اكبر بقى ..اكبرى بقى .. الطفولة؛ و أسباب السعادةالمتعددة التى لا ترتبط بمرحلة عمرية محددة

اكبرى بقى انتى مبقتيش صغيرة؛ جملة سمعتها كتير من أمى حبيبتى وغالبا كنت بتخانق معاها لأنى كنت معترضة عليها، بدأت أسمعها من بداية مرحلة الثانوية، أنا كبرت لازم أكون عاقلة أكتر ويبقى عندى وقار وأقعد فى مكانى زى أى بنوته جميلة رقيقة وابطل العب مع الأطفال وأقعد وسطهم وأسيب الكبار، لأنى عنيدة ومبحبش أخد الكلام بمسلماته وبيعجبنى مبدأ نحن نختلف عن الآخرين كنت بشوف إنى معملتش حاجه خطأ وكنت بقول دى مبالغة الأمهات وخاصة مع البنات عشان انطباع الناس عنها متبقاش بتتصرف زى الولاد والجو دا،كنت ببقى على طبيعتى وبس.

لما خلصت مرحلة الجامعة (رسميا آخر محطات الطفولة) واحتكيت بالناس وبقيت أعرف كتير عن البلد والأوضاع والسياسة والغلاء والمسئوليات والجرائم والموت، كلمات مكنتش بفكر أوى فيها، ولما أدامى أصحابى اتجوزوا وخلفوا واتهدوا، ولما ابتدينا نفكر فى المادة  وهنعيش إزاى وبكره هنعمل إيه، ولما كل حاجه كنت بتعملها مع اصحابك من قريب وانت فى الجامعة بقت أصعب دلوقتى وأقل أو فى حاجه اتغيرت فى طعمها ويمكن احنا اللى اتغيرنا مع تطور الاحداث فى حياتنا. عرفت إنى كبرت وكنت برجع اقول لأمى كنتى عاوزانى أكبر ادينى كبرت اهه.

يعنى إيه أنا كبرت؟

معنى إنى كبرت إنى عرفت حاجات كتير مكنتش عاوزة أعرفها ومريت بمواقف مكنتش عاوزة أمر بيها، وفقدت ناس حبيتها ومبقتش عارفه أحس بإيه ساعتها،وإنى ببقى عاجزة عن اشياء كتير أقف أدامها وأواجهها، وبدأت أفكر كتير وأسمع كتير وأحبط كتير وأتعصب بسرعه واكتئب أسرع ،وأسمع آلام الناس واندهش إزاى قدروا يتحملوا وميبانش عليهم، وإنى عشان أنا كبيرة لازم أتحمل وأحاول مبكيش وأبقى جامده وقويه ،وبقيت أخاف كتيييييييييييير،ولما أتكلم مع الناس وتطلع فى دماغى أفكار حلوة نكسر بيها الملل ويجيلى الرد إيه العبط دا انتى مجنونه ،اعقلى ربنا يهديكى، أكيد يعنى مش هقترح حاجه تجيبلى كارثه أو تضرنى أو تضر غيرى لكن مش عارفه الناس بقت تكسل او محبطه بزيادة وبتلف فى نفس العجلة بنفس النمط.

إنك تشيل مسئوليات طبعا دا معناه انك اكيد اكيد كبرت.كل ألم صغير أو كبير بمر بيه ويسيب علامة فيا معنوية أو جسدية بيكبرنى أكتر، وإنى بقيت مادام فلازم فكرى بس يبقى فى الطبيخ والغسيل والبيت وبس وبصراحه مش دا ممتع أوى زى ما كان وانا صغيرة أصلها كانت مجرد لعب بلاستيك هههههه .كنت بحس دايما إن دا اللى ممكن تكون أمى محتاجاه منى أو جزء منه او الناس بتدور عليه بجمله كل سن وليه سماته .كان عندها حق فى حاجات طبعا.

