أقوى 10 بطولات غير متوقعة فازت بها فرق ضعيفة فى تاريخ كرة القدم
معظم الناس بتحب لما تشجع إنها تشجع فرق كبيرة , ليها تاريخ طويل و بطولات كثيرة , بس أى متابع كرة قدم محايد بيلاقى نفسه متعاطف مع أى فريق صغير مالوش تاريخ كروى طويل بيعمل مغامرة , و بينافس عمالقه كره القدم و المرشحين الدائمين لأى بطوله بيدخلوها , فالحصان الأسود لأى بطولة هو أكثر فريق بيكسب التعاطف , و الأجمل هو لو الفريق كمل إنجازه للنهاية و فاز كمان بالبطولة.
و احنا هنا هنعرض , أشهر الفرق رغم انها كانت الطرف الأضعف أو الحلقه الأضعف فى المنافسه على البطولات , إلا انهم كملوا مشوارهم كحصان ذهبى و قدروا يفوزا ببطولات على غير التوقعات.
فوز أبردين الأسكتلندى ببطولة أوروبا للأندية أبطال الكؤوس و السوبر الأوروبى
كل متابعى كرة القدم يعرفوا السير ألكس فيرجسون و تاريخه الكبير مع اليونايتد , بس الكثير منهم ميعرفوش إن بدايته الحقيقية و إنجازاته بدأت مع نادى صغير فى أسكتلندا اسمه أبردين , الدورى الأسكتلندى مسيطر عليه زى المعظم عارف من فريقين , سيلتك و رينجرز , و بينهم مشاكل كبيره دينية و اجتماعية , فى وسط السيطرة دى ظهر فريق أبردين عشان يفجر مفاجأة بالفوز بالدورى الأسكتلندى.
أبردين فى الموسم ده شارك فى بطوله أوروبا للأنديه أبطال الكأس ( البطوله اللى انتهت و حل مكانها بطوله كأس اليويفا ) , البطولة كان مشارك فيها عمالقه زى ريال مدريد , بايرن ميونخ , أبردين بدأ البطوله من الدور التمهيدى كسب و قدر يفوز على سيون السويسرى بمجموع نتيجه 11/1 فى المبارايتين , فى الجوله الأولى قدر يفوز على فريق دينامو تيرانا الألبانى 1/0 بصعوبه بمجموع المباراتين , ثم لخ بوزنان البولندى بمجموع 3/0 فى المباراتين , ثم يواجه العملاق البافارى فى ربع النهائى , ليتعادل معاه فى المانيا و يفوز عليه فى اسكتلندا بنتيجه 3/2 فى مباراه كبيره جداً قدمها الفريق الصغير , فى قبل النهائى قابل فريق ووتر شاى ثور البلجيكى , ليفوز عليه بمجموع 5/2 فى المباراتين , فى الوقت نفسه يصل عملاق أوروبا ريال مدريد للنهائى , الأمور شكلها محسوم , يلتقى الفريقين فى السويد فى النهائى على ملعب أوليفى فى جوتنبرج , و بعد تعادل فى الوقت الأصل يحقق الفريق الاسكتلندى المفاجأة المدوية بالفوز فى الوقت الإضافى .
المغامرة استمرت حتى فى السوبر الأوروبى , قابل فريق هامبورج الألمانى القوى جداً وقتها , و السوبر وقتها كان بيلعب على جولتين فيتعادل فى ألمانيا سلبياً و يفوز فى اسكتلندا 2/0 , ليصبح أول فريق اسكتلندى يفوز ببطولتين أوروبيتين و هو الرقم الصامد حتى الآن و يحقق مفاجأة كبرى.
https://www.youtube.com/watch?v=Smf7dXwl594
هيلاس فيرونا يفوز بالدورى الإيطالى
الدورى الإيطالى مشهور بوجود فرق عملاقة كثيرة فيه , اليوفنتوس , الإنتر , الميلان , روما , لاتسيو , كل دى فرق ليها صولات و جولات , بس الدورى الإيطالى موسم 84/85 كان من أغرب المواسم فى تاريخه . اليوفى , إنتر و الميلان فشلوا فى انهم يكونوا الأول أو الثانى , لاتسيو نزل درجة تانية، و المفاجأة الأكبر فوز هيلاس فيرونا باللقب.
فيرونا فاز باللقب بعد ما جمع 43 نقطه من 30 ماتش , و كان أقوى دفاع فى البطوله حيث دخل مرماه 19 جون فقط و قدر يفوز على معظم عمالقة الدورى الإيطالى فى الوقت ده , و ده كان اللقب الوحيد لفريق هيلاس فيرونا فى الدورى الإيطالى , و الفريق ده حاليا بيلعب فى الدرجة الثانية.
