أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الخامسة
perm_identity Mohamed Nabih

query_builder منذ 3 شهور

أفلام مصرية بين كومبارسات منسية و أدوار تانية و ثانوية أو بطولات مخفية-الحلقة الخامسة

شوفت كتير أفلام مصرية و مسلسلات و شفت فيها كتير نجوم و كمان مش نجوم.

عرفت عنهم حاجة؟ بيتهيألى لأ. هنعرفك شوية حاجات عن مجموعة جديدة في المقال ده.

كلمة أفلام مصرية دي كلمة مش قليلة, هي لوحدها عالم تاني موازي لعالمنا.

81) محمود الزهيري (1922-1992):

محمود الزهيري

محمود الزهيري

من أبرز أدواره الدكتور أيوب صاحب فكرة الفنكوش مع عادل امام في فيلم واحده بواحدة.

من مواليد المنصورة (قرية منية محلة دمنة). شارك فيما يقري من 70 فيلم.

من المسلسلات اللي شارك فيها القاهرة و الناس.

من اعماله أيضا تجيبها كده تجيلها كده هي كده, الحب تحت المطر, مولد يا دنيا, الحب فوق هضبة الهرم, ضربة شمس و الرجل الذي عطس.

أصيب بالشلل قبل وفاته.

82) نعيمة الصغير (1931-1991):

نعيمة الصغير

نعيمة الصغير

شخصية شديدة في أي دور تلعبه سواء أم أو حماه بصوت خشن يخوفك.

هي الاسكندرانية نعيمة عبدالجواد.

عملت كمنولوجست مع زوجها محمد الصغير في البداية.

و بالفعل كانت بتغني لدرجة ان حسن الامام اسند لها دور مطربة في فيلم اليتيمتين.

و في حكاية غريبة بتقول ان واحده من زمايلها حطتلها مادة في الشاي أثرت على الاحبال الصوتية.

من أبرز أعمالها القاهرة 30, مولد يا دنيا, اسكندرية ليه,حب في الزنزانة.

و طبعا الشقة من حق الزوجة مع محمود عبدالعزيز و معالي زايد.

ده غير الكتعة في العفاريت مع عمرو دياب.

83) عمران بحر (1930-2007):

عمران بحر

عمران بحر

البواب, الخادم, تاجر الفاكهة و الصعيدي دي الأدوار اللي كان بيظهر بها عم عمران بحر.

بدأ مسيرته في الخمسينات و له أكتر من 90 عمل تليفزيوني.

من اعماله اوعى وشك, أريد خلعا, النوم في العسل, خمسة باب و في بيتنا رجل. و كان له دور في مسرحية عفروتو.

من المسلسلات العصيان, ذئاب الجبل و الرجل الآخر.

84) نبوية مصطفى:

نبوية مصطفى

نبوية مصطفى

كانت راقصة استعراضية و تزوجت من الفنان مختار حسين. هي أم الصحفية بهيرة مختار.

من أفلامها خضرة و السندباد قبلي, عدو المرأة, حماتي قنبلة ذرية و الافوكاتو مديحة.

85) مختار حسين (1904-1966):

مختار حسين

مختار حسين

في الاصل رافع أثقال و حصل على بطولة لوكسمبورج عام 1931. و شارك في أوليمبياد برلين 1936.

هو زوج الفنانة نبوية مصطفى. دمياطي الاصل. هو مدرب السويد عام 1951 و لبنان 1959.

من أعماله شجرة الدر, قلبي دليلي, المليونير, شمشون, عنتر و لبلب و العيش و الملح.

86) فاتن شعبان:

فاتن شعبان

فاتن شعبان

من خفيفات الظل في السينما و التليفزيون. “الواد كان عنده حق عرفة الجامع” ده كان اعلان هي عملته و هو ده اللي كان بداية تعرفنا عليها.

من مواليد الجيزة عام 1966.

خريجة المعهد العالي للفنون المسرحية.

اشتركت في بعض الأفلام زي شجيع السيما, الارهاب و الكباب, بخيت و عديلة و النمس.

المسلسلات زي ساحرة الجنوب, نونا المأزونة, راجل و ست ستات و مزاج الخير.

87) لطفي الحكيم (1901-1982):

لطفي الحكيم- أفلام مصرية

لطفي الحكيم

الغزولي في فيلم الفتوة هو أشهر أدواره و اللي كان فيه التاجر اللي هيستخدم لضرب المعلم أبوزيد في السوق.

بدأ في فرقة رمسيس.

من اعماله المجانين في نعيم و عمل فيه عم اسماعيل يس, اللص و الكلاب ( هو كان الساكن الجديد), دعاء الكروان، دهب و حسن و نعيمة.