أنا كده وقد قررت

أنا مجنونة نص نص أو طفولية أوى عن بقية البنات بس أنا كده مبعرفش أكون حد تانى ولما بكون غير كده مش بعرف نفسى ومش بكون مرتاحه تماما.
المثير للهستيريا إننا دلوقتى عندنا شلالات حنييييييييييييين إلى الماضى وإلى الطفوله ونفسنا نرجع ،كل ما نكبر فى العمر بنحن لطفولتنا أكتر، هأتمسك بطفولة شخصيتى لأن لها أوقاتها اللى بتنفع فيها.

أنا حاليا يوم عن يوم بزداد نضج وبفهم الحياة والناس أكتر وأكتر وبتعلم ودا معنديش مشكله فيه لكن كمان قررت إنى مش عاوزة أكبر جوه كمان أنا بالفعل بكبر من بره عاوزة أسيب قلبى طفل وميهمنيش رأى الناس طالما مش بغضب ربنا ولا بضر غيرى كل حاجه صغيرة أو كبيرة بتسعدنى وبتفرحنى هعملها وهسيبنى من كلمة اختشى على سنك لأن فى حاجات مفيهاش عيب ولا حاجه بس الناس حاطه حواجز كتير على نفسها معرفش ليه!!!!!!!

كلام كبير هابسطهااااااالكم

عزيزى الرجل وعزيزتى المرأة النضج والجد والعقل والتفكير الواقعى ووزن الأمور جميل وأدى الحياة بتلطش فينا وبتعلمنا كتير بالفعل، لكن متنسوش نفسكم أنتم مهما كبرتم جواكم فى طفل من زمان أوى قاعد وموجود شايل كل حاجه حلوة وبريئة فيكم حتى دموعكم مع نفسكم شايلها.تعبتم وكافحتم ومازلتم بتكافحوا لكن لازم تستغلوا كل دقيقة فى حياتكم تفرحوا مهما كانت فكرتكم عن الفرحه دى فى نظر الآخرين سذاجة.متتكسفوش واعملوا اللى يسعدكم ونفسكم فيه مهما كان بسيط فتأثيره جواكم كبير.

 

أيوه يعنى عاوزة تقولى ايه برده؟

يعنى متتكسفوش تأكلوا الجيلاتى فى الشارع(الكلام دا للى لسه بيتكسفوا) إيه المشكله عيب ؟؟؟؟؟؟؟؟مين قال؟ ولا حتى المصاصه بتاعة أطفال لا عادى أطفال وكبار ونفسى فيها وبتدينى شىء من السعادة حقيقى.هأسعد نفسى يا أخى وخليك إنت فى حالك، لوهاجيب وردة ليا أو حتى ماسكها إيه الغريب فى دا بحب الورد وبيريحنى نفسيا.

دخلت ملاهى للكبار والصغار وعينى وقعت على المرجيحه وتتحملنى وأنا حابب دا، هاركب وأتمرجح شويه وأغمض عينى وأنسى شكلى وعمرى وأنسى إنى أب أو أم وعندى مصاريف وأنسى الأحوال وأنسى كل شىء وأعيش اللحظه دى، أنا طفل مشتاق وملهوف راكب على المرجيحه وبيضحك، ولو فى زحاليق هتزحلق كمان محدش له حاجه عندى.

قررت إنت وأصحابك تلعبوا بلى أو الأوله فى الشارع حنيتوا تعملوها وطلبت معاكم ليه لا؟؟؟طلبت معاك تجيب لوليتا وتأكلها حالا فى الشارع أو فى البيت انطلق.

نفسك فى بالونة هيليوم أو عاديه حتى هاتها وامشى بيها، أبسط حاجه هيتقال جايبها أكيد لطفل صغير وأنت فعلا كده.

فى العيد عاوز أو عاوزة تشترى طاقية أو طرطور لو لقيت حجم كبير(مع الأسف لحد دلوقتى مش لاقيه حجم رأسى بس مش هيأس) ولو عاوز تجيب زماره كمان هات واديها للصبح دا العييييييييييييييييييد بييجى مرتين فى السنه وبس ،ولا حتى مش فى العيد هاتها عادى.