ليستر سيتى بطلا للدورى الإنجليزى الممتاز
ليستر سيتى كان راجع مؤخراً للدورى الممتاز بعد غياب حوالى 10 سنوات , بعد فوزه بدورى الدرجه الثانيه 2013 -2014 , فى موسم 2015 -2016 , فجر المفاجأه الكبرى , بتشكيله مفيش فيها إسم كبير و تحت قياده الايطالى المحنك كلاوديو رانيرى , يقدروا يحققوا لقب الدورى الإنجليزى الممتاز لأول مره فى تاريخهم و ده بعد تحقيقهم ل 81 نقطه , و ده بفارق 10 نقاط عن أقرب منافسيهم فى الوقت ده آرسنال , لتكون المفاجأه الأكبر فى تاريخ البريمر لييج بشكله الجديد.
الدنمارك بطل أوروبا
” الدنمارك لم يكن من المفترض أن تتواجد هنا ! ” جملة اتقالت بعد فوز الدنمارك بالبطولة و ده صحيح فعلاً , لإنها تأهلت أتوماتيكيا بعد إيقاف يوغسلافيا و منعها من المشاركه فى البطولة بسبب قرارت الأمم المتحدة و مجلس الأمن بسبب الحروب هناك , الدنماركيين اصلا عرفوا بإنهم هيشاركوا قبل البطوله بـ 11 يوم فقط.
البطولة كانت ايامها كانت عبارة عن 8 فرق على مجموعتين , بيصعد الأول و الثانى من كل مجموعه على قبل النهائى مباشرة , الدنمارك صعدت كثانى المجموعه بعد فوز و تعادل و هزيمة بعد نجحوا فى الفوز على الفرنسيين , و اتعادلوا مع الإنجليزى و خسروا من السويد البلد المنظم , و فى الوقت نفسه تعادل الإنجليز مع الفرنسيين خرجهم بره البطولة.
فى قبل النهائى قابلوا منتخب هولندا القوى جداً وقتها , و اتعادلوا فى الوقت الأصلى و الإضافى بنتيجه 2/2 , و يفوزوا بضربات الجزاء الترجيحية بعد ما ضيع فان باستن شخصياً ضربة الجزاء الثانية عشان يكملوا المغامرة و يوصلوا للنهائى.
فى النهائى نجحوا فى إكمال المغامرة على عكس المتوقع و فازوا 2/0 على منتخب ألمانيا القوى أيضاً ليفوز بلقب البطولة فى المفاجأة الأكبر فى تاريخ البطولة حتى هذا الوقت.
الجيل ده شمل نجوم للكرة الدنماركية سطعوا لاحقا زى بيتر شمايكل و بريان لاودروب و مايكل لاودروب.
https://www.youtube.com/watch?v=yqFGnkYpSJM
أتليتكو مدريد بطل للدورى الإسبانى
بمستوى أتليتكو مدريد الأيام ده ممكن ميكنش الموضوع مفاجأة , بس لما يبقى المنافسين ريال مدريد و برشلونة فى أقوى فتراتهم يبقى الموضوع أكيد مفاجأة.
أتليتكو نجح فى الفوز بالبطوله سنه 2013/2014 , بعد وصوله ل 90 نقطه , بفارق 3 نقط عن الكبيرين , ريال مدريد و برشلونة , إنجاز كبير معظمنا عاصره , و حط سيميونى ضمن المدربين المرموقين فى عالم كره القدم , لاعبين كمان زى كورتوا حارس المرمى , و دييجو كوستا , بقوا مطمع لكل أندية أوروبا.
اليونان بطل أوروبا
مفاجأه الدنمارك كانت الأكبر حتى عام 2004 , لما فازت اليونان بالبطوله , كان فى مرشحين كثر للبطولة , أكيد مش من ضمنهم اليونان .
ضمت البطوله 16 فريق , و اليونان كانت فى المجموعة الأولى مع إسبانيا و روسيا و البلد المنظم البرتغال , و كانت متوقع هزيمتهم و خروجهم سريعاً و لكنهم فجروا المفاجأة فى المباراة الإفتتاحية بالفوز على برتغال فيجو , ريو كوستا , مانيش , كوارزيما , و رونالدو الشاب فى الوقت ده و غيرهم بنتيجه 2/1.