و الافيه المشهور بتاعة “يا فيلسوف الحمير يا ترعة المفهومية” في فيلم المليونير الفقير.

88) نسرين:

نسرين

نسرين

لما تشوفها هتقول عليها فعلا انها من أجمل نساء الأرض.

و هتتأكد فعلا انها رمز للأنوثة و الرقة لما تعرف انها خريجة الكونسرفتوار.

نسرين محمد عبدالسلام من مواليد 1960.

تزوجت من الفنان الموهوب محسن محيي الدين و اعتزلت مع اعتزاله.

من أشهر أفلامها و أشهر أفلام السينما على الاطلاق فيلم الحفيد.

ظهرت في أفلام مصرية بعدد بسيط لمن مابننسهاش أبدا.

و لعبت أدوار جميلة في مسلسلات من ركائز الدراما المصرية منها الشهد و الدموع, المشربية و رحلة السيد أبو العلا البشري.

89) عثمان محمد علي:

عثمان محمد علي

عثمان محمد علي

اسكندراني من مواليد 1935. هو والد الفنانة سلوى عثمان.

بدأ كمصحح للغة و النطق في كلية الاعلام ثم موظف في أحد البنوك.

شارك في أعمال ضخمة الامام الشافعي, رأفت الهجان, لن أعيش في جلباب أبي, العراف و عائلة الحاج متولي.

من أفلامه أمن دولة و شجيع السيما.

90) علوية جميل (1910-1994):

علوية جميل

علوية جميل

نظرة حادة و صوت يميل للقسوة دول كانوا أهم سماتها.

ولدت الكبيرة رائدة المسرح في طماي الزهايرة بلد كوكب الشرق.

إليا صابات خليل مجدلاني هو اسمها الحقيقي هي الحقيقة أصلها لبناني.

و كفنانين كتير غيرها التحقت بفرقة رمسيس.

تزوجت قبل القدير محمود المليجي شخص أنجبت منه كل أبنائها و لكن لم تنجب من المليجي.

كانت علوية أكبر منه سنا و متسلطة الى حد كبير و هو كان دايما ينفذ أوامرها.

برعت في أدوار الشخصية القوية و الشريرة:

القصر الملعون, الحبيب المجهول, ليلى بنت الاغنياء و يوم سعيد. و ده جزء صغير من انتاجها الغزير للسينما.

أي أفلام مصرية تظهر فيها هي أفلام تقيلة مؤكد و بلا شك.

91) أحمد لوكسر (1930-1994):

أحمد لوكسر

أحمد لوكسر

اسكندراني الاصل بدأ شغله في المينا في اسكندرية و بعدها في مديرية الطرق بالقاهرة.

التحق بالمعهد العالي للتمثيل

كان كتير ييجي في دور وكيل النيابة و ساعده على كده وسامته و وقاره لما بيتكلم.

من أفلامه يوم من عمري, بئر الخيانة, سلام يا صاحبي, الشيماء و وكالة البلح.

92) عائشة الكيلاني:

عائشة الكيلاني

عائشة الكيلاني

صحيح شكلا مكنتش حلوة لكن خفة دمها محصلتش.

كفاية بس اللي عملته في المنتصر بالله و محمد صبحي في فيلم الشيطانة التي أحبتني بتاع أبناء كوزموس.

مواليد القاهرة 1954 بكالريوس المعهد العالي للفنون

. و أفلامها متتعدش: سمك لبن تمر هندي, الارهاب و الكباب, الراية الحمرا و كيد العوالم……

مسلسلاتها: الفرسان, رأفت الهجان, أرابيسك و العطار و السبع بنات.

عملت عمليات تجميل مؤخرا و معندهاش مشكلة انها تتكلم عن الموضوع ده.

بس فعلا شكلها اختلف كتير أوي عن زمان.

93) نصر زينهم:

نصر زينهم

نصر زينهم

فنان ظهر في الثمانينات و سافر الخليج في نهايتها و اختفى تماما عننا في التسعينات.

يعني من أفلام مصرية الى أعمال خليجية و بعدها التوقف.

هو زيكو مع عادل امام في عنتر شايل سيفه.

و كمان عمل 4-2-4, ده غير مسلسل الزير سالم و دموع في عيون وقحة.

94) نعيمة وصفي (1923-1983):

نعيمه وصفي

نعيمه وصفي

لو تفتكر الست اللي ضربت شجرة الدر بالقبقاب لحد ما ماتت في فيلم واإسلاماه.

من مواليد ديروط في صعيد مصر. و حصلت على دبلوم تمثيل.