بتحب الجيلى كولا هاته ودوووس.العب اجرى نط هات لعبه حبيتها أوى ونفسك تلعب بيها مش عيب ولا حرام ولا هيبتك هتروح، موازين الكون مش هتختل يعنى لأنك بتلعب بمسدس ميه ولا حتى يويو ولا مكعبات.

ارسم ولون، تابع كرتون مفضل ليك حبيته أوى زمان وحبيت ترجع تشوفه تانى ، اقرأ قصص أطفال أو ميكى وفلاش وسماش وبليه الحاجات اللى ممكن لو حد شافك بتقرأها يتفاجئ وكأنك أجرمت خاصه لو انت راجل أو ست كبارة، المهم انت حاسس إيه بعدها فرحان ومنشكح وبتحلم ونفسيتك أحسن هو دا المطلوب.

العب فى الرمل فى المصيف اعمل طيارة ورق وطيرها اركب عجل ……أى حاجه حلوة تيجى على بالك ومفيهاش مشكله متترددش لحظه ،أهم حاجه تكون مبسوط.

 

 

 

الخلااااااااصة

يمكن حد يفتكرنى حالمة بزيادة أو خياليه جدا لأنى مش ببص على الواقع الصعب دلوقتى واللى بيزيد صعوبه، هأقولك عارفه وحزينه على دا لكن الحياة هتبقى أحلى لو بصينا على نعم ربنا فى حياتنا وقلنا الحمد لله وفرحنا نفسنا بأبسط الأشياء وبدون تكلفة تذكر، ومقعدناش نكرر لنفسنا وحفرنا فى ذهننا صورة الواقع وبس وصحتنا اللى فى النازل والفلوس اللى مش مكفيه ونشتكى وكبرنا ومعدش ينفع نعمل دا ودا. لما تيجى تفكر كده بص كويس حواليك وهتشوف المرضى فعلا واللى حالهم معدوم حرفيا وربك هو اللى ساترهم من عنده و انا بستغرب عايشين ازاى كده!!! لكن هم قدروا يسعدوا نفسهم بأقل أقل أقل القليل وأبسط الاشياء عشان لو فضلوا باصين على الواقع وبس أكيد كانوا انتحرووووا من زمان. لما نيجى احنا ويكون حالنا افضل وأحسن كتير من غيرنا ومش عارفين نفرح بالنعم دى ونسعد نفسنا وبنأجل السعادة لأدام لحد لما تفرج، لا محدش ضامن عمره.تقدرتسعد نفسك وتكون مجنون وتساعد غيرك بالخير اللى جواك وبرده بروح الطفل الصغير اللى محوش لسه شوية امل.

متكبرش نفسك ومتكبريش نفسك مهما زاد الشعر الأبيض فى رأسك، خلى قلبك قلب طفل وروحك خفيفة وطايرة ومترددش الكلام اللى بيفكرك دايما إنك كبرت وعجزت وخلاص راحت عليك ،اتحرك على قد قدرة جسمك بس اتحرك.
متستسلمش وتميل رأسك وتمشى محنى زى معظم الناس فى بلدنا بقى شكلهم كده من شيل الهموم والتفكير فى كل ثانيه فى يومهم حتى فى نومهم معذورين بلا ادنى شك لكن ساعات دا بيغمى عينينا منشوفش حاجه حلوة فى حياتنا فنكتئب فى اليوم مليون مرة.

امسك فى كل حركة أو كلمة أو صورة أو حتى صوت بس هيديك سعادة غريبة. طالما فى كلمة سعادة وضحك وفرفشه انا راشق وبتكمل لما تلاقى حد يقولك يلا بينااااااااااا.

فى حاجات كتير ترسم سعادة بس حبيت أشاور على حاجات طفولية أو البعض بيعتبرها كده وبيمنع نفسه عنها أو يقول لنفسه معدش ينفع بقى، دى مش ليا، لا طلعت تنفع ،تخيل بقى!!!! وبتتعمل ومحصلش كوارث من وراها.

