أشهر 10 خائنين فى تاريخ كرة القدم العالمية..لن تصدق كم منهم كان أفضل لاعب فى العالم

من أول ما بدأنا عصر الإحتراف، و علاقه اللاعبين بالأندية بقت علاقه نفعيه بحته , بمعنى إن النادى لو مش محتاج اللاعب بيستغنى عنه و اللاعب لو عاوز عقد أفضل أو منافسه على مستوى أعلى بيسيب النادى على طول.

و لكن رغم كل ده فى خطوط حمراء , بتنقل اللاعب من لاعب محترف للاعب خائن فى نظر جماهير كره القدم , زى توقيت الإنتقال , الانتقال لمنافس مباشر , الإنتقال من أجل إغراء الأموال فقط.

و هنا هنحاول نلقى الضوء على أشهر 10 خائنين فى عالم كرة القدم من وجهة نظر الجماهير.

مانويل نوير

فى نظر جماهير شالكه , هو واحد من اكتر لاعبى العالم خيانة , مانويل نوير إنضم لشالكه كناشىء فى سن صغير , بدأ يفرض نفسه كحارس أساسى مع الفريق الأول و لعب معاهم خمس مواسم لدرجه إنه بقى كابتن الفريق.

بعدها رفض التجديد للنادى و انضم للغريم التاريخى لنادى شالكه نادى بايرن ميونخ , ليصبح أحد أكثر اللاعبين المكروهين بالنسبه لجماهير شالكه.

مايكل أوين

فتى الإنجليز الذهبى فى مونديال 98 , عاش أفضل فتراته مع ليفربول و ثنائيته مع إيميل هيسكى فى ليفربول و منتخب إنجلترا كانت ثنائيه شهيره جداً , بعض 8 مواسم مع ليفربول فاز فيها بكأس اليويفا , و كأس الاتحاد الإنجليزى , و الكره الذهبيه.

قرر ينتقل لريال مدريد و بعد تجربه غير ناجحه نسبياً انضم لنيوكاسل و منه لمانشستر يونايتد الغريم التقليدى لليفربول اللى عاش معاه أفضل فتراته , تصريحه ” إن لم تستطع أن تهزمهم إنضم لهم ” اللى قاله لما إنضم للشياطين الحمر كان عامل إضافى أدت لكره جماهير الأنفيلد ليه.

سيسك فابريجاس

أفضل ناشىء خرج من تحت يد آرسين فينجر فى نظر الكثيرين , بعد مواسم إستثنائيه كلاعب و توجها بإرتدائه شاره قياده الفريق , إختار الرحيل لبرشلونه بناء على رغبته فى العوده لوطنه , الكثير من جماهير آرسنال تفهمت النقطه دى.

اللى مقدروش يتفهموه هو انه بعد فترات صعود و هبوط مع برشلونه لما وجد الباب مقفول قصاده فى آرسنال فى وجود خط وسط فيه أوزيل و رمزى يقدروا يلعبوا فى مركزه , إنه اختار تشلسى الغريم الكبير للآرسنال و تحت قياده جوزيه مورينهو أحد أكثر الشخصيات كرها بالنسبه لجماهير الآرسنال.

مو جونتسون

أقل الأسماء شهره فى القائمه دى , و لكن أكثرهم إثاره للجدول , عشان نفهم الصوره أكتر لازم نفهم الصراع الطائفى بين الكاثوليك و البروتسانت فى اسكتلندا و العداء الطائفى بينهم و الشىء ده وصل للرياضه متمثله فى الصراع بين سيلتك و رينجرز.

مو كان لاعب سيلتك و متألق معاهم و سافر يحترف فى الدورى الفرنسى , بعدها قرر يرجع اسكتلندا , و عمل مؤتمر صحفى بيقول فيه انه بيحب نادى سيلتك جداً و عاوز يرجع , سيلتك باع أحد لاعبيه عشان يستعد لعودة مو . المفاجأه بعدها إن مو قرر يمضى لرينجرز ليكون أول لاعب كاثوليكى يلعب لنادى رينجرز فى العصر الحديث.

جماهير رينجرز نفسها مكنتش راضيه عن الصفقة لكن تسجيله لهدف الفوز على سيلتك فى أول ديربى بعد إنتقاله خلت جماهير رينجرز تتقبل الصفقة , و جماهير سيلتك تكرهه أكتر.

زلاتان إبراهيموفيتش

إبراهيموفيتش تعدى مرحله الخيانه , لدرجه إن البعض وصفه بالمرتزق , زلاتان لعب مع اليوفينتوس و قعد هناك سنتين و بعد هبوط اليوفى , قال إنه هيمشى للنادى اللى هو عاوزه حتى لو اضطر لرفع قضيه على النادى.

انتقل لأحد منافسى اليوفى المنافسين الإنتر بعدها انتقل لبرشلونه , و بعد فتره غير ناجحه قرر يرجع لمدينه ميلان , و لكن المره دى للغريم الأزلى للانتر نادى ايه سى ميلان.