تخرجت من مدرسة المعلمات و شجعها على التمثيل الفنانة نجمة ابراهيم.

و والدها كان مهندس كبير في شركة ري فرنسية.

تزوجت من الصحفي عبدالحميد سرايا. الذي ورثته بقصيدة بعد وفاته.

لمعت جدا في المسرح اللي عملت فيه أم رتيبة على سبيل المثال.

كانت كمان بتكتب شعر باحترافية شديدة و حصلت على بعض الجوائز في كتابة الشعر.

الى جانب مقال اسبوعي بجريدة روزاليوسف.

من أشهر أدوارها دور الخرساء في فيلم رصيف نمرة خمسة مع الراحل فريد شوقي.

و لها مجموعة كبيرة من الأفلام منها:

بين السما و الأرض, الفتوة, واإسلاماه, تفاحة آدم و حبيبي دائما اللي قامت فيه بدور الجدة العثمانلية.

وجودها لوحده عمل ثقل في أفلام مصرية كتير. كمان في التليفزيون عملت حكاية ميزو و مبروك جالك ولد.

95) محمد عيد:

محمد عيد

محمد عيد

الصغير ده اللي تحبه أول ما تشوفه.

دوره الجميل مع أحمد آدم في الرجل الأبيض المتوسط لا يمكن تنساه أخو نشوى مصطفى في الفيلم.

و وظفوه بشكل جميل جدا في اديني عقلك و الحقونا في الكاميرا الخفية في رمضان.

96) نبوية سعيد (1912-1995):

نبوية سعيد

نبوية سعيد

من أشهر عواجيز السينما المصرية و التليفزيون. في الأصل عازفة كامانجا. صاحبة جملة “جاموستي يا عمدة” في فيلم الزوجة الثانية اللي قامت فيه بدور أم أبو العلا شكري سرحان.

و كمان كانت زوجة محمود المليجي في فيلم الأرض.

و كانت تقدر تعمل كوميديا لو طلب منها ده. كانت هي أم عادل امام في زوج تحت الطلب.

اشتغلت كمان في رأفت الهجان,صابر يا عم صابر, ساكن قصادي و حكاية ميزو.

ومن كلاسيكيات السينما اللي عملت فيهم: أفواه و أرانب, الإنس و الجن, أبو كرتونة, العرافة و الليلة الموعودة و أفلام مصرية تانية كتير.

97) سيف الله مختار (1921-1989):

سيف الله مختار

سيف الله مختار

“أباه” بيقولها بطريقة معينة متعرفش تعملها زيه أبدا. من الكلمات اللي أشتهر بها الفنان سيف الله مختار.

الحقيقة هو كان كوميديان من الطراز التقيل يقدر ينتزع ضحكتك رغم أنفك. ظهر في دور القهوجي, صبي الراقصة و الجرسون و أدوار تانية كتير مميزة.

من أفلامه رجب فوق صفيح ساخن, رمضان فوق البركان, ممنوع في ليلة الدخلة و مولد يا دنيا.

اشترك في بعض المسلسلات زي كابتن جودة و رحلة المليون. و من افيهاته المشهورة “انتو يا بتوع البنزينة” في فيلم محطة الأنس.

98) فردوس محمد (1906-1961):

فردوس محمد

فردوس محمد

من أطيب الممثلين في جميع أدوارها تقريبا. عملت أفلام مصرية كتير كل أدوارها فيها أم حنينة.

كانت دايما الأم اللي بتخاف على ولادها و كانت بتدعيلهم أدعية تحس فعلا انها من القلب.

من مواليد حي المغربلين بالقاهرة. لقبت بأم السينما المصرية. بس الحنية الزايدة دي مجتش من فراغ.

عاشت الفنانة العظيمة طفولة صعبة لانها كانت يتيمة الأب و الأم. و رباها أسرة تانية ذات صلة قرابة. هي أسرة الشيخ علي يوسف مؤسس جريدة المؤيد.

و من الواضح ان الأسرة دي أحسنت التربية عشان قدرت تطلع انسانة سوية بالطيبة دي.

تزوجت من الفنان محمد ادريس و لم تنجب اطفالا و لكنها كانت دايما أم السينما المصرية.

الجوازة دي كان لها سبب غريب بعض الشيء. كان في عرض لفرقتها هيتعمل في فلسطين و كان القانون وقتها يمنع السفر لغير المتزوجات.

فاقترحوا انها تتجوز حد من الفرقة و كان الشخص ده هو محمد ادريس اللي بعد ما اتجوزها صوري الموضوع قلب معاه حقيقة ليعلنوا فعلا الزواج رسميا.