عشان تقدر تواصل لازم قلبك ينبض بفرحه وامل وراحه مع ناس تحبهم ويحبوك انشر رساله الفرحه دى لكل شخص وفى كل مكان.واللى يقولك اكبر بقى..اكبرى بقى….قولوله خليك انت الكبيييير.

المايك معاك

سألت سؤال للناس :إيه أكتر حاجه طفولية أو تبان للناس كده بتعملها أو بتعمليها مع نفسك ولنفسك وتسعدك فعلا من قلبك؟؟؟؟؟ودى كانت بعض الردود (من أرض الواقع وليست من وحى خيالى)

أ.ع/أعزب/24 سنه: بحب أتفرج تقريبا على معظم الكرتون وأسمع أغانيهم زى كرتون (توم وجيرى – بابار – سابق ولاحق – باتمان – انا واخى – ابطال الديجيتال – قصص الانبياء – يوغى يو) وساعات بلعب لعبه يوغى يو مع نفسى.
ن.ط/آنسه/26 سنه: بحب أكل أيس كريم أوى فى الشارع وخاصة الميجا وبعشق الملاهى جدااااااااا.
م.خ/متزوج وأب لطفلين/33سنه: بحب أزور المنطقه اللى اتربيت فيها ولعبت فيها وأنا صغير ومواظب على لعب كرة القدم فى الاستاد وبعشق اكل اللب.
س.أ/متزوجه وأم لطفلين/50سنه: بحب البلالين جدا ولازم أجيب منها فى العيد ولو خرجت ولقيت حد بيبيع بلالين لازم أشترى، أنفخهم وأعلقهم فى البيت ،وأحب لو عندى أى أطفال أنفخلهم وأديهالهم وهم مروحين،كمان بحب أشوط الكرة لو جت عندى فى الشارع وأحب أتمرجح اوى لما أروح الحديقه.
أ.ع/متزوج/29سنه: بحب أتفرج على كرتون زى (المحقق كونان – توم وجيرى -نقار الخشب – سابق ولاحق) وألعب كراش سباق السيارات، وأكل شيبسى ومصاصات بس الأخيرة دى فى البيت دلوقتى ههههه.
ج.م/متزوجه وأم لطفلين/28سنه: بحب أوى ألعب لعب زمان زى صيادين السمك والمنديل،كنت فى قمه سعادتى لما قدرت ألعبها تانى ،ولما بكون مع نفسى بحب أعمل تسريحة المدرسة اللى ماما كانت بتعملهالى (قطه واحده وأسيب بقيه شعرى) وألبس لبس الشغل وكأنى رايحه أول يوم مدرسة.
ع.أ/متزوجة وأم ل3 أطفال/46سنه: بحب ألعب بالعرايس (باربى-بو-كاندى) والدباديب وأهتم بيهم وأفصلهم هدوم وأحطهم فى أماكن تظهرهم فى البيت بيخرجونى فعلا من أى مود وحش ،اشتريت أنا شويه والباقى جاتلى هدايا.

م.ر/متزوجة وأم لطفل/27سنه: بحب أتمرجح جداااااااااا فى أى مكان وأدام الناس عادى وبحب الجرى فى الشارع مع أصحابى بس صعب دلوقتى طبعا هههههه.
س.أ/متزوجة وأم لطفلين/39سنه: بحب أتفرج على كرتون مع أولادى بحب(توم وجيرى – ربانزل – تنه ورنه – سنو وايت – بيتر بان) وغاويه جدا تلوين الرسومات فى كراريس التلوين وبحب شغل الصلصال جدا والمشى على البحر بيظبطولى المود جامد
ص.ع/متزوجة وأم ل4أطفال/62سنه: بعشق الجيلاتى جدا وأكله فى البيت أو فى أى مكان ولازم يبقى بسكوته مش كوبايه وماكلوش بالمعلقه ألحسه كده هههههه وببقى مستمتعه جدا وسعيدة وقتها.

انت كمان ممكن تشاركنا الأشياء الطفولية اللى بتسعدك ومش مكسوف انك تقولها فى انتظار مشاركاتكم وآرائكم.