فى المباره الثانيه اتعادلوا مع الإسبان 1/1 , و فى المباره الثالثة اتهزموا من روسيا بنتيجه 2/1 , و صعدوا بأعجوبه بعد تعادلهم مع الإسبان فى كل شىء النقاط و فارق الأهداف و لكن تسجيلهم ل 4 أهداف مقابل هدفين للإسبان خلاهم يصعدوا كثانى مجموعة
فى ربع النهائى قدروا يخرجوا منتخب فرنسا بعد أن فازوا عليه بنتيجه 1/0 و فى نص النهائى قدروا يستغلوا قاعده الهدف الفضى ( إنهاء المباراه بعد شوط إضافى واحد إذا سجل أحد الفريقين ) و فازوا على التشيك 1/0
فى النهائى كرروا فوزهم على البرتغال و لكن بنتيجة 1/0 , لتحقق شبه معجزة كروية
أدائهم كان محل انتقاد كبير بسبب طريقتهم المتعمده على التنظيم الدفاعى المبالغ فيه و الإعتماد على الكرات الثابتة , و لكنهم فى النهاية إستخدموا امكانياتهم الضعيفة و قدروا يحققوا لقب كبير لبلدهم.
https://www.youtube.com/watch?v=wZDHLltOeVc
الأوروجواى بطل كأس العالم
الأوروجواى مكنتش بالضعف الكبير , و لكن كأس العالم ده كان متفصل للبرازيل , جيل قوى جداً , البطولة على أرضهم , إستاد الماراكانا الشهير و ال 200 ألف برازيلى اللى بيملوا الإستاد .
البطولة دى كان فيها شىء غريب برضه , ان قبل النهائى مكنتش مبارايات اقصائية , بل اتعملت على شكل دورى من دور واحد بين الفرق الأربعه اللى وصلوا لقبل النهائى , الفرق دى , كانت البرازيل و الأوروجواى و أسبانيا و السويد , قبل أخر مباراة فى البطوله دى كان الوضع إن البرازيل عندها فوزين و الأوروجواى فوز و تعادل , يعنى يكفى البرازيل الفوز أو التعادل للفوز بالبطولة.
إستاذ الماراكانا يمتلىء على أخره , الكل بيحضر نفسه للإحتفال و البرازيل بتتقدم كمان بنتيجه 1/0 عشان الإستاد يشتغل , و لكن هدفين فى الشوط الثانى من الأوروجواى تقلب الأفراح لحزن , لتفوز الأوروجواى بكأس العالم.
نوتنجهام فورست بطلا للدورى الإنجليزى
فريق صاعد للدورى الإنجليزى الممتاز , كصاحب مركز ثالث , تقليدياً الكل بيتوقع إنه موسم واحد و هيرجع ثانى للقسم الثانى , بس الوضع مع نونتجام فورست كان مختلف , و رغم وجود القوى التقليدية , آرسنال , مانشستر يونايتد , ليفربول , السيتى , توتنهام و إيفرتون يستطيع نونتجهام فورست إنه يفوز بلقب الدورى الإنجليزى الممتاز فى موسمه الأول , تحت قياده براين كلوف اللى استعاد سمعته كمدرب كبير , بعد فترات أقل نجاحا مع برايتون و ليدز يونايتد.
نوتنجهام حقق الدورى بعد ما حقق 64 نقطه فى 42 مباراه , و بفارق 7 نقاط عن ليفربول , لتبدأ فتره من التألق أوروبيا و محليا تم تتويجها بالفوز بالكأس الأوروبى , كأس السوبر الأوروبى.
https://www.youtube.com/watch?v=1V0QFcDK0sI
ويجان بطل كأس الإتحاد الإنجليزى
منذ تأسيسه فى عام 1932 , لم يحقق ويجان لا دورى و لا بطولة كأس الإتحاد و كان إنجازه الوحيد هو الفوز بكأس الكارلنج , و لكن بعد أن أخرج إيفرتون و ميلوول فى ربع و نص النهائى , قابل فى النهائى فريق مانشيستر سيتى اللى بدأ يستعرض قدراته المالية , و أصبح قوة لا يستهان بها فى إنجلترا , و رغم كده يحقق رجال روبيرتو مارتينز المفاجأه و يفوزوا على السيتى فى النهائى بهدف فى الوقت بدل الضائع سجله بن واتسون لتنتهى المباراة بعد الهدف مباشرة و يحقق ويجان اللقب الأغلى فى تاريخه.
ستيوا بوخارست بطل أوروبا
البطوله الأهم دورى أبطال أوروبا فى مسماها القديم ” الكأس الأوروبى ” , بالطبع الفريق الرومانى لم يكن المرشح الأول للبطوله , و لا حتى من المرشحين للبطوله , إلا إنه نجح فى الوصول للنهائى , ليواجه العملاق الكتالونى برشلونه فى النهائى
بعد وقت أصلى و إضافى إنتهى بالتعادل السلبى , نجح ستيوا فى الفوز بالبطوله بعد ما فشل برشلونة فى تسجيل اى ضربه جزاء من ضرباته ال 4 اللى نفذها مقابل ضربتين جزاء نجح لاعبى ستيوا فى تنفيذها ليفوز الفريق الرومانى باللقب الغالى.
اترك تعليقاً