لها مجموعة كبيرة من الأفلام اللي هنذكر بعضها: سلامة في خير, ليلى بنت الريف, سفير جهنم, أبو حلموس, غزل البنات, شباب امرأة و رد قلبي.

توفت سنة 1961 بعد صراع مع مرض السرطان.

99) محسن حسنين (1916-1978):

محسن حسنين

محسن حسنين

ميفرقش كتير عن طوسون معتمد و محمد الديب و المجموعة دي من الفنانين اللي اشتهروا دايما بدور رجل العصابات.

اسكندراني ابن بلد والده كان خياط و له 6 من الاخوة و الاخوات. دخل عالم الفن بمساعدة الفنان عبدالمنعم اسماعيل بعد ما عانى أيام كتير من الفقر و النوم في محطات القطارات لحد ما قابل عبدالمنعم اسماعيل في كازينو القصبجي.

له عدد من االافلام لا حصر لها. من أفلامه المجانين في نعيم, اجازة نص السنة, ريا و سكينة, سماره و الفتوة

100) كاميليا (1919-1950):

كاميليا

كاميليا

من دلوعات السينما المصرية و من جميلاتها كمان.

تنقلت بين قبرص و الاسكندرية تحديدا في الأزاريطه. لان أصولها من الأم قبرصية و مولوده في اسكندرية. و اسمها الحقيقي “ليليان فيكتور ليفي كوهين”.

و الاسم ده اسمها لزوج أمها الصايغ اليهودي الأصل اللي اتعرف على أمها المسيحية الكاثولوكية و اتجوزها.

و اختلفت الروايات عن هوية الأب ما بين مهندس فرنسي كان شغال في قناة السويس.

و قالوا انه تاجر ايطالي هرب لبلده بعد خساير في البورصة.

و كمان اتقال انها مولودة لحمل بدون زواج.

و لما لمعت في سماء الفن كان في اشاعة جامدة عن علاقتها بالملك فاروق, مما أثار جدل كبير وقتها. خاصة انها كانت نسبت لرجل من أصول يهودية.

و في الوقت ده كانت هي الأعلى أجرا بين الممثلين.

أفلام مصرية: خيال أمرأة, الروح و الجسد, المليونير و قمر 14.

و لها فيلم انتاج بريطاني باسم “cairo road”.

و عمل عاطف سالم فيلم عن حياتها هو “حافية على جسر الذهب”.

وفاتها:

و في مرة كانت مسافرة روما متجهة لسويسرا بعدها عشان تشوف حل لآلام معدتها المستمرة.

و فجأة انفجرت الطيارة عند البحيرة ليسدل الستار عن حياة الفنانة الجميلة.

الطيارة اللي كان من المفروض هيبقا عليها الكاتب الكبير أنيس منصور و لظروف خاصة اعتذر.

و بالتالي تلاقي كاميليا حجز على الطائرة لتلقي حتفها بانفجارها.

و محدش أكد أو نفى حتى الآن هل ده تفجير كان مقصود و مدبر بفعل مخابرات أو مجرد حادث عارض؟

حكايات كتير اتقالت في الموضوع ده منها ان اليهود هما اللي دبرول الموضوع ده ردا على كاميليا في أكتر من حاجة.

انها مثلا اعترفت للجميع بمسيحيتها و نفيها التام لكونها يهودية.

و غير كده كمان يقال انها رفضت تتعاون معاهم.

مش كده و بس ده كاميليا وصلها معلومات عن تجنيد راقية ابراهيم لدى المخابرات الاسرائيلية و التخطيط لاغتيال عالمة الذرة سميرة موسى.

و كانت عايزة تبلغ المعلومات دي للمصريين.

ادعاء تاني بيقول ان كان لدى الملك فاروق رغبة في الانتقام لتفضيلها للفنان رشدي أباظه عن الملك.

و حاولت الجهات السياسية في مصر الصاق تهمة تورطها في صفقة الاسلحة الفاسدة في حرب 48.

و لكن تراجع الملك عن تأييد الفكرة دي لان كان بمنتهى السهولة كان ممكن يتقال عليه خاين هو كمان لما كانت تجمعهم من صداقة.

لكن قصة اعتذار الكاتب أنيس منصور و التحاق كاميليا بحجز الطيارة على آخر لحظة ممكن ينهي نظرية العمل المدبر من الأساس.

لان التساءل هنا هل من الممكن تدبير تلغيم طيارة بالسرعة دي و في الوقت القصير ده ؟

 

Mohamed Nabih مقالات الكاتب

طبيب بشري- بكالريوس الطب و الجراحة (جامعة المنصورة)-ماجستير جراحة العظام (جامعة قناة السويس)

اكتب تعليق