضربت أحمد مكي و هو طالع من البحر عايز ياكل في لا تراجع و لا استسلام.

19) محمد التاجي:

محمد التاجي

محمد التاجي

كان دمه خفيف أوي بصراحة. هو حفيد الفنان الكبير عبدالوارث عسر لأمه.

بدأ الشغل في السبعينيات و ساعده جسمه على الظهور في أدوار كوميدية جميلة.

شارك في كتير من الاعمال زي بوابة الحلواني و الزيني بركات.

و عمل مسرحية أخويا هايص و أنا لايص و لا يمكن ننسا دوره المتميز في مسلسل البشاير.

ربنا يطول في عمره.

20) ثريا فخري (1914-1966):

ثريا فخري

ثريا فخري

مصرية من أصل لبناني. أشهر دادة في السينما المصرية.

بدأت في فرقة علي الكسار و عملت حوالي 32 مسرحية.

ثروتها كلها راحت للأوقاف لان مكنش في حد يورثها.

تزوجت من محاسب الفنانين محمد توفيق و كذلك من فؤاد فهيم.

عملت طبعا أفلام مصرية كتير زي: حسن و ماريكا, بين السما و الأرض و اسماعيل يس طرزان.

اشتغلت في السينما الامريكية بعض الافلام.

 

Mohamed Nabih مقالات الكاتب

طبيب بشري- بكالريوس الطب و الجراحة (جامعة المنصورة)-ماجستير جراحة العظام (جامعة قناة السويس)

اكتب تعليق