مستوى إبراهيموفيتش أمر لا يمكن الكلام عنه و لكن ولائه للأنديه اللى بيلعب ليها شىء تقريباً غير موجود.

روبن فان بيرسى

روبن فان بيرسى إنضم للأرسنال فى سن صغير , و قضى 8 مواسم مع الفريق معظمها كان مليان إصابات , و بعد تقريباً أول موسم لعبه كامل مع الفريق و بعد أن أصبح قائد للفريق عقب رحيل فابريجاس.

قرر الضغط على إداره آرسنال للانتقال للغريم الأزلى للفريق مانشستر يونايتد , تصريحه إنه قرر يسمع ” للطفل الصغير الذى بداخله , الذى كان يصرخ بإسم مانشستر يونايتد ” كان عامل استفزاز إضافى لجماهير الآرسنال.

آشلى كول

احنا مش قصدنا نركز على لاعبى الآرسنال , فى السنوات الأخيره لاعبى الآرسنال عملوها كتير , آشلى كول يعتبر تقريباً أكثر لاعب إعترض لكره جماهير آرسنال على أرض الملعب بعد انتقاله لتشلسى لأسباب كثيره منها إنه إنجليزى و طريقه الإنتقال.

بعد بدايته الرائعه مع الآرسنال , فى 2005 تم تقديم أدله على لقائه بمدرب تشيلسى فى الوقت ده جوزيه مورينهو عشان مناقشه انتقاله للفريق.

و ده طبعا و هو لسه باقى أكثر من سنه فى عقده، و تم تغريمه و تغريم نادى تشلسى بعد الموضوع . بعدها بقى فى الآرسنال لموسم إضافى.

فى النهايه انضم لتشيلسى فى 2006 , عشان يتعرض لاهانات من جماهير آرسنال فى كل مباراه يدخل فيها ملعب الامارات لدرجه انهم فى مباراه قاموا بطبع عدد كبير من الجنيه الاسترلينى عليه صوره اشلى كول كرمز لرحيله بسبب الفلوس و سموه كاشلى كول.

رونالدو الظاهرة

رونالدو الأصلى أو الظاهرة أو البرازيلى أو زى ما تحب تقول عنه قول , لاعب من أمهر من لمسوا كره القدم لكن على صعيد ولائه للأنديه فهو من عينه إبراهيموفيتش.

رونالدو لعب لانديه متنافسه بشكل معتقدش إن حد غيره عملها بالشكل ده . رونالدو لعب لبرشلونة لموسم واحد فى 1996 /1997 , بعدها انتقل للانتر ليعيش فتره رائعه معاهم لدرجة إنه اعتقد النادى بإنه ” بيته ” فى فتره من الفترات لينتقل لريال مدريد فى 2002 بعد قضائه 5 سنوات مع الانتر.

بعد 4 مواسم تانيه مع الريال , يرجع تانى لمدينه ميلان بس المرة ده لايه سى ميلان.

مشوار كروى مثير للجدل و لكن موهبه لا خلاف عليها على الاطلاق .

سول كامبل

العداوه بين نادى آرسنال و نادى توتنهام عداوه معروفه و شديده جداً , قصص كثيره عن العداوه دى المعظم عارفها من أول انتقال آرسنال لشمال لندن , لحد حادثة التسمم الشهيره , العداوة دى بتخلى الانتقالات بين الناديين شبه مستحيله.

سول كامبل بقى كان لاعب فى صفوف توتنهام من سن 15 سنه , فى 2001 كان نجم الفريق و عقده على وشك الإنتهاء , توتنهام عرضوا عليه عقد جديد يخليه صاحب أعلى راتب فى الفريق.

إلا إن المدير الرياضى لنادى آرسنال فى الوقت ده الداهيه ديفيد دين قدر يقنعه برفض عقد التجديد مع توتنهام و التوقيع لآرسنال فى صفقه انتقال مجانى بعد انتهاء عقده مع السبيرز . ليتهمه جمهور توتنهام بالخيانه و يتم وصفه بـ يهوذا كرمز على خيانته لجماهير السبيرز.

لويس فيجو

فيجو كان احسن لاعب فى العالم فى فتره من الفترات , و من الأسماء اللى بيتم ذكرها بين الأفضل فى التاريخ , فى 1995 انضم لبرشلونه من نادى طفولته سبورتنج لشبونه , فى فترته مع برشلونه و فاز معاهم بكأس اليويفا و لقب الدورى فى الفتره دى.

فى يوليو 2000 , حصلت مفاجأه فى عالم كره القدم , الشرط الجزائى لعقده مع برشلونه تم تسريبه , و ريال مدريد قدم عرض بقيمه 60 مليون و 100 ألف دولار لكسر الشرط الجزائى و اللاعب ضغط من أجل الانتقال للغريم التقليدى للبارسا.

ليبدأ عصر الجالاكتيكوس فى ريال مدريد . و يتم اعتبار فيجو العدو الأول لجماهير الفريق الكتالونى

و توجيه الإهانات ليه لدرجه انهم رموا عليه رأس خنزير مقطوعه فى أحد المبارايات.